ជាតិ
នយោបាយជាតិ
លោក ហ៊ុន សែន ប្រតិកម្មបញ្ហាព្រំដែនជាថ្មី ជាមួយតំណាងរាស្ត្រCNRP
× លោកនាយករដ្ឋមន្ត្រី ហ៊ុន សែន បានប្រតិកម្មខ្លាំងៗតបទៅកាន់តំណាងរាស្ត្រគណបក្សសង្គ្រោះជាតិ ពាក់ព័ន្ធករណីព្រំដែន ជុំវិញការទាមទារឲ្យរដ្ឋាភិបាលបង្ហាញផែនទីខ្នាត១លើ១០០០០០ ជាសាធារណៈដល់ប្រជាពលរដ្ឋ។ ទន្ទឹមនឹងការប្រតិកម្មនេះ ប្រមុខរដ្ឋាភិបាលកម្ពុជា បានបញ្ជារឲ្យបណ្ដាទូរទស្សន៍ក្នុងស្រុកទាំងអស់ ចាក់ផ្សាយឡើងវិញចំពោះការបកស្រាយរបស់លោក អស់រយៈពេលជាង៥ម៉ោង នៅក្នុងរដ្ឋសភាកាលពីឆ្នាំ២០១២ កន្លងទៅ។
លោក ហ៊ុន សែន ដែលបានចេញមុខបកស្រាយចំពោះការទាមទារបង្ហាញផែនទី ជំនួសលោក វ៉ា គីមហុង ប្រធានគណៈកម្មាធិការព្រំដែនកម្ពុជានោះ បានជំរុញឲ្យតំណាងរាស្ត្រគណបក្សសង្គ្រោះជាតិ បង្ហាញភស្ដុតាងមកវិញ ចំពោះការចោទប្រកាន់រដ្ឋាភិបាលថា ប្រើប្រាស់ផែនទីក្លែងក្លាយ។
មានសំឡេង
ថ្លែងនៅក្នុងកិច្ចប្រជុំពិភាក្សានិងអនុម័តសេចក្តីព្រាងច្បាប់ស្តីពីការគ្រប់គ្រងគ្រោះមហន្តរាយ នៅវិមានរដ្ឋសភា នាព្រឹកថ្ងៃទី០៨ មិថុនានេះ ប្រមុខរដ្ឋាភិបាល បានបកស្រាយយ៉ាងដូច្នេះថា«មេឯកឧត្តម បាននិយាយជាមួយឯកឧត្តមហើយឬនៅ អំពីខ្ញុំបាននិយាយជាមួយឯក សម រង្ស៊ី នៅឯកូឡូឡាំពួនោះ បាននិយាយហើយឬនៅ ឬឯកឧត្តមនៅផ្សេង គាត់ផ្សឹង ប្រធានគ្រប់គ្រងសមាជិកបក្សមិនបាន។ រហូតដល់ហ៊ានចោទរដ្ឋាភិបាលថា ប្រើផែនទីក្លែងក្លាយ ។ នរណាក្លែងក្លែង នរណាមិនក្លែងក្លាយនិយាយគ្នាឲ្យច្បាស់ ធ្វើដល់រដ្ឋាភិបាលមកប្រើផែនទីក្លែងក្លាយ ស្នេហាជាតិអីតែលោកឯង ខ្ញុំបានមកឆ្លើយនៅហ្នឹង ប្រាំម៉ោងជាងយកអាហ្នឹងមកវិញ ឬក៏ត្រូវការឲ្យទូរទស្សន៍ជាតិឡើងវិញ ទូរទស្សន៍ទាំងអស់ចាក់ផ្សាយឡើងវិញ ខ្ញុំស្នើឲ្យចាប់ផ្ដើមពីល្ងាចនេះទៅតែម្ដង នៅអ្វីដែលខ្ញុំបានឆ្លើយនៅកន្លែងនេះ»។
កាលពីឆ្នាំ២០១២កន្លងទៅ លោក ហ៊ុន សែន បានបកស្រាយពាក់ព័ន្ធនឹងបញ្ហាព្រំដែននេះ អស់រយៈពេលជាង៥ម៉ោង នៅក្នុងរដ្ឋសភា ដោយមិនមានការសួរដេញដោលពីអ្នកនយោបាយណាឡើយ ដោយកាលនោះលោក ហ៊ុន សែន បានអះអាងថា រដ្ឋាភិបាលនឹងការពារទឹកដីប្រទេសកម្ពុជា មិនឲ្យមានការឈ្លានពាននិងបាត់បង់ចូលទៅប្រទេសជិតខាងទេ សូម្បីតែមួយលីម៉ែត្រ។
ការចេញមកប្រតិកម្មពីសំណាក់លោកនាយករដ្ឋមន្ត្រី ហ៊ុន សែន ជាថ្មីនេះ គឺធ្វើឡើងក្រោយពីលោក ម៉ៅ មុនីវណ្ណ និងតំណាងរាស្ត្រគណបក្សសង្គ្រោះជាតិជាងរូបទៀត បានសរសេរលិខិតទៅកាន់លោក ហេង សំរិន ប្រធានរដ្ឋសភាចុះហត្ថលេខា ស្នើឲ្យលោក វ៉ា គីមហុង ប្រធានគណៈកម្មាធិការព្រំដែនកម្ពុជាបង្ហាញផែនទីខ្នាត១លើ១០០០០០ ជាសាធារណៈដល់ប្រជាពលរដ្ឋ។
ជុំវិញនៃការទាមទារឲ្យលោក វ៉ា គីមហុងប្រធានគណៈកម្មាធិការព្រំដែនកម្ពុជា បង្ហាញផែនទីប្រទេសកម្ពុជានេះ ដោយសារតំណាងគណបក្សសង្គ្រោះជាតិមិនជឿទុកចិត្តទៅលើការបកស្រាយរបស់រដ្ឋាភិបាល ដែលបានអះអាងថា ខ្លួនបានអនុវត្តតាមផែនទី១លើ១០០០០០ នេះ។
តំណាងរាស្ត្រគណបក្សសង្គ្រោះជាតិមណ្ឌលសៀមរាប លោក អ៊ុំ សំអាន បានបញ្ជាក់កន្លងមកថា រូបលោកបានទទួលរបាយការណ៍ពីអ្នកស្នេហាជាតិម្នាក់ ដែលបានផ្ដល់ឯកសារទាក់ទងនឹងបញ្ហាព្រំដែននេះ ដោយក្នុងឯកសារបង្ហាញថា លោក វ៉ា គីមហុង ប្រធានគណៈកម្មាធិការព្រំដែនកម្ពុជា បានអនុវត្តកិច្ចការងារកន្លងមកតាមឯកសារព្រំដែន ដែលលោក វ៉ា គីមហុង បានស្នើសុំឯកសារចំលងពីប្រទេសវៀតណាម ដែលជាគូបដិបក្សព្រំដែនជាមួយកម្ពុជាទៅវិញទេ៕
© រក្សាសិទ្ធិដោយ thmeythmey.com