សង្គមអន្តរជាតិ
អន្តរជាតិ
ឈុតហែលទឺកថ្មីប្រាប់ពីពេលវេលាដែលត្រូវបន្ថែមក្រែមការពារកម្តៅថ្ងៃ
×
បើសិនជាលោកអ្នកចូលចិត្តហែលទឹកសមុទ្រ ឬហាលថ្ងៃក្រោមពន្លឺព្រះអាទិត្យនោះ ពេលនេះលោកអ្នកមិនចាំបាច់ព្រួយបារម្ភថា កម្តៅថ្ងៃនឹងធ្វើឲ្យរលាកស្បែករបស់លោកអ្នកទៀតឡើយ។ឈុតហែលទឹកមួយប្រភេទនឹងប្រាប់លោកអ្នកពីពេលវេលាដែលត្រូវបន្ថែមក្រែមការពារកម្តៅថ្ងៃ ដោយផ្ញើសារទៅកាន់ទូរស័ព្ទដៃរបស់លោកអ្នក។
Spinali Design គឺជាឈ្មោះម៉ាកឈុតហែលទឹកដ៏ឆ្លាតវៃនេះ ហើយត្រូវបានបង្កើតឡើងនៅក្រុង Mulhouse ប្រទេសបារាំង ដោយអ្នកស្រីMarie Spinaliដែលជាអ្នកគ្រប់គ្រងក្រុមហ៊ុនកម្មវិធីព័ត៌មានវិទ្យាមួយ។ គំនិតច្នៃប្រឌិតនេះបានកើតមានកាលពីពីរឆ្នាំមុន នៅពេលដែលអ្នកស្រីឃើញស្បែករបស់នារីម្នាក់ត្រូវរោលដោយកម្តៅថ្ងៃយ៉ាងខ្លាំង។ អ្នកស្រីងឿងឆ្ងល់ថា ហេតុអ្វីបានជានារីនោះមិនលាបឡេការពារកម្តៅថ្ងៃបន្ថែមទៀត។
នៅពេលដែលយើងពាក់ឈុតនេះ យើងគ្រាន់តែជ្រើសរើសប្រភេទសម្បុរស្បែកនៅលើកម្មវិធីជាការស្រេច បន្ទាប់ពីនោះ យើងអាចចាប់ផ្តើមហាលថ្ងៃបានតាមចិត្ត ដោយគ្រាន់តែរង់ចាំសញ្ញាប្រាប់ពេលវេលាប៉ុណ្ណោះ។ អតិថិជនទាំងអស់អាចរកជាវបានតាមការបញ្ជាទិញនៅលើគេហទំព័រផ្ទាល់របស់Spinali Design ដោយជ្រើសរើសទំហំពណ៌ និងរូបភាពលម្អទៅតាមចំណូលរបស់ខ្លួន។ ឈុតនេះមួយសម្រាប់លក់ថ្លៃ១៤៩ អឺរ៉ូ។
បច្ចុប្បន្ន Spinali Designមានលក់តែឈុតហែលទឹកសម្រាប់នារីប៉ុណ្ណោះ។ ឈុតសម្រាប់បុរសអាចនឹងចេញលក់នៅឆ្នាំក្រោយ។ ប៉ុន្តែ ក្រុមហ៊ុនបានបង្កើតរួចទៅហើយនូវមុខងារValentinសម្រាប់បុរស។ តាមរយៈមុខងារនេះ បុរសនឹងទទួលបានសារដែលផ្ញើពីឈុតហែលទឹករបស់គូស្នេហ៍ខ្លួនបញ្ជាក់ថា ដល់វេលាដែលត្រូវលាបឡេការពារកម្តៅបន្ថែមឲ្យគូស្នេហ៍ខ្លួនហើយ៕
© រក្សាសិទ្ធិដោយ thmeythmey.com