កីឡាជាតិ
ជាតិ
គ្រូបង្វឹក និងប្រធានក្រុមជម្រើសជាតិ អះអាងថា ឃឹម បូរី មានស្មារតីខ្ពស់
× បួនថ្ងៃមុនជំនួបជាមួយជាមួយភ្ញៀវសឹង្ហបុរីក្នុងយុទ្ធនាការប្រកួតជម្រុះជុំទីពីរនៃព្រឹត្តិការណ៍ FIFA World Cup ឆ្នាំ២០១៨ ខ្សែប្រយុទ្ធ ឃឹម បូរី បានបាត់បង់ម្តាយជាទីស្រឡាញ់របស់ខ្លួនដែលបានទទួលមរណភាពដោយរោគាពាធ។ ប៉ុន្តែកីឡាករវ័យ២៥ឆ្នាំរូបនេះ មិនបំភ្លេចបេសកកកម្មសម្រាប់ក្រុមជម្រើសជាតិកម្ពុជានោះឡើយ។
ថ្លែងក្នុងសន្និសីទសារព័ត៌មាននៅទីស្នាក់ការសហព័ន្ធកីឡាបាល់ទាត់កម្ពុជា (FFC) កាលពីព្រឹកថ្ងៃពុធនេះ លោក Ohara Kazunori គ្រូបង្វឹកក្រុមជម្រើសជាតិកម្ពុជា បានអះអាងថា ឃឹម បូរី នៅតែមានឈ្មោះក្នុងបញ្ជីសម្រាប់ការប្រកួតបើកឆាកក្នុងព្រឹត្តិការណ៍ជម្រុះ World Cup ជាមួយសឹង្ហបុរីនាថ្ងៃព្រហស្បតិ៍។
«ពិតមែនតែ បូរី ស្ថិតក្នុងតំណាក់កាលដ៏លំបាក ប៉ុន្តែគេជាកីឡាករម្នាក់ដែលមានស្មារតីខ្ពស់។ គេបានមកចូលហ្វឹកហាត់ជាមួយក្រុមបន្ទាប់ពីបូជាសពម្តាយរួច ហើយកម្លាំងចិត្តរបស់គេកាន់តែមានកម្រិតខ្ពស់ផងដែរ»។ នេះជាការលើកឡើងរបស់លោក Ohara ដោយបន្ថែមថា ឃឹម បូរី ដែលបានស៊ុតបាល់បញ្ចូលទី១គ្រាប់នាជ័យជម្នះ ១-០ លើមីយ៉ាន់ម៉ារក្នុងជំនួបមិត្តភាពនៅប្រទេសថៃ គឺជាកីឡាករដ៏សំខាន់ម្នាក់ក្នុងតំបន់ប្រយុទ្ធរបស់ក្រុមជម្រើសជាតិ។
ស្របពេលជាមួយគ្នានេះផងដែរ គួច សុគម្ភៈ ដែលជាប្រធានក្រុម មានជំនឿថា ឃឹម បូរី មិនបានធ្លាក់ចុះនូវជំនឿចិត្តរបស់ខ្លួននោះឡើយ។ សុគម្ភៈ បញ្ជាក់ថា៖ «យើងបានលើកទឹកចិត្តគាត់ ហើយគាត់មានការបែងចែកច្បាស់លាស់ណាស់រវាងបញ្ហាគ្រួសារ និងការលេងក្នុងក្រុមជម្រើសជាតិ»។
នៅលើទីលានហ្វឹកហាត់នៅពហុកីឡដ្ឋានជាតិ ឃឹម បូរី ដែលបានកោរសក់កាន់ទុក្ខម្តាយ បាននិយាយក្នុងបទសម្ភាសជាមួយទូរទស្សន៍បាយ័នថា ទោះបីជាខ្លួនមានទុក្ខសោកក្នុងគ្រួសារក៏ដោយ ប៉ុន្តែគេនៅតែខំប្រឹងពុះពារដើម្បីខ្លួនឯង គ្រួសារ និងប្រទេសជាតិទាំងមូល៕
© រក្សាសិទ្ធិដោយ thmeythmey.com