អន្តរជាតិ
អាមេរិកកំពុងភ័យបុកពោះដោយសារអ្នកទោសឧក្រិដ្ឋ២នាក់រត់រួចពីគុកដូចក្នុងកុនហូលីវូត
×
នៅរដ្ឋញូវយក ភាគខាងជើងសហរដ្ឋអាមេរិក ថ្ងៃចន្ទម្សិលមិញ ក្រុមប៉ូលិសសន្ធឹកសន្ធាប់បាននាំគ្នាតាមចាប់ខ្លួនអ្នកទោសឧក្រិដ្ឋពីរនាក់ដែលបានរត់រួចពីពន្ធនាគារ កាលពីថ្ងៃសៅរ៍កន្លងទៅ។ គេសង្ស័យថា ការរត់រួចពីគុកដ៏មានសុវត្ថិភាពខ្ពស់ដូច្នេះបាន អាចដោយសារមានការឃុបខិតជ្រោមជ្រែងពីមនុស្សផ្ទៃក្នុង។ អាជ្ញាធរសន្យាផ្តល់រង្វាន់១សែនដុល្លារ បើមានព័ត៌មានទាក់ទងនឹងអ្នកទោសទាំង។
អ្នកទោសអាមេរិកដ៏គ្រោះថ្នាក់ទាំង២នាក់នេះ ម្នាក់ឈ្មោះ David Sweat អាយុ៣៥ឆ្នាំ មានទោសជាប់ពន្ធនាគារមួយជីវិតដោយសារបានសម្លាប់ស្ហេរីហ្វរងម្នាក់។ ម្នាក់ទៀតឈ្មោះ Richard Mattអាយុ៤៩ឆ្នាំ ជាប់ពន្ធនាគារ២៥ឆ្នាំ ពីបទចាប់ជំរិតបុរសម្នាក់។ បុរសម្នាក់នោះត្រូវបានគេវាយរហូតដល់ស្លាប់ និងត្រូវគេកាត់ដៃជើងចោល។ ជនឧក្រិដ្ឋទាំង២ បានរត់រួចពីគុក កាលពីយប់ថ្ងៃសុក្រ ឈានចូលព្រឹកថ្ងៃសៅរ៍សប្តាហ៍មុន។ រហូតពេលនេះ អាជ្ញាធរនៅមិនទាន់ចាប់ខ្លួនបានមកវិញនៅឡើយទេ។ ប៉ូលិសMexiqueក៏កំពុងត្រៀមចាប់អ្នកទោសទាំង២ដែរ ព្រោះថា អ្នកទោសទាំង២អាចនឹងកំពុងធ្វើដំណើរទៅភាគខាងត្បូងឆ្ពោះទៅMexique ដោយសារអ្នកទោសMatt ធ្លាប់ស្គាល់Mexique។
អ្វីដែលគួរអស្ចារ្យនោះគឺថា វិធីដែលអ្នកទោសឧក្រិដ្ឋទាំង២ប្រើប្រាស់ ដើម្បីរត់ចេញពីគុក មានលក្ខណៈដូចក្នុងខ្សែភាពយន្តហូលីវូតណាស់។ ពួកគេទាំង២បានចោះប្រហោងជញ្ជាំងគុកធ្វើពីដែក ហើយចូលទៅតាមស្ពានមួយកំពស់៦ជាន់។ នៅទីនោះ ពួកគេបានចុះទៅដល់ក្រោមដី។ បន្តមកទៀត ពួកគេបានចោះប្រហោងទុយយោធំំៗជាច្រើន រកច្រកចេញតាមរូងដី ហើយនៅទីបញ្ចប់ ពួកគេបានចេញតាមមាត់លូ នៃផ្លូវមួយក្បែរនោះ។ មុនរត់ចេញពីគុក អ្នកទោសទាំង២ថែមទាំងសេរសេរទុកពាក្យជូនពរជាភាសាអង់គ្លេស "Have a nice day" ទៀតផង។
ពន្ធនាគារនោះសង់ឡើងតាំងពីឆ្នាំ១៨៦៥ មានជញ្ជាំងកំពស់១០ម៉ែត្រ។ នៅទីនោះ មានអ្នកទោសប្រមាណ៣០០០នាក់ និងមានរការពារសន្តិសុខតឹងតែង។ យោងតាមលោកAndrew Cuomo ជាអភិបាលរដ្ឋញូវយក មនុស្សផ្ទៃក្នុងពន្ធនាគារអាចនឹងឃុបខិតទើបអ្នកទោសឧក្រិដ្ឋទាំង២អាចមានឧបករណ៍ចោះប្រហោងគុក រត់រួចដូច្នេះ។ ពន្ធនាគារមានបុគ្គលិកបំរើការ៣ប្រភេទ៖ អ្នកយាម បុគ្គលិកស៊ីវិល និងបុគ្គលិកមកពីក្រុមហ៊ុនឯកជន។ ប៉ូលិសកំពុងតែសួរស្ត្រីបំរើការម្នាក់ ដែលគេគិតថា គាត់លង់ស្នេហ៍ជាមួយអ្នកទោសRichard Matt។ គួរបញ្ជាក់ដែរថា កាលពីឆ្នាំ១៩៨៦ Richard Matt ធ្លាប់រត់រួចពីពន្ធនាគារមួយកន្លែងទៀត តែត្រូវប៉ូលិសចាប់បានមកវិញ៕
© រក្សាសិទ្ធិដោយ thmeythmey.com