ជាតិ
សង្គមជាតិ
កម្ពុជាដណ្តើមបានពានរង្វាន់វោហាស័ព្ទជាសាធារណៈ ប្រចាំតំបន់អាស៊ីប៉ាស៊ីហ្វិក
×![]()
×![]()
ភ្នំពេញ៖ នៅថ្ងៃទី១៤ ខែមិថុនា ឆ្នាំ២០១៥ម្សិលមិញនេះ យុវនិស្សិតជំនាញច្បាប់នៃ សាកលវិទ្យាល័យភ្នំពេញអន្តរជាតិ (PPIU) និងជាបេក្ខជនតំណាងសភាយុវពាណិជ្ជករកម្ពុជា( JCI )កញ្ញា តារា រត្ន បានទទួលពានរង្វាន់វោហាស័ព្ទជាសាធារណៈ (Public Speaking) ប្រចាំតំបន់អាស៊ីប៉ាស៊ីហ្វិក។ ការប្រកួតប្រជែងនេះ ប្រព្រឹត្តទៅនៅប្រទេសម៉ាឡេស៊ី ដោយមានបេក្ខជនមកពី ១០ ប្រទេសបានចូលរួម ក្នុងនោះ រួមមាន ប្រទេសម៉ាឡេស៊ី ហុងកុង ស្រីលង្កា ជប៉ុន ហ្វីលីពីន បង់ក្លាដេស ម៉ុងហ្គោលី ឥណ្ឌូនេស៊ី ឥណ្ឌា និងប្រទេសកម្ពុជា។
ការប្រកួតវោហាស័ព្ទជាសាធារណៈនេះ បានរៀបចំឡើងក្រោមប្រធានបទទាក់ទងនឹងការ អប់រំជាគន្លឹះជំរុញយុវជនជំនាន់ក្រោយ ឲ្យរួចចាកពីភាពក្រីក្រ និងលទ្ធភាពនៃការប្រើប្រាស់ បច្ចេកវិទ្យា ជាគន្លឹះផ្តល់ឥទ្ធិពលដល់យុវជន។
បន្ទាប់ពីទទួលបានជ័យលាភីនេះរួច កញ្ញា តារា រត្ន នឹងបន្តទៅចូលរួមក្នុងការប្រកួតប្រជែង ពាន់រង្វាន់ពិភពលោក ដែលនឹងប្រារព្ធឡើងអំឡុង សមាជយុវសភាពាណិជ្ជករពិភពលោក (JCI World Congress) ក្នុងខែវិច្ឆិកា២០១៥ នៅក្រុងកាណាហ្សាវ៉ាក ប្រទេសជប៉ុន។
មុនចាកចេញទៅប្រកួតនៅប្រទេសម៉ាឡេស៊ី កញ្ញា តារា រត្ន បានប្រាប់ថា នាងនឹងឈ្នះក្នុង ការប្រកួតនេះ។ «ខ្ញុំសង្ឃឹម៩៩,៩ភាគរយ ថា នឹងអាចយកឈ្នះបេក្ខជននៅ ក្នុងតំបន់អាស៊ី»។ នេះការរំពឹងរបស់កញ្ញា រត្ន។
គួររម្លឹកថា កាលពីឆ្នាំ ២០១៤ កញ្ញា ប៉ែន សុខអាន ជាសិស្សនៃវិទ្យាស្ថានអន្តរទ្វីបអាមេរិកាំង បានក្លាយជើងឯកការប្រកួតវោហារសព្ទជាសាធារណៈប្រចាំតំបន់អាស៊ីប៉ាស៊ីហ្វិកផងដែរ ដោយកញ្ញាបានផ្ដួលយុវជនពីប្រទេសក្នុងតំបន់ ដូចជាជប៉ុន ម៉ុងហ្គោលី ម៉ាឡេស៊ី ហ្វីលីពីន និងឥណ្ឌា ជាដើម។ ពេលនោះ នាងបានក្លាយជាបេក្ខជនតំណាងអាស៊ីចូលរួមការប្រកួតផ្ដាច់ព្រ័ត្រ ថ្នាក់ពិភពលោកនៅទីក្រុង Leipzig ប្រទេសអាល្លឺម៉ង់ ជាមួយដៃគូឆ្នើម ៣នាក់ទៀត ដែលជាជើងឯកប្រចាំទ្វីបអាមេរិក អឺរ៉ុប និងអាហ្វ្រិក។ ប៉ុន្តែ សុខអាន ពុំចំណាត់ថ្នាក់ជើងឯកនោះទេ ពេលនោះតំណាងមកពីទ្វីបអាហ្វ្រិកសញ្ជាតិនីហ្សេរីយ៉ា លោក Paul Akingbola បានកា្លយជាជ័យលាភីថ្នាក់ពិភពលោក។ ទោះបីជាយ៉ាងណា នារីវ័យ ១៩ ឆ្នាំរូបនេះ នៅតែមានមោទនភាពចំពោះកម្ពុជាដែលមានបេក្ខជនបានក្លាយជាតំណាងឲ្យ ទ្វីបអាស៊ីប៉ាស៊ីហ្វិក ជាពិសេសគឺ ប្រទេសកម្ពុជា។
ជាមួយគ្នានេះដែរ លោក ស៊ុំ ស៊ីថែន ប្រធានគម្រោងវេទិកាប្រកួតប្រជែងផ្នែកវោហាស័ព្ទ សាធារណៈ និងតស៊ូមតិ នៃសភាយុវពាណិជ្ជកម្មកម្ពុជា បានបង្ហាញចំណាប់អារម្មណ៍ថា នេះ គឺបញ្ជាក់ឲ្យឃើញថា យុវជនកម្ពុជា មានសមត្ថភាពគ្រប់គ្រាន់ក្នុងការប្រកួតប្រជែងវោហាស័ព្ទ សាធារណៈ។ លោកថា៖«ការប្រកួតនេះ បានជួយឲ្យយុវជនកម្ពុជាមានកម្រិតចំណេះ ភាសាអង់គ្លេសកាន់តែខ្លាំង ចេះបញ្ចេញគំនិត ព្រមទាំងស្រាវជ្រាវច្រើន មុននឹងឡើងប្រកួត ជាមួយបេក្ខជនផ្សេងទៀត»៕ លោកបន្តថា នេះ ជាមោនភាពមួយទៀតរបស់កម្ពុជា ដែលបានក្លាយជាតំណាងវោហាស័ព្ទជាសាធារណៈប្រចាំតំបន់អាស៊ី ទៅចូលរួមប្រកួតថ្នាក់ ពិភពលោក ជាមួយបេក្ខជនមកពីទ្វីបអឺរ៉ុប អាមេរិក និងអាហ្វ្រិកផ្សេងទៀត។
គួរបញ្ជាក់ផងដែរ ប្រធានបទប្រកួតក្នុងកម្មវិធី ឆ្នាំ២០១៥នេះ ផ្តោតសំខាន់លើគោលដៅអភិវឌ្ឍសហស្សវត្សរ៍របស់អង្គការសហប្រជាជាតិ (UN-MDGs) ដែលទាក់ទងនឹងប្រធានបទកាត់បន្ថយភាពក្រីក្រធ្ងន់ធ្ងរ និងបញ្ឈប់ការរីកសាយនៃមេរោគអេដស៍ព្រមទាំងការផ្តល់នូវការអប់រំ បឋមសិក្សាជាសាកលដែលត្រូវសម្រេចឲ្យបានត្រឹមឆ្នាំ ២០១៥៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
12 ម៉ោង
