អន្តរជាតិ
នយោបាយអន្តរជាតិ
វ៉ាស៊ីនតោនគ្រោងបញ្ជូនយន្តហោះចម្បាំង F-22 ទៅអឺរ៉ុបទុកគំរាមរុស្ស៊ី
×
សហរដ្ឋអាមេរិកមានគម្រោងបញ្ជូនយន្តហោះចម្បាំងប្រភេទថ្មី F-22 ទៅកាន់តំបន់អឺរ៉ុប ក្នុងពេលដែលភាពតានតឹងរវាងអឺរ៉ុបនិងរុស្ស៊ីកើនឡើងកាន់តែខ្លាំង។ យន្តហោះ F-22 ត្រូវបានគេស្គាល់ច្បាស់ថាជា យន្តហោះប្រដេញទំនើបស៊េរីចុងក្រោយរបស់អាមេរិកសម្រាប់ប្រើប្រាស់ក្នុងប្រតិបត្តិការយោធា។ បើតាមមន្ត្រីក្រុងវ៉ាស៊ីនតោន យន្តហោះចម្បាំងទាំងនេះនឹងត្រូវពង្រាយទៅ អ៊ុយក្រែននិងបណ្តារដ្ឋអឺរ៉ុបផ្សេងទៀត។
យោងតាមសារព័ត៌មាន CNN ក្រសួងការពារជាតិអាមេរិកអាចនឹងពង្រាយយន្តហោះចម្បាំងប្រភេទ F-22 ទៅកាន់តំបន់អឺរ៉ុបនាពេលខាងមុខនេះ។ ការពង្រាយយន្តហោះប្រដេញគឺដើម្បីឆ្លើយតបសកម្មភាពរុស្ស៊ីនៅក្នុងបញ្ហាអ៊ុយក្រែន និងទប់ស្កាត់បញ្ហាគំរាមកំហែងផ្សេងទៀតដែលបណ្តារដ្ឋអឺរ៉ុបកំពុងប្រឈម។
លោក Deborah James លេខាធិការទ័ពជើងគោកអាមេរិកបានឲ្យដឹងក្នុងពេលលោកស្ថិតក្នុងទីក្រុងប៉ារីសថា យន្តហោះប្រដេញស៊េរីទំនើបនេះអាចនឹងត្រូវបញ្ជូនទៅកាន់ប្រទេសអ៊ុយក្រែន និងអាចទៅកាន់បណ្តារដ្ឋអឺរ៉ុបផ្សេងទៀតដើម្បីទប់ទល់រុស្ស៊ីដែលបន្តជ្រៀតជ្រែកក្នុងវិបត្តិនៅអ៊ុយក្រែន។
យ៉ាងណាក៏ដោយ វាមិនមែនជារឿងថ្មីឡើយ ព្រោះអាមេរិកបន្តបញ្ជូនទ័ព និង អាវុធជាច្រើនទៅអឺរ៉ុបដើម្បីធ្វើលំហាត់យោធាជាមួយបណ្តាប្រទេសសមាជិកបក្សសម្ព័ន្ធយោធាណាតូ ដើម្បីតំឡើងសាច់ដុំដាក់រុស្ស៊ីឥតឈប់ឈរ ក្រោយពេលដែលវិបត្តិនៅអ៊ុយក្រែនកើតឡើង។ បច្ចុប្បន្ននេះអាមេរិកក៏បានបញ្ជូនយន្តហោះដឹកនាំអាវុធនុយក្លេអ៊ែរ B-2 និងយន្តហោះទម្លាក់គ្រាប់ B-52 ផងដែរទៅចូលរួមក្នុងសមយុទ្ធនៅអឺរ៉ុបផងដែរ។
ជុំវិញសមត្ថភាពយន្តហោះនេះដែរ មន្ត្រីយោធាខាងលើបានអះអាងថា យន្តហោះប្រដេញ F-22 នេះមានសមត្ថភាពខ្ពស់ ដោយគ្មានអាវុធប្រឆាំងយន្តហោះណាអាចយកឈ្នះយន្តហោះនេះបានឡើយ។ បើនិយាយពីតម្លៃវិញ យន្តហោះប្រដេញប្រភេទនេះមួយគ្រឿងមានតម្លៃរហូតដល់ ១៤៣លានដុល្លារអាមេរិកឯណោះ។
យ៉ាងណាក៏ដោយ ការពង្រាយយន្តហោះចម្បាំងប្រភេទថ្មីទៅអឺរ៉ុប ឬអ៊ុយក្រែនមិនធ្វើឲ្យរុស្ស៊ីនៅស្ងៀមដាច់ខាត។ កាលពីម្សិលមិញប្រធានាធិបតីរុស្ស៊ីលោក វ្ល៉ាឌីមៀ ពូទីន បានប្រកាសបញ្ចូលមីស៊ីលកម្រិតបាញ់ឆ្លងទ្វីបប្រហែល ៤០ដើមនៅក្នុងវិស័យការពារជាតិ និងបន្ថែមអាវុធយុទ្ធភ័ណ្ឌថ្មីៗដល់កងទ័ពផងដែរ។ ការប្រកាសនេះធ្វើឡើងក្រោយពេលដែលក្រុងវ៉ាស៊ីនតោន លើកគម្រោងពង្រាយទ័ព និងអាវុធធុនធ្ងន់ទៅអឺរ៉ុបខាងកើតនិងតំបន់បាល់ទិកផង៕
© រក្សាសិទ្ធិដោយ thmeythmey.com