ពីនេះ ពីនោះ
ការតែងខ្លួនឯង អាចបង្ហាញពីចរិតលក្ខណៈរបស់អ្នកល្អឬអាក្រក់
×
សម្លៀកបំពាក់ និងគ្រឿងតែងខ្លួន អាចធ្វើឲ្យបុគ្គលិកលក្ខណៈរបស់អ្នកល្អឬអាក្រក់បាន។ មនុស្សជាច្រើនអាចមើលថា ការមានសម្លៀកបំពាក់ គ្រឿងតែងកាយល្អៗ គឺត្រូវប្រើលុយច្រើនណាស់។ ជាការពិត ប៉ុន្តែអ្នកត្រូវមានសម្លៀកបំពាក់ល្អៗ ១ឬ២ឈុតក៏បានដែរ។ អ្នកមិនចាំបាច់ថា គ្រប់ឈុតដែលប្រើក្នុងជីវិតប្រចាំថ្ងៃ ត្រូវតែមានតម្លៃថ្លៃនោះទេ។ គោលការណ៍ងាយៗនៃការតែងខ្លួនឲ្យមានសណ្តាប់ធ្នាប់ និងបុគ្គលិកលក្ខណៈល្អ គឺត្រូវគិតថា អ្នកកំពុងទៅទីណា? អ្នកកំពង់ធ្វើអ្វី? ដើម្បីអាចជ្រើសរើសសម្លៀកបំពាក់ និងគ្រឿងតែងកាយឲ្យបានសមរម្យទៅតាមកាលៈទេសៈនោះ។ អ្វីដែលសំខាន់ គឺសម្លៀកបំពាក់ត្រូវតែស្អាតបាត សុភាពរាបសា អ៊ុតឲ្យរាប មិធុំក្លិនអាក្រក់។ ល។ ខាងក្រោមនេះជាលក្ខណៈនៃការតែងខ្លួនរបស់នារីនិងបុរស។
ការតែងខ្លួនសម្រាប់សុភាពនារី៖
១) មិនគួរបណ្តោយឲ្យសក់ក្បាលកន្ទ្រើងនោះទេ គឺត្រូវតែឲ្យស្អាត គ្មានអង្គែ និងគ្មានក្លិនមិនល្អ ហើយប្រដាប់ចង់សក់ គួរតែពណ៌ចាស់ៗ ដូចជា៖ ពណ៌ខ្មៅ ពណ៌ត្នោត ឬពណ៌ទឹកប៊ិចជាដើម។
២) តុបតែងមុខឲ្យស៊ីនឹងសម្លៀកបំពាក់ មិនគួរបណ្តោយឲ្យមុខខ្លាញ់ និងមិនត្រូវតុបតែងមុខ ដោយពណ៌ឆើតឆាយពេកនោះទេ។
៣) សម្លៀកបំពាក់ត្រូវឲ្យសមគួរទៅនឹងកាលៈទេសៈ ស្រស់ស្អាត សមនឹងសម្បុរ មិនធុំក្លិន និងមិនជ្រួញ។
៤) ត្រូវពាក់អាវឲ្យសមល្មមនឹងតួខ្លួន គឺមិនត្រូវធំឬតូចពេក ដោយមិនលើសពីមួយអ៊ីង។ ប្រសិនបើពាក់អាវសឺមី ត្រូវឲ្យសម្រុងអាវលើស កដៃមួយអ៊ីង។
៥) ស្បែកជើង គួរជាស្បែកជើងក្រវ៉ាត់កែង ឬស្បែកជើងកែងដែលស្អាត។
៦) គួរពាក់ស្រោមបារដើម្បីឲ្យសុភាព។
៧) គ្រឿងប្រដាប់កាយ មិនគួរពាក់ច្រើនពេកទេ ដូចជា៖ មិនពាក់បូរដែលមានផ្កាច្រើន មិនពាក់កងដៃច្រើន និងក្រវិលធំៗ ឬខ្សែកធំ ព្រោះថាមើលទៅដូចជារញ៉េរញ៉ៃ។ ចិញ្ចៀនគួរតែពាក់ម្ខាងមួយវង់ នាឡិកាដៃគួរជានាឡិកាស្បែក ឬដែកអ៊ីណុក។
ការតែងខ្លួនសម្រាប់សុភាពបុរស៖
១) សក់មិនគួរទុកឲ្យវែងពេកនោះទេ ពេលសក់ចាក់ត្រចៀកនោះបង្ហាញថា សក់របស់អ្នកវែងហើយ សក់ត្រូវតែស្អាត គ្មានអង្គែ និងមិនធុំក្លិន។
២) មិនគួរបណ្តោយឲ្យមុខខ្លាញ់ និងបបូរមាត់ប្រេះនោះទេ។
៣) ក្រវាត់កជាលក្ខណៈពិសេសផ្ទាល់ខ្លួន ប្រើក្នុងឱកាសដែលសមរម្យ ហើយពណ៌ត្រូវស៊ីគ្នានឹងអាវសឺមីខាងក្នុង ប្រវែងរបស់ក្រវាត់ ក នៅពេលចង ត្រូវឲ្យវែងត្រឹមកណ្តាលក្បាលខ្សែក្រវាត់។
៤) សម្លៀកបំពាក់ត្រូវសក្តិសមនឹងកាលៈទេសៈ ពណ៌មិនត្រូវឆើតពេកទេ មិនធុំផ្អាប់ មិនជ្រួញ។
៥) ត្រូវពាក់ឲ្យសមល្មមនឹងតួខ្លួន គឺមិនត្រូវធំ ឬចង្អៀតពេកទេ ដោយត្រូវឲ្យធំជាងដងខ្លួន មិនលើសពី១ទៅ១.៥អ៊ីងទេ បើពាក់អាវសឺមី ត្រូវឲ្យសម្រុងអាវលើស កដៃមួយអ៊ីង។
៦) ប្រវែងខោ ពេលស្លៀកហើយ ត្រូវមើលឃើញកែងស្បែកជើងប្រហែលជាមួយសង់ទីម៉ែត្រ។
៧) ខ្សែក្រវាត់ ត្រូវដាក់ឲ្យសមនឹងពណ៌ខោ និងស្បែកជើង ហើយមិនគួរពាក់ពណ៌ត្នោតគូជាមួយនឹងពណ៌ខ្មៅទេ។
៨) ស្បែកជើងតាមកាលៈទេសៈ ស្អាត ភ្លឺរលោង និងគួរមានស្បែកជើងសម្រាប់ផ្លាស់ប្តូរ ២គូ ដើម្បីការពារកុំឲ្យធុំក្លិន។
៩) ស្រោមជើងត្រូវឲ្យស្អាត ពណ៌ចាស់ ហើយស៊ីគ្នានឹងឈុតសម្លៀកបំពាក់ និងមិនគួរពាក់ស្រោមជើងពណ៌សទេ៕
ប្រភព៖ ដកស្រង់ពីសៀវភៅយុទ្ធសាស្ត្រក្នុងការដឹកនាំ (ដាំដើមជីវិត)
© រក្សាសិទ្ធិដោយ thmeythmey.com