ពីនេះ ពីនោះ
មេដឹកនាំត្រូវផ្តល់៤ចំណុចសំខាន់ៗដល់បុគ្គលិក
×
សង្វាក់ផលិតកម្មមួយល្អ ស្ថាប័នមួយរីកចម្រើន ត្រូវពឹងផ្អែកលើបុគ្គលិកទាំងថ្នាក់ទាបបំផុតរហូតដល់ថ្នាក់មេដឹកនាំ គឺមិនមែនពឹងផ្អែកលើមេដឹកនាំតែម្នាក់ឯងនោះទេ។ រីឯ សង្វាក់ផលិតកម្ម ឬស្ថាប័នមួយមិនរីកចម្រើន គឺបណ្តាលមកពីបុគ្គលិកខ្វះសមត្ថភាព មេដឹកនាំប្រកាន់បក្សពួកនិយម ធ្វើការសម្រេចចិត្តតែម្នាក់ឯង និងមិនបណ្តុះសមត្ថភាពដល់បុគ្គលិកបន្ថែម ជាដើម។ តើមេដឹកនាំគួរធ្វើអ្វីខ្លះ ដើម្បីឲ្យស្ថាប័នរបស់ខ្លួនរីកចម្រើន?
១) ផ្តល់ទំនុកចិត្ត និងគំរូភាព៖ មេដឹកនាំត្រូវតែមានក្រមសីលធម៌ល្អ គោរពវិន័យឲ្យបានត្រឹមត្រូវ និងមានទំនួលខុសត្រូវខ្ពស់លើតួនាទីរបស់ខ្លួន។ ចំណុចសំខាន់ៗនេះ គឺជាគំរូដ៏ល្អបំផុតសម្រាប់បុគ្គលិកប្រតិបត្តិតាមមេដឹកនាំ។
២) លើកទឹកចិត្តបុគ្គលិក៖ មេដឹកនាំត្រូវតែផ្តល់នូវការលើកទឹកចិត្តដល់បុគ្គលិករបស់ខ្លួនគ្រប់រូបដោយមិនលំអៀង ចេះសួរសុខទុក្ខរបស់បុគ្គលិក និងជួយដោះស្រាយបញ្ហាទាំងបញ្ហាការងារ និងបញ្ហាផ្ទាល់ខ្លួនរបស់ពួកគេ។ ជាពិសេស លើកទឹកចិត្តតាមរយៈការផ្តល់ជារង្វាន់ ដំឡើងប្រាក់ខែជាដើម។
៣) បណ្តុះសមត្ថភាពបុគ្គលិក៖ មេដឹកនាំត្រូវតែបណ្តុះសមត្ថភាពបន្ថែមដល់បុគ្គលិកដែលនៅខ្សោយ តាមរយៈការបង្ហាត់បង្រៀន ឬណែនាំពួកគេនៅពេលកំពុងអនុវត្តន៍ការងារ ផ្តល់ជាវគ្គបណ្តុះបណ្តាលឲ្យត្រូវនឹងមុខតំណែងរបស់ពួកគេ ឬឲ្យបុគ្គលិកទៅរៀននៅខាងក្រៅបន្ថែម។
៤) ផ្តល់ឱកាសដល់បុគ្គលិក៖ មេដឹកនាំត្រូវផ្តល់ឱកាសដល់បុគ្គលិកខ្សោយ ឲ្យគេមានឱកាសដូចបុគ្គលិកខ្លាំង និងផ្តល់ឱកាសដល់បុគ្គលិកដែលមានសមត្ថភាពឲ្យពួកគេកាន់មុខតំណែងធំៗ និងផ្តល់ឱកាសឲ្យបុគ្គលិកទាំងអស់បានរៀនសូត្រ និងផ្លាស់ប្តូរបទពិសោធន៍ជាមួយនឹងស្ថាប័នដទៃ។ ល៕
© រក្សាសិទ្ធិដោយ thmeythmey.com