កីឡាជាតិ
ជាតិ
AFC U-14 Girls៖ កម្ពុជាហាលអាវ ជាមួយនឹងលទ្ធផលដែលអាចទទួលយកបាន
× ក្រុមកីឡាការិនីបាល់ទាត់អាយុក្រោម១៤ឆ្នាំកម្ពុជា បានបញ្ចប់យុទ្ធនាការដណ្តើមពានរង្វាន់ទ្វីបអាស៊ីក្នុងក្របខណ្ឌតំបន់អាស៊ាន (AFC U-14 Girls’s Regional Championship ប្រចាំតំបន់អាស៊ាន) នៅក្នុងប្រទេសវៀតណាម ដោយទទួលបានបីពិន្ទុត្រឡប់មកផ្ទះវិញ។ នាការប្រកួតនៅលើទីលានក្នុងទីក្រុងហាណូយ ប្រទេសវៀតណាម ពីថ្ងៃទី២៣ ដល់ទី២៥ ខែមិថុនា កម្ពុជាបានចាញ់មីយ៉ាន់ម៉ារ ៣-០ ចាញ់ថៃ ១-០ និងយកឈ្នះឡាវ ២-០ នាជំនួបចុងក្រោយក្នុងពូល A។
ក្រុមកីឡាការិនីបាល់ទាត់អាយុក្រោម១៤ឆ្នាំកម្ពុជា បានយកឈ្នះក្រុមឡាវក្នុងលទ្ធផល ២-០ នាការប្រកួតចុងក្រោយក្នុងពូល A នៃព្រឹត្តិការណ៍ដណ្តើមជើងឯកតំបន់អាស៊ានក្រោមការរៀបចំរបស់សហព័ន្ធកីឡាបាល់ទាត់ទ្វីបអាស៊ី នៅក្នុងទីក្រុងហាណូយ ប្រទេសវៀតណាម។
ក្នុងជំនួបជាមួយឡាវនេះ កីឡាការិនី លឹម សុជា និង ម៉េត ម៉ាយ៉ាន ជាអ្នកដែលបានស៊ុតបាល់បញ្ចូលទីសម្រាប់កម្ពុជាក្នុងការប្រកួតដែលមានរយៈពេល៧០នាទី ខណៈអ្នកចាំទី ភឿ ធូ បានជាប់ជាកីឡាការិនីឆ្នើមប្រចាំការប្រកួត។ ទោះបីជាយ៉ាងណាក៏ដោយ នេះគ្រាន់តែជាជ័យជម្នះបង្គ្រប់កិច្ចប៉ុណ្ណោះសម្រាប់ក្រុមបាល់ទាត់នារីអាយុក្រោម១៤ឆ្នាំដែលដឹកនាំដោយអតីតគ្រូបង្វឹកក្លិបបៀលប្រាយយូណាយធីត និងក្លិបវេស្ទើន លោក មាស សំអឿន ខណៈការប្រកួតពីលើកដំបូង កម្ពុជាបានចាញ់មីយ៉ាន់ម៉ារ ៣-០ នៅថ្ងៃទី២៥ ខែមិថុនា ហើយចាញ់ម្ចាស់ការពារតំណែងជើងឯកថៃ ១-០ នៅថ្ងៃបន្ទាប់។
ក្រុមកីឡាការិនីវ័យក្មេងកម្ពុជា បានបញ្ចប់ចំណាត់ថ្នាក់លេខបីនៅក្នុងពូល A ដោយរកបាន៣ពិន្ទុ ឈរពីលើក្រុមឡាវដែលចាញ់ទាំងបីប្រកួត ខណៈថៃដែលឈ្នះទាំងប្រកួតឡើងទៅប៉ះក្រុមលេខពីរពូល B ម៉ាឡេស៊ី ហើយមីយ៉ាន់ម៉ារ ជួបជាមួយវៀតណាម លេខមួយពូល B នៅវគ្គពាក់កណ្តាលផ្តាច់ព្រ័ត្រ។
នេះជាលើកទីបីហើយសម្រាប់កម្ពុជាដែលបានចូលរួមក្នុងព្រឹត្តិការណ៍ដណ្តើមជើងឯកតំបន់អាស៊ានក្រោមការរៀបចំរបស់សហព័ន្ធកីឡាបាល់ទាត់ទ្វីបអាស៊ី AFC U-14 Girls’s Regional Championship ប្រចាំតំបន់អាស៊ាន។ កាលពីឆ្នាំ២០១៣ ក្រោមការដឹកនាំរបស់លោក Sam Schweingruberគ្រូបង្វឹកក្លិបភ្នំពេញក្រោននាពេលបច្ចុប្បន្ននោះ ក្រុមកុមារីកម្ពុជាស្ថិតក្នុងចំណាត់ថ្នាក់លេខ៥ក្នុងចំណោម៦ក្រុម ដោយម្ចាស់ផ្ទះវៀតណាម ជាប់លេខ១ ថៃ លេខ២ និងមីយ៉ាន់ម៉ារ បានលេខ៣ ។
នាការប្រកួតនៅលើទីលាន Thong Nhat Stadium នៃទីក្រុងហូជីមិញ កាលពីឆ្នាំ២០១៤ លោក អ៊ុំ សាវង្ស បានដឹកនាំក្រុមបញ្ចប់ក្នុងចំណាត់ថ្នាក់លេខបីនៅក្នុងពូល A ដោយយកឈ្នះសឹង្ហបុរី ២-១ ចាញ់វៀតណាម ៨-០ និងចាញ់ហ្វីលីពីន ៥-០ ។ កាលណោះ ថៃក្លាយជាម្ចាស់ជើងឯក ហ្វីលីពីនលេខ២ និងម្ចាស់ផ្ទះវៀតណាមបានលេខ៣ ។
ក្រៅពីតំបន់អាស៊ាន ព្រឹត្តិការណ៍ AFC U-14 Girls’s Regional Championship ក៏បានរៀបចំនៅតំបន់ផ្សេងៗក្នុងទ្វីបអាស៊ីផងដែរ។ នៅតំបន់ខាងកើតដែលមាន៨ក្រុមចូលរួម កូរ៉េខាងជើងបានលេខមួយ ម្ចាស់ផ្ទះចិនលេខ២ ជប៉ុនលេខ៣ រួមទាំងរង្វាន់ Fair Play។
នៅតំបន់ខាងលិចដែលមានតែ៥ក្រុមចូលរួម ហ្ស៊កដង់ បានចំណាត់ថ្នាក់លេខមួយ អារ៉ាប់រួម អេមីរ៉េត បានចំណាត់ថ្នាក់លេខពីរ ប៉ាឡេស្ទីន បានលេខបី ខណៈម្ចាស់ផ្ទះបារ៉ែន បានរង្វាន់ Fair Play។
រីឯនៅតំបន់អាស៊ីខាងត្បូង និងកណ្តាលដែលមាន៧ក្រុមចូលរួមនោះ ម្ចាស់ផ្ទះនេប៉ាល់ ត្រូវប៉ះបង់ក្លាដែសនៅវគ្គផ្តាច់ព្រ័ត្រ ខណៈឥណ្ឌាប្រជែងយកលេខ៣ជាមួយអ៊ីរ៉ង់។ ដោយសារតែនេប៉ាល់បានទទួលរងគ្រោះដោយសាររញ្ជួយ AFC មិនទាន់កំណត់ការប្រកួតសារជាថ្មីឡើយ ដែលកន្លងមក គេគ្រោងធ្វើនៅថ្ងៃទី២៥ ខែមេសា៕
© រក្សាសិទ្ធិដោយ thmeythmey.com