ជាតិ
សង្គមជាតិ
សិទ្ធិមនុស្សUN និង ILO សង្ឃឹមថាអាជ្ញាធរកម្ពុជារកឃើញជនដៃដល់សម្លាប់មេសហជីព
×![]()
ដោយ: ថ្មីៗ
ការិយាល័យអង្គការពលកម្មអន្តរជាតិ (ILO) ប្រចាំប្រទេសថៃ កម្ពុជា និងឡាវ និង ការិយាល័យឧត្តមស្នងការទទួលបន្ទុកសិទ្ធិមនុស្សប្រចាំកម្ពុជា (OHCHR Cambodia) បានចេញសេចក្តីថ្លែងការណ៍រួមសាទររដ្ឋាភិបាលកម្ពុជាដែលប្រកាសបង្កើតគណៈកម្មការស៊ើបអង្កេតករណីឃាតកម្មលើមេដឹកនាំសហជីព។
«ការិយាល័យខាងលើនេះ សំដែងនូវក្តីសង្ឃឹមថា គណៈកម្មការអន្តរក្រសួងមួយនេះ នឹងខិតខំប្រឹងប្រែងស្វែងរកជនដៃដល់ពិតប្រាកដ ដែលបានប្រព្រឹត្តអំពើឧក្រិដ្ឋកម្មនេះ និងធានាថា នឹងរកឃើញយុត្តិធម៌នៅទីបញ្ចប់ ស្របតាមការប្តេជ្ញាចិត្តរបស់ប្រទេសកម្ពុជា នៅកម្រិតជាតិ និងអន្តរជាតិ»។ នេះខ្លឹមសារនៃសេចក្តីថ្លែងការណ៍រួម។
លោកនាយករដ្ឋមន្ត្រី ហ៊ុន សែន បានចេញសេចក្តីសម្រេចមួយកាលពីថ្ងៃទី១០មិថុនា បង្កើតគណៈកម្មការអន្តរក្រសួងស៊ើបអង្កេតពិសេសលើ ករណីឃាតកម្មមេដឹកនាំសហជីព ៣ រូប គឺលោក ជា វិជ្ជា លោក ហ៊ី វុទ្ធី និងលោក រស់សុវណ្ណារ៉េត។
លោក ជា វិជ្ជា អតីតប្រធានសហជីពសេរីកម្មករ ត្រូវបានឃាតកបាញ់សម្លាប់កាលពីថ្ងៃទី២២ខែមករាឆ្នាំ២០០៤ នៅតូប លក់កាសែតក្បែរវត្តលង្កា។ លោក រស់ សុវណ្ណារ៉េត អតីតប្រធានសហជីពសេរីកម្មករកម្ពុជាប្រចាំនៅរោងចក្រ កុមារទុងហ្កា ត្រូវបានឃាតកបាញ់សម្លាប់ជាបន្តបន្ទាប់នៅជាយទីក្រុងភ្នំពេញ កាលពីឆ្នាំ២០០៤ និងលោក ហ៊ី វុទ្ធី អតីតប្រធានសហជីពសេរីកម្មករប្រចាំរោងចក្រសាន់តិចត្រូវបានឃាតកបាញ់សម្លាប់នៅព្រឹកព្រលឹមថ្ងៃទី២៤ខែកុម្ភៈ ឆ្នាំ២០០៧ បន្ទាប់ពីរូបលោកចេញពីធ្វើការវេនយប់នៅរោងចក្រសាន់តិចស្ថិតក្នុងសង្កាត់ចោមចៅ ខណ្ឌដង្កោ រាជធានីភ្នំពេញ៕
© រក្សាសិទ្ធិដោយ thmeythmey.com
