ពីនេះ ពីនោះ
ទៅមើលមន្ត្រីរំដួល ភ្ជាប់ខ្លួនជាមួយអ្នកមានអំណាច
× ១. ឲ្យតែបានជួបថ្នាក់ដឹកនាំជាន់ខ្ពស់នៅក្នុងកម្មវិធីពេលល្ងាចដោយចៃដន្យ ហើយថ្នាក់ដឹកនាំនោះសំដែងការគួរសមដោយការជល់កែវស្រាបន្តិច ស្អែកឡើងមន្ត្រីរំដួលដើរប្រាប់មិត្តភក្តិថា «យប់មិញអញផឹកជាមួយ ពូថ្នាក់ដឹកនាំនេះ ឬបងថ្នាក់ដឹកនាំនោះ»។ ហើយចាំស្តាប់មើលទៅពាក្យដែលគេហៅ ថ្នាក់ដឹកនាំជាន់ខ្ពស់ទាំងនោះ គឺគ្មានទៀតឡើយឯកឧត្តម។ មានតែពូ បង មីង + ឈ្មោះ។ គ្រាន់តែឮ ល្មមអ្នកស្តាប់ខ្លាចបះរោមដែរ។
២. ផ្ទះ ឡាន ឬសម្ភារៈផ្សេងៗ ទិញប្រើដោយលុយខ្លួនឯងទេ ប៉ុន្តែមន្ត្រីរំដួលខ្លះ ប្រាប់មិត្តភក្តិថា ពូនេះទិញឲ្យ ឬអ្នកមានអំណាចនោះឲ្យជាកាដូ។ អាមិត្តភក្តិ ឬអ្នកផ្សេងស្តាប់ឮ មិនខ្លាចក៏មិនបាន។
៣. ឃើញថ្នាក់ដឹកនាំនៅក្នុងពិធីមួយ ហើយដើរត្រុនៗទៅក្រាបសំពះសុំថតជាមួយសោះ ពេលផ្តិតបានដាក់តាំងក្នុងផ្ទះ ក្នុងបន្ទប់ការិយាល័យ មន្ត្រីរំដួលធ្វើឬកដូចអ្នកធំនោះ ហៅគាត់ថតជាមួយទៅវិញ។ បើពួកម៉ាកឃើញ អ្នកផ្សេងៗឃើញ ហើយមិនខ្លាចមន្ត្រីរំដួលនោះ ទើបចម្លែក។
៤. សន្សំលេខទូរសព្ទថ្នាក់ដឹកនាំធំៗ ដាក់ពេញទូរសព្ទរបស់ខ្លួន ហើយក៏មិនដែលបានទូរសព្ទឆ្លងឆ្លើយជាមួយថ្នាក់ដឹកនាំបានម្តងឡើយ។ ប៉ុន្តែពេលជួបមិត្តភក្តិ ឬអ្នកស្គាល់គ្នា មន្ត្រីរំដួលតែងបើកទូរសព្ទបង្ហាញ Contacts list ឲ្យមើល។ ឃើញឈ្មោះទាំងនោះហើយ បើមិនញាក់សាច់ មិនស្ញប់ស្ញែងក៏មិនកើត បើទោះជាគេមិនដឹងថា តើជាលេខទូរសព្ទទាំងនោះត្រឹមត្រូវ ឬមិនត្រឹមត្រូវក៏ដោយ។
វាមិនមែនត្រឹមតែជាការអួតអាងរបស់មន្ត្រីរំដួលតែមួយមុខនោះទេ។ មន្ត្រីរំដួលខូចខិលទាំងនេះ ត្រូវធ្វើដូច្នេះដើម្បីអាចការពារផលប្រយោជន៍ខ្លួនបានខ្លះដែរ។ តើមន្ត្រីមានសមត្ថកិច្ចណា តើមិត្តភក្តិឯណា ហ៊ានទៅសួរថ្នាក់ដឹកនាំជាន់ខ្ពស់ថា អ្វីដែលមន្ត្រីរំដួលនិយាយ គឺការភូតភរ ឬជាការពិតនោះ?
© រក្សាសិទ្ធិដោយ thmeythmey.com