ជាតិ
នយោបាយជាតិ
រដ្ឋសភានឹងបើកពិគ្រោះយោបល់ចំហរលើសេចក្ដីព្រាងច្បាប់NGOនៅខែក្រោយ
×
លោក ឈាង វុន ប្រធានគណៈកម្មការកិច្ចការបទេស សហប្រតិបត្តិការអន្តរជាតិ ឃោសនាការ និងពត៌មាន បានឲ្យដឹងថា រដ្ឋសភានឹងរៀបចំសិក្ខាសាលាពិគ្រោះយោបល់មួយ ពីសេចក្តីព្រាងច្បាប់ស្តីពីសមាគមនិងអង្គការរមិនមែនរដ្ឋាភិបាល នៅថ្ងៃទី១០ ខែកក្កដា ឆ្នាំ២០១៥ នាវិមានរដ្ឋសភា ជាមួយអង្គទូត អង្គការជាតិ អន្តរជាតិនានានៅកម្ពុជា ។
បើតាមគេហទំព័ររដ្ឋសភា លោក ឈាង វុន បញ្ជាក់ថា បន្ទាប់ពីកិច្ចប្រជុំផ្ទៃក្នុងគណៈកម្មការជំនាញនីមួយៗនៃរដ្ឋសភា ដែលទទួលភារកិច្ចពិនិត្យនិងសិក្សា លើសេចក្ដីព្រាងច្បាប់នេះ ពីគណៈកម្មាធិការអចិន្ត្រៃយ៍រដ្ឋសភារួចហើយនោះ ក៏នឹងមានកិច្ចប្រជុំអន្តរគណៈកម្មការដែរ។លោក ឈាង វុន បន្ថែមថា៖«បន្ទាប់មកទៀតនឹងមានការរៀបចំសិក្ខាសាលាពិគ្រោះយោបល់មួយ ពីសេចក្តីព្រាងច្បាប់នេះ នៅថ្ងៃទី១០ ខែកក្កដា ឆ្នាំ២០១៥ ដោយមានការចូលរួមពីអង្គទូតនានាប្រចាំនៅកម្ពុជា អង្គការជាតិ អន្តរជាតិ តំណាងក្រសួងពាក់ព័ន្ធ រដ្ឋសភា និងព្រឹទ្ធសភាផងដែរ»។
កន្លងមកអ្នកនាំពាក្យរដ្ឋសភារូបនេះ បញ្ជាក់ថា រដ្ឋសភាមិនអាចពន្យារពេលការអនុម័តសេចក្តីព្រាងច្បាប់នេះតទៅទៀតបានទេ។ លោកថា កម្ពុជាមិនអាចបណ្តោយឲ្យអង្គការសង្គមស៊ីវិលជាង៥ពាន់ដែលមានវត្តមាននៅកម្ពុជា ឲ្យធ្វើសកម្មភាពដោយមិនមានច្បាប់គ្រប់គ្រងនោះឡើយ។
សេចក្តីព្រាងច្បាប់ស្ដីពីសមាគមនិងអង្គការមិនមែនរដ្ឋាភិបាល មានចំនួន៩ជំពូក រួមមាន៣៩មាត្រា។សេចក្ដីព្រាងច្បាប់ស្ដីពីសមាគមនិងអង្គការរមិនមែនរដ្ឋាភិបាល ត្រូវបានសង្គមស៊ីវិល និងប្រជាពលរដ្ឋមួយចំនួនចាប់ផ្តើមយុទ្ធនាការតវ៉ាប្រឆាំងនឹងច្បាប់នេះ ជាបន្តបន្ទាប់មួយរយៈពេលចុងក្រោយនេះ ដោយពួកគេយល់ថា ច្បាប់នេះមានការឹតត្បិតសិទ្ធិសេរីភាពបញ្ចេញមតិរបស់ពួកគេ។ តែយ៉ាងណាលោកនាយករដ្ឋមន្ត្រី ហ៊ុន សែន ក៏ធ្លាប់ផ្ដាំផ្ញើទៅសង្គមស៊ីវិលជាតិ និងអន្តរជាតិថា កុំមានការព្រួយបារម្ភពេកចំពោះច្បាប់នេះ៕
© រក្សាសិទ្ធិដោយ thmeythmey.com