ជាតិ
នយោបាយជាតិ
ក្រសួងការបរទេសស្នើឲ្យវៀតណាមបញ្ឈប់គម្រោងសាងសង់ផ្លូវជាបន្ទាន់ក្រោយផ្ទុះហិង្សា
× ក្រសួងការបរទេសកម្ពុជា ចេញកំណត់ទូតថ្មីមួយទៀតនៅថ្ងៃពុធនេះ ផ្ញើទៅកាន់ស្ថានទូតវៀតណាម ដោយទាមទារឲ្យរដ្ឋាភិបាលវៀតណាមបញ្ឈប់ជាបន្ទាន់នូវការសាងសង់សំណងនៅតាមបន្ទាត់ព្រំដែន ដែលមិនទាន់បានកំណត់ នៅខេត្តស្វាយរៀង។កំណត់ទូតថ្មីរបស់ក្រសួងការបរទេសកម្ពុជានេះ ធ្វើឡើងក្រោយពីការប៉ះទង្គិចត្រង់ចំណុចភូមិគោកធ្លក ឃុំត្នោត ស្រុកកំពង់រោទិ៍ ខេត្តស្វាយរៀង កាលពីពេលថ្មីៗនេះ ។ ការប៉ះទង្គិចគ្នានោះត្រូវបានអ្នកនាំពាក្យក្រសួងការបរទេសវៀតណាមលោកLe Hai Binh ចោទថា បណ្ដាលមកពីជនជ្រុលនិយមមួយចំនួនល្មើសសន្ធិសញ្ញា អនុសញ្ញា និងកិច្ចព្រមព្រៀងរវាងប្រទេសវៀតណាម និងកម្ពុជា។
កំណត់ទូតថ្មីជាភាសារអង់គ្លេសរបស់ក្រសួងការបរទេសកម្ពុជា ចុះថ្ងៃទី០១ ខែកក្កដានេះ ឲ្យដឹងថា ភាគីវៀតណាមត្រូវបញ្ឈប់ជាបន្ទាន់រាល់គម្រោងស្ថាបនាផ្លូវ និងហេដ្ឋារចនាសម្ព័ន្ធនានា តាមបណ្តោយព្រំដែនកម្ពុជា-វៀតណាម ដោយរង់ចាំគណៈកម្មាធិការព្រំដែនរួមនៃប្រទេសទាំងពីរបញ្ចប់ការកំណត់ព្រំដែន តាមផែនទី១/១០០.០០។ ក្រសួងការបរទេសកម្ពុជាទាមទារឲ្យវៀតណាមផ្តល់ព័ត៌មានពីកន្លែង ដែលអាជ្ញាធរវៀតណាមគ្រោងស្ថាបនាផ្លូវ ហេដ្ឋារចនាសម្ព័ន្ធផ្សេងៗ ។ ជាពិសេសផែនទីនៃតំបន់ស្ថាបនាផ្លូវនៅតាមព្រំដែន ដែលគណៈកម្មាធិការព្រំដែនរួមនៃប្រទេសទាំងពីរបានឯកភាពក្នុងការដាំបង្គោលព្រំដែន ឬការសម្រេចដោះដូរដី ក្នុងក្របខណ្ឌនៃអនុស្សរណៈយោគយល់គ្នា(MOU)ឆ្នាំ២០១១ ។
ក្រសួងការបរទេសកម្ពុជាទាមទាឲ្យភាគីវៀតណាមបញ្ឈប់ជាបន្ទាន់នូវគម្រោងកសាងផ្លូវក្នុងតំបន់៣តាមបណ្តោយព្រំដែនក្នុងខេត្តស្វាយរៀង ដែលមិនទាន់ត្រូវបានកំណត់ព្រំដែន។ តំបន់ទាំងនោះរួមមាន កំណាត់ផ្លូវចន្លោះបង្គោលព្រំដែនលេខ១៩៤ និង២០៣ ប្រហែល២០ម៉ែត្រពីបន្ទាត់ព្រំដែន ក្នុងស្រុកចន្ទ្រា ខេត្តស្វាយរៀង។ កំណាត់ផ្លូវនៅចន្លោះបង្គោលព្រំដែនលេខ២១១ និង២១៣ ប្រហែល១០ម៉ែត្រពីបន្ទាត់ព្រំដែន ក្នុងស្រុកកំពង់រោទិ៍ ខេត្តស្វាយរៀង និងកំណាត់ផ្លូវនៅចន្លោះបង្គោលលេខ២១៣ និង២២៧ ប្រហែល៤៥ម៉ែត្រពីបន្ទាត់ព្រំដែនក្នុងស្រុកកំពង់រោទិ៍ ខេត្តស្វាយរៀង។
កំណត់ទូតថ្មីរបស់ក្រសួងការបរទេសកម្ពុជានេះ ធ្វើឡើងស្របពេលតំណាងរាស្ត្របក្សប្រឆាំងនិងអ្នកវិភាគ រិះគន់ក្រសួងការបរទេសថា មានភាពកម្សោយនិងផ្ដល់ភាពអាម៉ាសសម្រាប់កម្ពុជា ដែលមិនអើពើចំពោះការប៉ះទង្គិចគ្នា រវាងភាគីវៀតណាម និងកម្ពុជា នៅព្រំដែនខេត្តស្វាយរៀង ខណៈដែលក្រសួងការបរទេសវៀតណាមថ្កោលទោសភាគីកម្ពុជាកាលពីពេលថ្មីៗនេះ។
រយៈពេលចុងក្រោយនេះក្រសួងការបរទេសកម្ពុជាបានចេញកំណត់ទូតជាបន្តបន្ទាប់ ទៅកាន់រដ្ឋាភិបាលវៀតណាម ពីបញ្ហាព្រំដែន ប៉ុន្ដែរហូតមកដល់ពេលនេះមិនទាន់មានការឆ្លើយតបពីភាគីវៀតណាមមកកាន់រដ្ឋាភិបាលកម្ពុជាវិញនៅឡើយទេ។ កន្លងមកគណបក្សប្រឆាំង និងអ្នកវិភាគ ក៏ជំរុញឲ្យរដ្ឋាភិបាល ដាក់ពាក្យបណ្ដឹងទៅកាន់អង្គការសហប្រជាជាតិ និងតុលាការយុត្តិធម៌អន្តរជាតិ ICJ ដែរ ក្នុងករណីដែលភាគីវៀតណាមមិនឆ្លើយតបតាមកំណត់ទូត៕
© រក្សាសិទ្ធិដោយ thmeythmey.com