ជាតិ
នយោបាយជាតិ
លោក អ៊ុំ សំអាន ជាតំណាងរាស្ត្រទី ២ បន្ទាប់ពីលោក សុន ឆ័យ ដែលត្រូវលោក ឈាង វុន ដេញចេញពីសភា
×![]()
នៅថ្ងៃនេះ លោក ឈាង វុន បានបណ្តេញលោក អ៊ុំ សំអាន តំណាងរាស្ត្រគណបក្សសង្គ្រោះជាតិមិនឲ្យផ្តល់បទសម្ភាសន៍ដល់អ្នកកាសែតក្នុងបរិវេណវិមានរដ្ឋសភា។ ការបណ្តេញ លោក អ៊ុំ សំអាន ពីសំណាក់លោក ឈាង វុន នេះ បានធ្វើឡើងពីក្រោយកិច្ចប្រជុំគណៈកម្មការចំនួន ៣ នៅវិមានរដ្ឋសភាស្តីពីសេចក្តីព្រាងច្បាប់ សមាគម និងអង្គការក្រៅរដ្ឋាភិបាល។ លោក អ៊ុំ សំអាន ជាអ្នកតំណាងរាស្ត្រទី ២ ហើយ ដែលត្រូវលោក ឈាង វុន ដេញចេញពីវិមានរដ្ឋសភា បន្ទាប់ពីលោក សុន ឆ័យ។
បន្ទាប់ពីលោក សុន ឆ័យ លោក អ៊ុំ សំអាន គឺជាអ្នកតំណាងរាស្ត្រទី ២ ដែលត្រូវលោក ឈាង វុន បណ្តេញចេញពីបរិវេណរដ្ឋសភាមិនឲ្យផ្តល់បទសម្ភាសន៍ដល់អ្នកសារព័ត៌មាន។តាមពិតទៅ ដើមចម ដែលនាំឲ្យលោក ឈាង វុន ខឹង លោក អ៊ុំ សំអាន ហើយបណ្តេញអ្នកតំណាងរាស្ត្ររូបនេះចេញពីវិមានរដ្ឋសភានោះ ដោយសារលោក អ៊ុំ សំអាន ប្រុងផ្តល់បទសម្ភាន៍ដល់អ្នកសារព័ត៌មាន ក្រោយពីលោកចេញពីកិច្ចប្រជុំគណៈកម្មការរដ្ឋសភាចំនួន ៣ ស្តីពីសេចក្តីព្រាងច្បាប់ សមាគម និងអង្គការក្រៅរដ្ឋាភិបាល នៅថ្ងៃពុធនេះ។
តែលោក ឈាង វុន តំណាងរាស្ត្រគណបក្សប្រជាជនកម្ពុជា បានចេញមកបង្អាក់ ហើយបណ្តេញលោក អ៊ុំ សំអាន ព្រមទាំងហាមអ្នកកាសែតមិនឲ្យសម្ភាសន៍តំណាងរាស្ត្របក្សប្រឆាំងរូបនេះនៅក្នុងបរិវេណរដ្ឋសភា។ លោក ឈាង វុន និងលោក អ៊ុំ សំអាន បានប្រកែកគ្នាពីសិទ្ធិរៀងៗខ្លួន។ លោក ឈាង វុន បានប្រាប់ទៅលោក អ៊ុំ សំអាន ថា បើលោក ចង់និយាយប្រាប់អ្នកកាសែតនៅក្នុងរដ្ឋសភា ត្រូវសុំច្បាប់ពីប្រធានរដ្ឋសភាជាមុនសិន ហើយលោក ឈាង វុន ថែមទាំងអះអាងថា អ្នកដែលមានសិទ្ធិនិយាយមានតែរូបលោកដែលជាប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភាប៉ុណ្ណោះ។ «ខ្ញុំទទួលសិទ្ធិពីសម្តេចប្រធាន ខ្ញុំអាននិយាយបាន »។ នេះជាការបញ្ជាក់របស់លោក ឈាង វុន ។
ក៏ប៉ុន្តែលោក អ៊ុំ សំអាន ក៏បានប្រកែកតបទៅលោក ឈាង វុន វិញថា រូបលោកក៏មានសិទ្ធិនិយាយដែរ ព្រោះលោកជាតំណាងពលរដ្ឋដែលបោះឆ្នោតជូនលោកឲ្យកាន់តំណែងជាតំណាងរាស្ត្រ។ បើទោះបីជាប្រកែកជាមួយលោក ឈាង វុន យ៉ាងណាក្តី លោក អ៊ុំ សំអាន នៅតែមិនអាចផ្តល់បទសម្ភាសន៍ដល់អ្នកកាសែតបានដដែលពីព្រោះតែលោក ឈាង វុន ព្រមានហៅសន្តិសុខរដ្ឋសភា ឲ្យអូសអ្នកកាសែតចេញ បើនៅតែចចេសសម្ភាសន៍លោក អ៊ុំ សំអាន ទៀតនោះ។ មិនត្រឹមតែប៉ុណ្ណឹងទេ លោក ឈាង វុន បានប្រាប់សន្តិសុខថា ប្រសិនបើលោក អ៊ុំ សំអាន ផ្តល់បទសម្ភាសន៍ដល់អ្នកកាសែតនៅកន្លែងណាដែលលោកមិនបានឃើញនៅក្នុងបរិវេណរដ្ឋសភានោះ ត្រូវរាយការណ៍មកលោកជាបន្ទាន់។
សូមបញ្ជាក់ថា ករណីស្រដៀងគ្នានេះដែរ កាលពីថ្ងៃទី ១០ ខែ មិថុនា ឆ្នាំ ២០១៣ លោក ឈាង វុន ក៏ធ្លាប់បានបណ្តេញលោក សុន ឆ័យ តំណាងរាស្ត្រគណបក្សប្រឆាំងចេញពីវិមានរដ្ឋសភាមិនឲ្យផ្តល់បទសម្ភាសន៍ដល់អ្នកកាសែតផងដែរ បន្ទាប់ពីរូបលោកធ្វើសន្និសីទកាសែតស្តីពីការសម្រេចបង្កកប្រាក់ខែតំណាងរាស្ត្របក្សប្រឆាំងនៅពេលនោះ។ ហេតុផលរបស់លោក ឈាង វុន ពេលនោះ ដោយសារតំណាងរាស្ត្រគណបក្ស សម រង្ស៊ី ពោលគឺ លោក សុន ឆ័យ ត្រូវបានគណៈកម្មាធិការអចិន្រ្តៃយ៍រដ្ឋសភាលុបសុពលភាពជាតំណាងរាស្ត្រចោល៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
