សេដ្ឋកិច្ចអន្តរជាតិ
អន្តរជាតិ
នយោបាយអន្តរជាតិ
ថៃ៖ ឧស្សាហកម្មផ្លូវភេទប្រើមនុស្ស២.៨លាននាក់និងរកចំណូលជាង៦ពាន់លានដុល្លាររាល់ឆ្នាំ
×
របររកស៊ីផ្លូវភេទនៅក្នុងប្រទេសថៃត្រូវបានគេហៅថាជាឧស្សាកម្មទៅហើយ ព្រោះរបររកស៊ីនេះជាអាចទាញចំណូលពីអ្នកទេសចរបានជាង៦ពាន់លានដុល្លាររាល់ឆ្នាំ។ បើទោះជាមិនមានការទទួលស្គាល់ថា អាជីវកម្មផ្លូវភេទស្របច្បាប់ក្តី យោងតាមរបាយការស្រាវជ្រាវប្រជាជនថៃ២.៨លាននាក់កំពុងបម្រើសេវាកម្មផ្លូវភេទរួចទៅហើយ។ យ៉ាងណាមិញ រដ្ឋាភិបាលសឹកនិងប្រជាជនថៃមួយចំនួនចង់ដោះស្រាយបញ្ហារកស៊ីផ្លូវភេទដែលធ្វើឲ្យអាប់អោនកិត្តិយសរាជាណាចក្រថៃផង។
លោក មុំ ពិទូរ្យ លម្ងិតព័ត៌មាននេះ
របរររកស៊ីជួញដូរផ្លូវភេទ ក្លាយជារឿងសាមញ្ញហើយនៅក្នុងប្រទេសថៃ ដោយគេចាត់ទុកវាជាឧស្សាហកម្មដែលទាញចំណូលបានយ៉ាងច្រើនសន្ធឹកសន្ធាប់សម្រាប់សេដ្ឋកិច្ចថៃរៀងរាល់ឆ្នាំ។ អាចនិយាយបានថាទីផ្សារផ្លូវភេទរបស់ថៃជាប្រភពចម្បងនៃសេដ្ឋកិច្ចរបស់ប្រទេសនេះ។
បើយោងតាម AsianCorrespondent ឧស្សាកម្មផ្លូវភេទថៃ អាចទាញចំណូលពីអ្នកទេសចរបរទេសបានរហូតដល់៦.៤ពាន់លានដុល្លារអាមេរិករៀងរាល់ឆ្នាំ ហើយអ្នកដែលកំពុងប្រកបរបរនេះមានរហូតដល់២.៨លាននាក់ឯណោះ។ បើតាមអ្នកស្រាវជ្រាវ អ្នកសុខចិត្តប្តូរខ្លួនដើម្បីប្រកបរបរដែលសង្គមមិនស្វាគមន៍នេះ ក៏ដោយសារតែប្រឈមបញ្ហាសេដ្ឋកិច្ច និងដោយសារគ្មានចំណេះដឹងដែរ។
គេមិនអាចប្រកែកបានឡើយ ដែលថា ទេសចរណ៍ផ្លូវភេទបានដើរតួនាទីសំខាន់ក្នុងការរកចំណូលជួយជាតិ និងសង្គមថៃហាក់បើកទូលាយបន្តិចមែន ប៉ុន្តែឧស្សាហកម្មផ្លូវភេទមិនទាន់ត្រូវរដ្ឋាភិបាលសម្រេចទទួលស្គាល់ថាជារបររកស៊ីស្របច្បាប់ឡើយ។ បនស្រី រង្គសាលឬក្លឹបដែលផ្តល់សេវាផ្លូវភេទនៅបន្តរកស៊ីជាសម្ងាត់ និងចំហរខ្លះអាស្រ័យតាមស្ថានភាព ប៉ុន្តែសម្រាប់អ្នកដែលរកស៊ីរបរនេះនៅលាក់កំបាំងអត្តសញ្ញាណខ្លួននៅឡើយ។ នេះបង្ហាញយ៉ាងច្បាស់ថា ប្រជាជននៅមិនទាន់មានគំនិតចង់ទទួលស្គាល់ការបង្កើតឲ្យមានឧស្សាកម្មផ្លូវភេទស្របច្បាប់នៅក្នុងរាជាណាចក្រថៃនៅឡើយទេ។
ប្រជាជនថៃមួយចំនួនចង់ឲ្យមានការបង្ក្រាបរបររកស៊ីនេះ ដោយពួកគេបារម្ភពីផលប៉ះពាល់ដែលកើតមានចំពោះប្រពៃណី និងវប្បធម៌ដ៏ផូរផង់របស់ថៃ ដែលថៃជាប្រទេសគោរពប្រតិបត្តិសាសនាព្រះពុទ្ធ មានសីលធម៌ និងវិន័យល្អប្រសើរផង។ តែសម្រាប់ប្រជាជនថៃខ្លះ មើលឃើញថា ឧស្សាហកម្មនេះនាំចំណូលច្រើនសន្ធឹកជួយទ្រទ្រង់សេដ្ឋកិច្ចថៃផងដែរ ដែលបញ្ជាក់ថាការបង្ក្រាបអ្នកប្រកបរបររកស៊ីផ្លូវភេទនឹងប៉ះពាល់ដល់សេដ្ឋកិច្ចចៀសមិនរួច។
ជុំវិញការខ្វែងគំនិតនេះ របបសឹកថៃ ក្រោមការដឹកនាំរបស់ឧត្តមសេនីយ៍ ប្រាយុទ្ធ ចាន់អូចា ធ្លាប់ប្រកាសថាចង់រៀបចំដោះស្រាយបញ្ហាសីលធម៌ក្នុងសង្គមថៃបច្ចុប្បន្នផងដែរ ដូចជាដោះស្រាយបញ្ហាទេសចរណ៍ផ្លូវភេទអាណាធិតេយ្យជាដើម។ ប៉ុន្តែដូចឃើញស្រាប់ហើយ បើដោះស្រាយបញ្ហានេះ រដ្ឋាភិបាលត្រូវត្រៀមខ្លួនដោះស្រាយបញ្ហាផ្សេងទៀតដូចជាការបាត់បង់ចំណូលជាតិប្រចាំឆ្នាំច្រើនសន្ធឹក។ យ៉ាងណាមិញ អ្វីដែលរដ្ឋាភិបាលត្រូវផ្តោតការចាប់អារម្មណ៍គឺភាពក្រីក្រ និងកង្វះខាតចំណេះដឹង ដែលវានៅតែជាឬសគល់នៃការលះបង់ខ្លួនប្រាណដើម្បីប្រកបរបររកស៊ីផ្លូវភេទនេះ។ ម្យ៉ាងទៀតសង្គមថៃទាំងមូលប្រហែលជាត្រូវផ្លាស់ប្តូរផ្នត់គំនិតដោយបើកទូលាយទទួលយកអ្វីដែលកើតមានយូរអង្វែងរួចទៅហើយក្នុងសង្គមរបស់ខ្លួន៕
© រក្សាសិទ្ធិដោយ thmeythmey.com