អន្តរជាតិ
នយោបាយអន្តរជាតិ
លោកអូបាម៉ាទទួលជួបអគ្គលេខាបក្សកុម្មុយនិស្តវៀតណាមសប្តាហ៍ក្រោយ
×
នៅថ្ងៃអង្គារ ដើមសប្តាហ៍ក្រោយនេះ សេតវិមាននឹងរៀបចំជំនួបរវាងប្រធានាធិបតីអូបាម៉ា ជាមួយលោក Nguyen Phu Trong ជាអគ្គលេខាធិការបក្សកម្មុយនិស្តវៀតណាម។ នេះជាជំនួបធំលើកទី១ គិតក្នុង២០ឆ្នាំមកនេះ ក្រោយពេលអាមេរិកនិងវៀតណាមបានរៀបចំទំនាក់ទំនងការទូតនឹងគ្នាឡើងវិញ។ បុរសខ្លាំងទាំង២នឹងជជែកគ្នាពីប្រធានបទស្តីពីកិច្ចព្រមព្រៀងផ្តោះប្តូរពាណិជ្ជកម្មសេរីនៅអាស៊ីប៉ាស៊ីហ្វិក បញ្ហាសិទ្ធិមនុស្ស និងកិច្ចសហប្រតិបត្តិការយោធា។
ថ្ងៃអង្គារសប្តាហ៍ក្រោយនេះ លោកអូបាម៉ា និងលោកNguyen Phu Trong នឹងពិភាក្សាគ្នាពីទណ្ឌកម្មទាក់ទងនឹងអាវុធយុទ្ធភណ្ឌ។ កាលពីខែតុលាឆ្នាំមុន អាមេរិកបានលើកលែងទណ្ឌកម្មអាវុធអោយវៀតណាមមួយចំណែក ដោយបានលក់ចេញនូវអាវុធមួយចំនួន ដូចជាកប៉ាល់ល្បាតកងទ័ព ទៅអោយរដ្ឋាភិបាលក្រុងហាណូយ។
ការសហការគ្នាលើវិស័យយោធានេះ សបង្ហាញថា វៀតណាមត្រូវការអាមេរិកជាខ្លាំង ប្រឈមនឹងចិន ប្រឈមនឹងជម្លោះដែនទឹកនៅសមុទ្រចិន។ អាមេរិកវិញក៏ត្រូវការវៀតណាម សម្រាប់យុទ្ធសាស្ត្រនយោបាយខ្លួននៅអាស៊ី ប្រឈមនឹងចិនផងដែរ។
ថ្ងៃអង្គារសប្តាហ៍ក្រោយនេះ លោកអូបាម៉ាក៏នឹងលើកជជែកពីបញ្ហាសិទ្ធិមនុស្សវៀតណាមជាមួយលោកNguyen Phu Trongអគ្គលេខាធិការបក្សកុម្មុយនិស្តដែរ។ ចំនួនអ្នកទោសនយោបាយនៅវៀតណាមមានការធ្លាក់ចុះ តែអាមេរិកនឹងនៅតែបន្តលើកយកបញ្ហានេះមកពិភាក្សាជាមួយថ្នាក់ដឹកនាំវៀតណាមដដែល។ យោងតាមមន្ត្រីជាន់ខ្ពស់អាមេរិក នេះជាប្រធានបទអចិន្ត្រៃយ៍ដែលអាមេរិកយកចិត្តទុកដាក់៕
© រក្សាសិទ្ធិដោយ thmeythmey.com