នយោបាយជាតិ
នយោបាយអន្តរជាតិ
×![]()
កាលពីប៉ុន្មានថ្ងៃកន្លងទៅនេះ សភាកូវ៉ែត បានអនុម័តច្បាប់ថ្មីមួយ ដើម្បីចងក្រងទិន្នន័យ DNA របស់ប្រជាជនទាំងអស់ជាង៤លាននាក់ ដើម្បីជាយុទ្ធសាស្ត្រថ្មីទប់ស្កាត់អំពើភេវរកម្ម និង ងាយស្រួលកំណត់មុខសញ្ញានៅពេលដែលមានបទល្មើសកើតឡើង។ ច្បាប់ថ្មីនេះ ត្រូវបានធ្វើឡើង ក្រោយពីមានការបំផ្ទុះគ្រាប់បែកអត្តឃាត សម្លាប់ប្រជាជនរហូតដល់២៦នាក់ និង របួសជាច្រើនរយនាក់ កាលពីសប្តាហ៍មុននេះ។
លោក ជាវ សំណាង លម្អិតព័ត៌មាននេះ
ច្បាប់ថ្មី ដែលទើបតែត្រូវបានអនុម័តជាបន្ទាន់នេះ បានកំណត់ឲ្យក្រសួងមហាផ្ទៃប្រមូលទិន្នន័យនៃការពិនិត្យDNA ប្រជាជនកូវ៉ែតរហូតដល់ ១.៣លាននាក់ និងជនបរទេសស្នាក់នៅកូវ៉ែតរហូតដល់២.៩លាននាក់។ ជុំវិញនីតិវិធីប្រមូលរបាយការណ៍ DNAនេះ ប្រសិនមានប្រជាជនណាម្នាក់បដិសេធផ្តល់ទិន្នន័យ ពួកគេត្រូវប្រឈមមុខការដាក់ពន្ធនាគាររយៈពេលមួយឆ្នាំ ព្រមទាំងរងការដាក់ពិន័យចាប់ពី ៣៣០០០ ដុល្លារអាមេរិកឡើងទៅ។ ដោយឡែកសម្រាប់អ្នកដែលផ្តល់ទិន្នន័យខុសវិញនោះ នឹងត្រូវប្រឈមការកាត់ទោសដាក់ពន្ធនាគាររយៈពេលប្រាំពីរឆ្នាំផងដែរ។
បើតាមការប៉ាន់ស្មាន ការចំណាយនានាដើម្បីអនុវត្តច្បាប់នេះអាចកើនដល់ ៤០០លានដុល្លាររដ្ឋអាមេរិក។ ទាក់ទិននឹងបញ្ហានេះ លោក Jamal al-Omar សមាជិកសភាកូវ៉ែត បានបញ្ជាក់ថា សភាបានអនុវត្តច្បាប់ DNA និង កំណត់ថវិការួចរាល់ហើយ។ ហើយសភា ក៏បានត្រៀមខ្លួនរួចជាស្រេចដែរ ក្នុងការអនុម័តលិខិតបទដ្ឋាននានាដែលជាតម្រូវការផ្សេងៗទៀត ក្នុងការធានាឲ្យបានស្ថិរភាពនិង សន្តិសុខនៅក្នុងប្រទេស។
រដ្ឋមន្ត្រីក្រសួងមហាផ្ទៃ បានអះអាងថា អាជ្ញាធរបានព្យាយាមប្រើប្រាស់ គ្រប់វិធីសាស្ត្រដើម្បីលើកម្ពស់ការការពារសន្តិសុខ ជាពិសេសនៅជុំវិញបរិវេណវិហារឥស្លាម ព្រោះវាជាមុខសញ្ញាដ៏សំខាន់របស់ក្រុមភេរវជន។
គួររំលឹកបន្តិចដែរថា នៅក្នុងរយៈពេលប៉ុន្មានខែចុងក្រោយនេះ អំពើភេវកម្មបង្កដោយក្រុមរដ្ឋឥស្លាមជ្រុលនិយម ចាប់ផ្តើមផ្ទុះឡើងសារថ្មីព្រមៗគ្នាតែម្តង។ ជាក់ស្តែងកាលពីសបា្តហ៍មុន មានករណីសម្លាប់ជនស្លូតត្រង់ នៅក្នុងប្រទេសកូវ៉ែត បារាំង និងទុយនេស៊ី ដែលក្នុងនោះក្រុមភេរវជនរដ្ឋឥស្លាមក៏បានប្រកាសថាខ្លួនថាបានបង្កផងដែរ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
7 ម៉ោង
