ជាតិ
នយោបាយជាតិ
លោក ហ៊ុន សែន ខ្ចីផែនទីកម្ពុជានៅ UN ពីលោក បាន គីមូន ដើម្បីបញ្ជាក់ពីភាពស្អាតស្អំ
×![]()
ដោយ: ថ្មីៗ
ប្រមុខរដ្ឋាភិបាលកម្ពុជា លោក ហ៊ុន សែន បានសរសេរលិខិតទៅលោកអគ្គលេខាធិការអង្គការសហប្រជាជាតិ បាន គីមូន ដើម្បីខ្ចីផែនទីទាំងអស់របស់កម្ពុជា ដែលបានតម្កល់នៅអង្គការសហប្រជាជាតិ យកមកផ្ទៀងផ្ទាត់ជាមួយផែនទីរបស់រដ្ឋាភិបាលដែលកំពុងប្រើប្រាស់បច្ចុប្បន្ន ដើម្បីបញ្ជាក់ពីភាពត្រឹមត្រូវរបស់ខ្លួន។ សំណើរបស់លោក ហ៊ុន សែន ទៅលោក បាន គីមូន នេះ ធ្វើឡើង បន្ទាប់ពីគណបក្សប្រឆាំងចោទរដ្ឋាភិបាលថា ប្រើប្រាស់ផែនទីក្លែងក្លាយ។ 
ទំនងជាទ្រាំមិនបាននឹងការចោទប្រកាន់របស់តំណាងរាស្ត្រគណបក្សសង្គ្រោះជាតិម្តងហើយម្តងទៀត ដែលថា រដ្ឋាភិបាលប្រើផែនទីក្លែងក្លាយនោះ លោកនាយករដ្ឋមន្ត្រី ហ៊ុន សែន បានស្នើសុំខ្ចីផែនទីពីលោកអគ្គលេខាធិការអង្គការសហប្រជាតិ ។ លិខិតលោក ហ៊ុន សែន ផ្ញើជូនលោក បាន គីមូន បញ្ជាក់យ៉ាងនេះថា៖ « ខ្ញុំសរសេរលិខិតនេះ ជូនឯកឧត្តម ដើម្បីស្នើសុំកិច្ចសហការពីសំណាក់អង្គការសហប្រជាជាតិលើកិច្ចការមួយដ៏មានសារៈសំខាន់ជាទីបំផុត សម្រាប់អធិបតេយ្យ និងបូរណភាពទឹកដីរបស់ព្រះរាជាណាចក្រកម្ពុជា ដែលជាសមាជិកអង្គការសហប្រជាជាតិ។
លោកនាយករដ្ឋមន្ត្រី ហ៊ុន សែន បានបញ្ជាក់បន្ថែមថា ការស្នើសុំខ្ចីផែនទីទាំងនោះ គឺក្នុងគោលបំណងបញ្ជាក់ពីភាពត្រឹមត្រូវរបស់រដ្ឋាភិបាលកម្ពុជា នៅក្នុងការរៀបចំនិងអនុវត្តការងាររបស់ខ្លួនក្នុងការកំណត់ និងការបោះបង្គោលព្រំដែនរវាងប្រទេសកម្ពុជា និងប្រទេសជិតខាង ដើម្បីបញ្ចៀសនិងបញ្ចប់នូវការញុះញង់បង្កើតស្មារតីជាតិនិយមជ្រុល ជាពិសេសធ្វើឲ្យមានការភាន់ច្រឡំនៅក្នុងសាធារណៈមតិជាតិ និងអន្តរជាតិ ដើម្បីកេងចំណេញខាងនយោបាយ ដោយមជ្ឈដ្ឋានមួយចំនួននៅក្នុងប្រទេសកម្ពុជា ដែលអាចបង្កើតជាគ្រោះមហន្តរាយដ៏ធំធេងដល់ជាតិកម្ពុជាទាំងមូល ។
លិខិតដែលប្រមុខរដ្ឋាភិបាលកម្ពុជា បានសរសេរទៅកាន់លោក បាន គីមូន អគ្គលេខាធិការនៃអង្គការសហប្រជាជាតិ ចុះថ្ងៃទី ០៦ ខែកក្កដា បញ្ជាក់យ៉ាងដូច្នេះថា៖«ខ្ញុំសូមស្នើឯកឧត្តមអគ្គលេខាធិការនៃអង្គការសហប្រជាជាតិមេត្តាអនុញ្ញាតឲ្យរាជរដ្ឋាភិបាលកម្ពុជា ខ្ចីផែនទីទាំងអស់ដែលកម្ពុជាបានតម្កល់ទុកនៅអង្គការសហប្រជាជាតិ មកប្រើប្រាស់ដើម្បីផ្ទៀងផ្ទាត់បញ្ជាក់ពីភាពត្រឹមត្រូវពិតប្រាកដជាមួយនឹងផែនទីដែលរាជរដ្ឋាភិបាលកម្ពុជា បាននិងកំពុងប្រើប្រាស់សម្រាប់កំណត់ព្រំដែនគោគ និងព្រំដែនទឹករវាងព្រះរាជាណាចក្រកម្ពុជាជាមួយប្រទេសជិតខាង»។
លោក ហ៊ុន សែន ក៏បានរម្លឹកផងដែរពីសកម្មភាពរបស់ព្រះបរមរតនកោដ្ឋថា ៖« នៅឆ្នាំ ១៩៦៤ សម្តេចព្រះ នរោត្តម សីហនុ អតីតព្រះប្រមុខរដ្ឋកម្ពុជា បានយកផែនទី បោន ខ្នាត ១/១០០.០០០ បោះពុម្ពដោយក្រុមប្រវត្តិសាស្ត្រឥណ្ឌូចិន ទៅតម្កល់នៅអង្គការសហប្រជាជាតិ ហើយតាមរយៈនេះ ព្រះអង្គបានអំពាវនាវឲ្យមានការធានារ៉ាប់រងពីសំណាក់មហាអំណាចនានា ក្នុងការគោរពបូរណភាពទឹកដីកម្ពុជា តាមផ្លូវច្បាប់អន្តរជាតិ និងឲ្យទទួលស្គាល់ ព្រមទាំងគោរពឯករាជ្យ អព្យាក្រឹត្យ បូរណភាពទឹកដីកម្ពុជា ក្នុងរង្វង់ព្រំដែនបច្ចុប្បន្នពេលនោះ ដោយបានប្រកាសដាចខាតថា ខ្សែព្រំដែននេះ មិនអាចសើរើ និងកែប្រែបានឡើយ» ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
8 ម៉ោង
