ជាតិ
សង្គមជាតិ
បុរសចិន២នាក់ដែលបង្ហោះយន្តហោះកាមេរ៉ាលើព្រះរាជវាំងត្រូវបានដោះលែង
×
ប៉ូលីសបានសម្រេចដោះលែងបុរសទេសចរជនជាតិចិន២នាក់ឲ្យមានសេរីភាពវិញកាលពីថ្ងៃអាទិត្យ បន្ទាប់ពីពួកគេត្រូវបានឃាត់ខ្លួននៅព្រលប់ថ្ងៃសៅរ៍ ខណៈដែលពួកគេកំពុងបង្ហោះយន្តហោះបំពាក់កាមេរ៉ា (Drone) ពីលើព្រះបរមរាជវាំង។
ទីភ្នាក់ងារចិនស៊ីនហួរ បានស្រង់ប្រសាសន៍លោកឧត្តមសេនីយ៍ ឆាយ ស៊ីណារិទ្ធ ដែលជាប្រធាននាយកដ្ឋានសន្តិសុខផ្ទៃក្នុងនៃក្រសួងមហាផ្ទៃ ហើយដែលបានថ្លែងប្រាប់ស៊ីនហួរថា ប៉ូលីសបានសម្រេចដោះលែងបុរសជនជាតិចិនទាំងពីរកាលពីរសៀលថ្ងៃអាទិត្យ ក្រោយពីបានសួរចម្លើយ និងបានសន្និដ្ឋានថាពួកគេពិតជាមិនមានបំណងអាក្រក់មួយនោះឡើយ។
ទីភ្នាក់ព័ត៌មានស៊ីនហួរបានសរសេរបន្ថែមថា ទេសចរជនជាតិចិនទាំងពីរដែលបានមកដល់កម្ពុជាកាលពីចុងខែមិថុនា ហើយក៏បានចាកចេញពីកម្ពុជាវិញកាលពីយប់ថ្ងៃអាទិត្យក្រោយការដោះលែងនោះទៅ។
ដោយសារបញ្ហាសន្តិសុខ និងការគោរពជីវិតឯកជន អាជ្ញាធរកម្ពុជាបានចេញសារាចរប្រាមការបង្ហោះយន្តហោះបំពាក់កាមេរ៉ាដោយគ្មានការអនុញាតនៅក្នុងរាជធានី។
កាលពីថ្ងៃទី២៣មិថុនា បុរសជនជាតិបារាំង និងអាមេរិក២នាក់ ដែលជាអ្នកថតភាពយន្តឯកសារក៍ត្រូវបានឃាត់ខ្លួនដូចគ្នាដែរ នៅពេលដែលពួកគេកំពុងបង្ហោះយន្តហោះDrone នៅក្បែរវិមានឯករាជ្យ ជិតគេហដ្ឋានរបស់លោកនាយករដ្ឋមន្ត្រី៕
© រក្សាសិទ្ធិដោយ thmeythmey.com