កីឡាអន្តរជាតិ
អន្តរជាតិ
ក្នុងបីប្រកួត U-23 ម៉ាយក្រូនេស៊ី ត្រូវគេទាត់ចូលទី១១៤គ្រាប់ដោយគ្មានការតបត
× ក្រុមកីឡាបាល់ទាត់ជម្រើសជាតិអាយុក្រោម២៣ឆ្នាំ ម៉ាយក្រូនេស៊ី (Micronesia) បានទទួលបរាជ័យដ៏អាក្រក់បំផុតក្នុងព្រឹត្តិការណ៍ Pacific Games និងការប្រកួតជម្រុះអូឡាំពិក នៅកីឡដ្ឋាន Bisini Sports Complex ក្នុងទីក្រុង Port Moresby ប្រទេសបាពួញូវហ្គីណេ។ ក្រោមការរៀបចំរបស់សហព័ន្ធកីឡាបាល់ទាត់ទ្វីបអូសេអានី (OFC) ក្រុមមកពីប្រទេសដែនកោះនៃអនុតំបន់អូសេអានី នៅភាគខាងលិចមហាសមុទ្រប៉ាស៊ីហ្វិក មួយនេះ បានរងបរាជ័យទាំងបីប្រកួតនៅក្នុងពូលរបស់ខ្លួន ជាមួយនឹងការធ្លាយសំណាញ់ទីសរុប១១៤គ្រាប់ និងគ្មានការតបតទៅលើគូប្រកួត។
ក្រុម U-23 ម៉ាយក្រូនេស៊ី ដែលស្ថិតក្រោមការដឹកនាំបង្វឹករបស់លោក Stanley Foster ជនជាតិអូស្ត្រាលី បានប្រកួតបើកឆាកក្នុងពូល A ដោយចាញ់ តាហ៊ីទី ៣០-០ កាលពីថ្ងៃទី៣ ខែកក្កដា ហើយពីរថ្ងៃបន្ទាប់មកទៀត បានចាញ់ ហ្វីជី ៣៨-០ ។ សម្រាប់ការប្រកួតចុងក្រោយនៅថ្ងៃទី៧ ខែកក្កដា នេះ ក្រុមដែលមិនមែនជាសមាជិករបស់ FIFA មួយនេះ បានចាញ់ ជម្រើសជាតិ Vanuatu ៤៦-០ បន្ថែមទៀត។
សម្រាប់ព្រឹត្តិការណ៍ប្រកួត Pacific Games នេះ ក្រៅពីជំនួបជាមួយម៉ាយក្រូនេស៊ី ការប្រកួតផ្សេងទៀតសុទ្ធតែមានភាពតឹងតែង ដោយគូខ្លះបញ្ចប់ការប្រកួតដោយគ្មានការស៊ុតបាល់បញ្ចូលទី ហើយលទ្ធផលដែលខ្ពស់បំផុតនោះ គឺជ័យជម្នះ ៥-០ របស់នូវែល សេឡង់ លើនូវេល កាឡេដូនី៕
© រក្សាសិទ្ធិដោយ thmeythmey.com