ព្រះមហាក្សត្របានយាងដឹកនាំព្រះរាជពិធីដាំកូនឈើ៣ម៉ឺនដើមនៅកំពង់ធំ

ជាតិ

សង្គមជាតិ

ព្រះមហាក្សត្របានយាងដឹកនាំព្រះរាជពិធីដាំកូនឈើ៣ម៉ឺនដើមនៅកំពង់ធំ

09, Jul 2015 , 5:23 pm

រូបភាព

ដោយ:

កំពង់ធំ៖ ព្រះមហាក្សត្របានយាងជាព្រះរាជាធិបតី នាព្រឹកថ្ងៃទី០៩កក្កដានេះ ក្នុងព្រះរាជពិធីរុក្ខទិវានៅភូមិថ្មសំលៀង ឃុំក្រយា ស្រុកសន្ទុក ខេត្តកំពង់ធំ។ មនុស្សជាង៥ម៉ឺននាក់បានចូលរួមក្នុងព្រះរាជពិធីនោះដាំដើមឈើនោះ។នៅក្នុងព្រះរាជពិធីនោះ កូនឈើ៣ម៉ឺនដើម ដែលរួមមាន ក្រញូង កកោះ និងធ្នង់ ត្រូវបានគេដាំលើផ្ទៃដីសរុប១០ហិចតា។

នាឱកាសប្រារព្ធព្រះរាជពិធីរុក្ខទិវានោះ ព្រះករុណា ព្រះបាទសម្តេចព្រះបរមនាថ នរោត្តម សីហមុនីបានមានព្រះរាជបន្ទូលថា «បើបងប្អូនជនរួមជាតិដាំដើមឈើឱ្យបានម្នាក់មួយដើមក្នុងមួយឆ្នាំ យើងនឹងមានកូនឈើថ្មីចំនួនច្រើនលានដើម ដែលអាចដុះលូតលាស់និងផ្តល់អត្ថប្រយោជន៍យ៉ាងច្រើនទៅថ្ងៃអនាគត»។

លោក អ៊ុត សំអន អភិបាលខេត្តកំពង់ធំ បានសំដែងការអបអរសាទរយ៉ាងជ្រាលជ្រៅចំពោះការអំពាវនាវរបស់អង្គព្រះមហាក្សត្រទៅដល់ប្រជារាស្ត្រអំពីការដាំដើមឈើ។ លោកអភិបាលខេត្តបានថ្លែងបន្ថែមថា តាមរយៈគោលនយោបាយឈ្នះៗរបស់រដ្ឋាភិបាល សេដ្ឋកិច្ច និងការប្រកបមុខរបររបស់ប្រជាពលរដ្ឋមានការអភិវឌ្ឍទៅមុខ។ បើតាមការបញ្ជាក់របស់លោកអភិបាលខេត្តដដែល ផ្ទៃដីធ្វើស្រែសរុប ២៥៧ ៦១៣ ហិចតាក្នុងខេត្តកំពង់ធំ បានផ្តល់ទិន្នផលសរុបជាមធ្យម៦៥ម៉ឺនតោនក្នុងមួយឆ្នាំៗ ។ រីឯវិស័យព្រៃឈើវិញ ខេត្តកំពង់ធំ គ្រប់ដណ្តប់លើផ្ទៃដីសរុប ៦៤០ ២០៩ហិចតារដែលស្មើនឹង៥១,៥%នៃផ្ទៃដីសរុប។

លោកអភិបាលខេត្តរូបនេះក៏បានថ្លែងបន្តថា ខេត្តកំពង់ធំមានភ័ព្វសំណាងដែលបានទទួលព្រះរាជអំណោយតាមរយៈកិច្ចការសង្គមកិច្ចដែលជាការប្រទានផ្ទាល់របស់ព្រះករុណានូវផ្ទះចំនួន១៨ខ្នងជូនដល់ប្រជារាស្ត្រក្រីក្ររបស់ព្រះអង្គនៅឃុំបារាយណ៍ ឃុំជ្រលង ព្រមទាំងផ្លូវលំមួយខ្សែប្រវែង៨,៥គីឡូម៉ែត្រ នៅឃុំចើងដើង។ ពិសេសជាងនេះទៅទៀត ខេត្តកំពង់ធំទទួលបានកិត្តិយសពីការយាងចុះសួរសុខទុក្ខដល់ប្រជាជនក្រីក្រចំនួន០៨លើករួចមកហើយពីព្រះមហាក្សត្រ។