ជាតិ
សង្គមជាតិ
ករណីគ្រោះថ្នាក់ចរាចរណ៍នៅបាវិត៖ តុលាការមិនទាន់ដោះស្រាយសំណងរដ្ឋប្បវេណីនៅឡើយ
× ភ្នំពេញ៖ នៅថ្ងៃទី៩ កក្កដានេះ ភាគីគ្រួសារជនរងគ្រោះប្រមាណ២០នាក់ ក្នុងគ្រោះថ្នាក់ចរាចរណ៏នៅខេត្តស្វាយរៀង បានតវ៉ានៅមុខតុលាការខេត្ត ដើម្បីទាមទារឲ្យតុលាការពន្លឿននីតិវិធីក្នុងសំណុំរឿងនេះ ពិសេសគឺទាមទារសំណងរដ្ឋប្បវេណី។ រយៈពេលជាង ២ខែហើយ ដែលសំណុំរឿងគ្រោះថ្នាក់ចរាចរណ៍ដ៏រន្ធត់ ដែលបានបណ្តាលឲ្យកម្មករកម្មការិនីនៅក្រុងបាវិតជាង ២០នាក់បានបាត់ជីវិតនោះ នៅមិនទាន់ដោះស្រាយរួច។
គ្រួសារភាគីជនរងគ្រោះ ក្នុងករណីគ្រោះថ្នាក់ចរាចរណ៍ដ៏រន្ធត់នោះ បានចេញមុខតវ៉ាទាមទារសំណងរដ្ឋប្បវេណី ហើយពួកគេអះអាងថា តុលាការខេត្តស្វាយរៀងពុំបានផ្តល់ព័ត៌មានជាក់លាក់ពីដំណោះស្រាយក្នុងសំណុំរឿងនេះទេ។
តំណាងភាគីរងគ្រោះក្នុងឃុំពោធិ៍រាជ ស្រុកស្វាយជ្រំ ខេត្តស្វាយរៀង លោក មាស សីហា ចាត់ទុកនីតិវិធីរបស់តុលាការខេត្តស្វាយរៀងថា មានលក្ខណៈយឺតយ៉ាវ ដែលពួកគេមិនអាចទទួលយកបាន។ លោកប្រាប់ថា មកទល់ពេលនេះ តុលាការមិនបានផ្តល់ដំណឹងពីការដោះស្រាយសំណងទេ បើទោះបីជា ភាគីគ្រួសារជនរងគ្រោះទាំងអស់ បានដាក់ពាក្យបណ្តឹងរួចក៏ដោយ។ «យើងបានដាក់ពាក្យបណ្តឹងជាងពីរខែហើយ តែយើងមិនទាន់ទទួលដំណោះស្រាយ ពីខាងតុលាការទេ ហើយពួកគេតែងសន្យាថា ដោះស្រាយថ្ងៃនេះ ថ្ងៃនោះ តែលទ្ធផលស្ងាត់ តែម្តង»។ នេះជាការបញ្ជាក់របស់លោក មាស សីហា។
លោកបន្ថែមថា ប្រសិនបើតុលាការមិនពន្លឿននីតិវិធីដោះស្រាយទេនោះ ពួកគេនឹងបន្តទាមទារនៅសបា្តហ៍ក្រោយទៀតដែរ។ បើតាមលោក មាស សីហា ភាគីគ្រួសារអ្នករងរបួសក្នុងករណីនេះ បានប្តឹងទាមទារសំណងរដ្ឋប្បវេណីមួយនាក់ៗ ១ម៉ឺនដុល្លារអាមេរិក រីឯភាគីគ្រួសារអ្នកបាត់បង់ជីវិតទាមទារ ២ម៉ឺនដុល្លារអាមេរិកក្នុងមួយនាក់ៗ ភាគីក្រុមហ៊ុនរថយន្តក្រុង។
គួររម្លឹកថា ករណីគ្រោះថ្នាក់ចរាចរណ៍ដ៏សោកសង្វេគរវាងរថយន្តក្រុងរបស់ក្រុមហ៊ុនឯកជនជាមួយនឹងរថយន្តទួលរីស ១៥កៅអីដែលដឹកកម្មករកម្មការិនីរោងចក្រនេះ បានកើតឡើង កាលពីព្រឹកថ្ងៃទី១៩ ខែឧសភា ឆ្នាំ២០១។ អ្នកបើកបរជនជាតិវៀតណាម លោក Le vanghing អាយុ ៤៣ ឆ្នាំបានបើកបររថយន្ដក្រុងពីទីក្រុងហូជីមិញមករាជធានីភ្នំពេញ ព្យាយាមបើកវ៉ារថយន្តមួយគ្រឿងក្នុងល្បឿនលឿន រួចក៏ជ្រុលទៅបុករថយន្តដឹកកម្មកររោងចក្រ។ ចំណោមកម្មកទាំងអស់ចំនួន ៣៨នាក់ យ៉ាងហោចណាស់កម្មករ១៦នាក់បានស្លាប់ភ្លាមៗ និងជាង ២០នាក់ផ្សេងទៀតរងរបួសធ្ងន់ស្រាលនៅក្នុងគ្រោះថ្នាក់ចរាចរណ៍ដ៏រន្ធត់ មួយដែលមិនដែលធ្លាប់មាននៅក្នុងស្រុកស្វាយទៀប ខេត្តស្វាយរៀង។
តុលាការខេត្តស្វាយរៀងបានចោទលោក Le vanghing ពីបទបើកបរដោយធ្វេសប្រហែស បទបង្កគ្រោះថ្នាក់ដល់អ្នកដទៃដោយចេតនា តាមច្បាប់ចរាចណ៍ផ្លូវគោកប្រទេសកម្ពុជា។ ដោយឡែក បុរសពីរផ្សេងទៀត ត្រូវចោទពីបទមានគំនិតលុបបំបាត់ភស្តុតាង ដោយពួកគេបានព្យាយាមទៅដោះស្លាកលេខ និងសម្ភារៈមួយចំនួនទៀតក្នុងរថយន្តក្រុងនោះ ក្រោយពីបង្កគ្រោះថ្នាក់៕
© រក្សាសិទ្ធិដោយ thmeythmey.com