ជាតិ
នយោបាយជាតិ
មន្ត្រីព្រំដែន៖ កិច្ចប្រជុំព្រំដែនកម្ពុជា-វៀតណាម កម្ពុជាមិនខាតបង់ទឹកដី! រូបខាងឆ្វេងលោក ឡុង វីសាលោ កណ្ដាលលោក វ៉ា គឹមហុង ខាងស្ដាំលោកស្រី កុយ ពិសី
× អនុប្រធានគណៈកម្មាធិការព្រំដែនកម្ពុជា លោកស្រី កុយ ពិសី អះអាងថា កម្ពុជាមិនបានបាត់បង់ទឹកដីទៅឲ្យវៀតណាម តាមរយៈសេចក្តីសម្រេចនៅក្នុងកិច្ចប្រជុំព្រំដែនកម្ពុជា-វៀតណាមថ្មីៗនោះទេ ។ ការអះអាងបែបនេះ ធ្វើឡើងក្រោយពីវៀតណាមបានបង្ហាញលទ្ធផលនៃការដោះដូរដីគ្នា តាមMOU កាលពីឆ្នាំ២០១១ ដែលលោក អ៊ុំ សំអាន តំណាងរាស្រ្តគណបក្សប្រឆាំងសង្ស័យថា កម្ពុជាអាចខាតបង់ដីបន្ថែមទៀត ឲ្យវៀតណាមក្នុងកិច្ចប្រជុំសម្ងាត់ រយៈពេល៣ថ្ងៃនេះ។ គណៈកម្មាធិការកិច្ចការព្រំដែនកម្ពុជា-វៀតណាម បានបើកប្រជុំទាក់ទងរឿងបោះបង្គោលព្រំដែនចាប់ពីថ្ងៃ ៧ ដល់៩ កក្កដា នាទីស្ដីការគណៈរដ្ឋមន្ត្រី ។
លោកស្រី កុយ ពិសី អនុប្រធានគណៈកម្មាធិការព្រំដែន ច្រានចោលមន្ទិលសង្ស័យរបស់លោក អ៊ុំ សំអាន តំណាងរាស្រ្តគណបក្សប្រឆាំង ដែលថាកម្ពុជាអាចបាត់បង់ទឹកដីបន្ថែមទៀតឲ្យវៀតណាម។ ថ្លែងប្រាប់សារព័ត៌មានថ្មីៗលោកស្រី កុយ ពិសី បានបន្ថែមពីលើសេចក្ដីប្រកាសព័ត៌មានរួមរវាងភាគីទាំងពីរថា តាមរយៈសេចក្តីសម្រេចក្នុងកិច្ចប្រជុំនោះ កម្ពុជាមិនបានបាត់បង់ដីឲ្យទៅវៀតណាមដូចការចោទប្រកាន់ពីមតិមួយចំនួននោះទេ។
លោក អ៊ុំ សំអាន តំណាងរាស្ត្រគណបក្សសង្គ្រោះជាតិ បានសម្ដែងការមិនពេញចិត្តចំពោះការប្រជុំសម្ងាត់ ដោយលាក់លៀមព័ត៌មាន ខណៈដែលកម្ពុជាបង្ហាញលទ្ធផលសម្រេចមិនដល់មួយទំព័រ រីឯភាគីវៀតណាមមានលទ្ធផលសម្រេច២ទំព័រ។ លោក អ៊ុំ សំអាន បានដាក់ការសង្ស័យថា ការលាក់លៀមព័ត៌មាន និងលទ្ធផលបង្ហាញខុសគ្នានេះ អាចមកពីភាគីកម្ពុជាខាតបង់ទឹកដី ហើយវៀតណាមចំណេញទឹកដីនៅក្នុងកិច្ចប្រជុំនោះ។
អ្នកតំណាងរាស្ត្របក្សប្រឆាំងរូបនេះ បានបញ្ជាក់យ៉ាងនេះថា៖ «ខ្ញុំមិនស្វាគមន៍ចំពោះលទ្ធផលនៃកិច្ចប្រជុំនោះទេ។ខ្ញុំយល់ថាយួនជា អ្នកចំណេញ ចំណែកកម្ពុជាជាអ្នកខាតបង់ទឹកដី ព្រោះខ្ញុំបានឃើញថាលទ្ធផលដែលលោក វ៉ា គឹមហុង បានប្រកាសឲ្យប្រជាពលរដ្ឋដឹងមានតែប៉ុន្មានចំណុចទេ ដែលនិយាយពីការសហការគ្នា និងសម្រេចបានបន្ដិចបន្ដួច តែចំណុចមួយចំនួនខាតនោះគឺលោក វ៉ា គឹមហុង មិនបានបង្ហាញនៅក្នុងសេចក្ដីប្រកាសនោះទេ។ តែខាងយួនវិញបានផ្សព្វផ្សាយ ហើយហេតុអ្វីបានយួនជាប្រទេសកុម្មុយនីស្ដហ៊ានផ្សាយ ដោយសារគេអាចចំណេញ »។
ឆ្លើយតបនឹងសំណួរថា តើមូលហេតុអ្វីបានជាភាគីវៀតណាមមានលទ្ធផល ២ ទំព័រ បង្ហាញពីរឿងដោះដូរដីគ្នានៅតាមព្រំដែនក្រោយកិច្ចប្រជុំ ខណៈដែលកម្ពុជាមានតែ ១ ទំព័រ? អនុប្រធានគណៈកម្មាធិការព្រំដែនកម្ពុជាលោកស្រី កុយ ពិសី បានបញ្ជាក់យ៉ាងដូច្នេះថា៖«ខ្ញុំមិនទាន់បានឃើញលទ្ធផលដែលខាងវៀតណាមផ្សព្វផ្សាយនោះទេ ដោយខ្ញុំគ្រាន់តែបានឮពីអ្នកសារព័ត៌មានសួរខ្ញុំ។ តែខ្ញុំយល់ថាលទ្ធផលវៀតណាមផ្សព្វផ្សាយនោះ គឺជាគោលការណ៍MOU ឆ្នាំ២០១១ កែសម្រួលខ្សែព្រំដែនដែលភាគីទាំងពីរព្រមព្រៀងដោះដូរដីគ្នា ស្មើទៅស្មើមក វាមិនបាត់បង់ដីទេ»។ លោកស្រីបន្ថែមយ៉ាងនេះថា៖«ចំណុចចំនួន៧នោះ ប្រហែលជាវៀតណាមចង់បង្ហាញពីតំបន់ចំនួន៧មិនទាន់ដោះស្រាយ ដែលភាគីទាំងពីរកំពុងបន្ដការដោះស្រាយ»។
ក្រោយកិច្ចប្រជុំរវាងភាគីកម្ពុជា និងវៀតណាម ចាប់ពីថ្ងៃទី៧ ដល់ថ្ងៃទី៩ ខែកក្កដា កម្ពុជាបានបង្ហាញលទ្ធផលទី១ ជាភាសាខ្មែរថា ភាគីទាំងពីរទទួលស្គាល់ថា ការងារខណ្ឌសីមា និងបោះបង្គោលព្រំដែនគោករវាងប្រទេសទាំងពីរ មានភាពស្មុគស្មាញច្រើន។ ភាគីទាំងពីរបានបោះបង្គោលព្រំដែនបាន ៨៣ ភាគរយហើយ ហើយនឹងខំបញ្ចប់នៅពេលខាងមុខ។ ទី២ ភាគីទាំងពីរឯកភាពអនុវត្តឲ្យបានម៉ឺងម៉ាត់តាមសេចក្ដីប្រកាសព័ត៌មាន រួម ចុះថ្ងៃទី១៧ ខែមករា ឆ្នាំ១៩៩៥ ស្ដីពីការរក្សាស្ថានភាពបច្ចុប្បន្ននៅតាមបណ្ដោយព្រំដែន និងទី៣ ភាគីទាំងពីរឯកភាពគ្នាឱ្យក្រុមបច្ចេកទេសចម្រុះព្រំដែន និងអាជ្ញាធរពាក់ព័ន្ធនៅតាមបណ្ដាខេត្តជាប់ព្រំដែនប្រទេសទាំងពីរ សហការគ្នាដោះស្រាយឲ្យមានប្រសិទ្ធភាព រាល់បាតុភាពដែលកើតមាននៅតាមបណ្ដោយព្រំដែន ដើម្បីទប់ស្កាត់ និងបញ្ចៀសការរីករាលដាលដែលនាំឱ្យប៉ះពាល់ដល់ទំនាក់ទំនងល្អនៃ ប្រទេសទាំងពីរ។
យ៉ាងណាក៏ដោយចំពោះលទ្ធផលដែលកម្ពុជាបង្ហាញខ្លីជាភាសាខ្មែរនេះ គឺដោយសារតែប្រធានគណៈកម្មាធិការព្រំដែនកម្ពុជា ចង់បង្ហាញបង្រួមឲ្យខ្លីងាយយល់។ នេះជាការអះអាងរបស់លោកស្រី កុយ ពិសី អនុប្រធានគណៈកម្មាធិការព្រំដែនកម្ពុជា។
បើតាមវិទ្យុអាស៊ីសេរីជាភាសាខ្មែរ ដែលបានបកប្រែលទ្ធផលពីភាសាវៀតណាម នៅក្នុងកិច្ចប្រជុំ ៣ថ្ងៃ ប្រទេសទាំងពីរបានរំឭកឡើងវិញពីកិច្ចការកំណត់ខណ្ឌសីមា បោះបង្គោលព្រំដែនគោកតាំងពីមុនឆ្នាំ២០០៦ ដល់ពេលបច្ចុប្បន្ន ដែលជាលទ្ធផលបានកំណត់ខណ្ឌសីមាបានប្រហែល ៩២០គីឡូម៉ែត្រ ក្នុងប្រវែងព្រំដែនសរុបប្រហែល ១.១៣៧គីឡូម៉ែត្រ។ គណៈកម្មការកំណត់ទីតាំងបង្គោលបាន២៦០ ក្នុងចំណោម ៣១៤ ទីតាំង (ស្មើនឹង ៨៤.១%) បោះបង្គោលបាន ៣០៥/៣៧១ បង្គោល (ស្មើនឹង ៨២.២%) ភាគីទាំងពីរកំណត់កម្មសិទ្ធិកោះបាន ១០។ ក្នុងនោះ មានកោះ ៣៩ បានកំណត់ជាកម្មសិទ្ធិរបស់វៀតណាម និងកោះ ៦៥ បានកំណត់ជាកម្មសិទ្ធិរបស់កម្ពុជា និងពិនិត្យ ហើយសម្រេចឲ្យប្រើប្រាស់សំណុំឯកសារបង្គោលចំនួន ១៩១ ។
ដោយអនុវត្តតាមកំណត់ត្រាអនុស្សរណៈអំពីការដោះស្រាយតំបន់មួយចំនួន ដែលនៅសេសសល់លើព្រំដែនគោករវាងរដ្ឋាភិបាលវៀតណាម និងកម្ពុជា ដែលហៅកាត់ថា MOU មកដល់ពេលនេះ ភាគីទាំងពីរបានដោះដូរ និងសម្រេចការដោះដូរទីតាំងដីមួយចំនួន (តាមអត្រា ១៖១ (១ហិកតារ -១ហិកតារ) នៅខេត្តដែលមានព្រំដែនជាប់គ្នា រួមមានខេត្តតៃនិញ (Tây Ninh) ជាប់នឹងខេត្តកំពង់ចាម (ត្បូងឃ្មុំ) តៃនិញ (Tây Ninh) ជាប់ស្វាយរៀង ដុងថាប (Đồng Tháp) ជាប់ព្រៃវែង អានយ៉ាង (An Giang) ជាប់តាកែវ និងខេត្តកៀនយ៉ាង (Kiên Giang) ជាប់កំពត។
ប្រភពព័ត៌មានដដែលបន្តថា បច្ចុប្បន្ននេះ មានកំណាត់តំបន់ព្រំដែនចំនួន ៧ ដែលភាគីទាំងពីរមិនទាន់ឯកភាពដំណោះស្រាយនៅឡើយ គឺកំណាត់ព្រំដែនពីបង្គោលលេខ ៣០ ដល់ ៤០ (ខេត្តយ៉ាឡាយ [Gia Lai] -រតនគិរី)។ ព្រំដែនពីបង្គោលលេខ ៤០ ដល់ ៤៤ (ខេត្តយ៉ាឡាយ [Gia Lai] ដាក់ឡាក់ [Đắk Lắk] -រតនគិរី និងមណ្ឌលគិរី) កំណាត់ព្រំដែនពីបង្គោលលេខ ៥៦ ដល់ ៦០ (ខេត្តដាក់ណុង [Đắk Nông] -មណ្ឌលគិរី) កំណាត់ព្រំដែនពីបង្គោលលេខ ១៣៨ ដល់ ១៤៧ (ខេត្តតៃនិញ [Tây Ninh] -ស្វាយរៀង) កំណាត់ព្រំដែនពីបង្គោលលេខ ២៤១ ដល់ ២៤៥ ពីបង្គោលលេខ ២៤៧ ដល់ ២៥៣ (ខេត្តអានយ៉ាង [An Giang] -កណ្ដាល) និងកំណាត់ព្រំដែនពីបង្គោលលេខ ២៩៥ ដល់ ៣០២ (ខេត្តកៀនយ៉ាង [Kiên Giang] -កំពត) ជាដើម៕
© រក្សាសិទ្ធិដោយ thmeythmey.com