ជាតិ
សង្គមជាតិ
វៀតណាមរម្លឹកគុណចំពោះកងទ័ពរបស់ខ្លួន ដែលបានជួយកម្ពុជាឲ្យផុតពីរបប ប៉ុល ពត
×![]()
អនុប្រធានសមាគមវៀតណាម-កម្ពុជា លោក វ៉ូ វឿងរៀត (Vu Vuong Viet)បានមានប្រសាសន៍នៅក្នុងសន្និបាតរវាងសមាគមកម្ពុជា-វៀតណាម នៅក្នុងប្រទេសវៀតណាមថាគុណបំណាច់ចំពោះបក្ស រដ្ឋ កងទ័ព និងប្រជាជនវៀតណាម ដែលបានឧបត្ថម្ភគាំត្រយ៉ាងធំធេងចំពោះប្រជាជនកម្ពុជា នៅគ្រប់ដំណាក់កាលនៃការតស៊ូរំដោះជាតិកម្ពុជា ពីរបបប្រល័យពូជសាសន៍ និងការកសាងសន្តិភាពបង្រួបបង្រួមជាតិវិញ និងការស្តារប្រទេសជាតិឱ្យមានការរីកចម្រើន។ នេះបើតាមការផ្សព្វផ្សាយព័ត៌មាន របស់ទីភ្នាក់ងារសារព័ត៌មានកម្ពុជា AKP កាលពីថ្ងៃទី៨ កក្តដា។
អនុប្រធានសមាគមវៀតណាម-កម្ពុជា លោក វ៉ូ វឿងរៀត (Vu Vuong Viet)បានមានប្រសាសន៍ ថា កម្ពុជាពិតជាមិនអាចភ្លេចបានឡើយ ខណៈពេលប្រជាជននៃប្រទេសទាំងពីរបានប្រយុទ្ធប្រកៀកស្មាប្រឆាំងនឹងសត្រូវរួម ដើម្បីរំដោះប្រទេសជាតិឱ្យរួចផុតពីរបបអាណានិគមឈ្លានពានបរទេស និងទទួលបានឯករាជ អធិបតេយ្យភាពទឹកដី និងការបង្រួបបង្រួមជាតិផង។ លោកថ្លែងបែបនេះ នៅក្នុងសន្និបាតស្តីពីការផ្លាសប្តូរបទពិសោធន៍ការងារ រវាងសមាគមកម្ពុជា-វៀតណាម នៅខេត្តដុងថាប់ ប្រទេសវៀតណាម កាលពីថ្ងៃទី៧-៨ កក្តដា។
សារព័ត៌មានAKPដដែលបានស្រង់សំដីរបស់លោក លោក វ៉ូ វឿងរៀត (Vu Vuong Viet) ទៀតថាសមាគមនៃប្រទេសទាំងពីរបានរួមគ្នាឆ្លងកាត់គ្រប់ឧបសគ្គចាប់តាំងពីឆ្នាំ១៩៧៥មក គឺនៅក្នុងដំណាក់កាលនៃការបង្កើតនិងអភិវឌ្ឍន៍របស់សមាគមិត្តភាពនៃប្រទេសទាំងពីរ។ ហើយចាប់តាំងពីឆ្នាំ១៩៧៩ នៃការបង្កើតសមាគមមិត្តភាពនេះមក គឺដើម្បីសម្រេចឱ្យបាននូវការលើកកម្ពុស់សន្តិភាព មិត្តភាព និងកិច្ចសហប្រតិបត្តិការរវាងប្រជាជនប្រទេសទាំងពីរ រួមចំណែកក្នុងសកម្មភាពការទូត បក្ស និងរដ្ឋនៃប្រទេសទាំងពីរ ដែលនាំមកនូវសមិទ្ធផលដ៏ល្អប្រសើរ។
នៅក្នុងសន្និបាតដែលមានប្រតិភូភាគីកម្ពុជាទៅចូលរូម ៦០រូប និងមានលោកស្រី ម៉ែន សំអន អធិការកិច្ចប្រធានសមាគមមិត្តភាពកម្ពុជា-វៀតណាមចូលរួមផងគឺលោកស្រី ម៉ែន សំអន និងលោក វ៉ូ វឿងរៀត (Vu Vuong Viet) បានថ្លែងដូចគ្នាថា សមាគមនៃប្រទេសទាំងពីរបានដើរតួនាទីយ៉ាងសំខាន់ក្នុងការចូលរួមពង្រឹងចំណងមិត្តភាព និងសហប្រតិបត្តិការ ការកសាងសន្តិភាព និងស្ថិរភាពនៅក្នុងប្រទេសទាំងពីរ។ បន្ថែមពីនេះ លោក វ៉ូ វឿងរៀត (Vu Vuong Viet) បានមានប្រសាសន៍ទៀតថា ជំនួបគ្នាលើកនេះ គឺដើម្បីផ្លាស់ប្តូរយោបល់ ដកស្រង់បទពិសោធន៍ពីគ្នា និងដើម្បីធ្វើផែនការសកម្មភាពបន្តពង្រឹងសាមគ្គីភាពនិងមិត្តភាពរវាងសមាគមនៃប្រទេសទាំងពីរ៕
© រក្សាសិទ្ធិដោយ thmeythmey.com
