ជាតិ
សង្គមជាតិ
លោក ហ៊ុន សែន រម្លឹកគុណវៀតណាម ចំពេលបញ្ហាព្រំដែនកម្ពុជា-វៀតណាមផ្ទុះឡើង លោក ហ៊ុន សែន ឱបគ្នាជាមួយលោកនាយករដ្ឋមន្រ្តីវៀតណាម Nguyen Tan Dung ក្នុងពេលលោកនាយករដ្ឋមន្រ្តីវៀតណាមមកគោរពវិញ្ញាណខន្ធព្រះបរមរតនកោដ្ឋ កាលពីឆ្នាំ ២០១២
× លោកនាយករដ្ឋមន្ត្រី ហ៊ុន សែន មិនថាំមាត់នឹងនិយាយសរសើរកងទ័ពវៀតណាមពេញមាត់ៗនោះទេថា កងទ័ពវៀតណាម បានជួយស្រោចស្រង់ប្រទេសកម្ពុជា ឲ្យមានជីវិតរស់នៅរហូតដល់ពេលបច្ចុប្បន្ន។ ពំនោលសរសើររបស់លោក ហ៊ុន សែន ចំពោះមហាមិត្តវៀតណាមនៃរដ្ឋាភិបាលលោក បានធ្វើឡើងនៅក្នុងជំនួបជាមួយលោក វ៉ូ វង់វៀត អនុប្រធានសមាគមមិត្តភាពកម្ពុជា-វៀតណាម នៅវិមានសន្តិភាពកាលពីថ្ងៃព្រហស្បតិ៍ម្សិលមិញ។
«បើគ្មានកងទ័ពវៀតណាមជួយរំដោះកម្ពុជាទេនោះ កម្ពុជាពិតជាគ្មានមុខមាត់ដូចបច្ចុប្បន្ននេះទេ។ វាគឺជាសច្ចធម៌ប្រវត្តិសាស្ត្រតែម្តង»។ នេះជាប្រសាសន៍របស់លោក ហ៊ុន សែន ប្រាប់ទៅលោកអនុប្រធានសមាគមមិត្តភាពកម្ពុជា-វៀតណាម កាលពីម្សិលមិញ ដែលជំនួយការផ្ទាល់របស់លោកនាយករដ្ឋមន្ត្រីគឺលោក អ៊ាង សុផល្លែត បានស្រង់សម្តីបន្តមកប្រាប់អ្នកសារព័ត៌មាន។ បើតាមសម្តីលោកជំនួយការរួបនេះ ដែលទីភ្នាក់ងារសារព័ត៌មានកម្ពុជា AKP បានចុះផ្សាយ លោក ហ៊ុន សែន បានបន្តសរសើរកងទ័ពវៀតណាមនៅចំពោះមុខមន្ត្រីវៀតណាមទៀតថា បើគ្មានកងទ័ពស្ម័គ្រចិត្តវៀតណាមចូលមកជួយរំដោះប្រទេស និងប្រជាជនកម្ពុជាចេញពីរបបប្រល័យពូជសាសន៍ ប៉ុល ពត នោះទេ ចំនួនមនុស្សស្លាប់នៅកម្ពុជា គឺពិតជាមានចំនួនកាន់តែច្រើន។
តាមពិតទៅប្រសាសន៍របស់លោក ហ៊ុន សែន ដែលសរសើរពីគុណូបការៈកងទ័ពវៀតណាម ធ្វើមកលើកម្ពុជានោះ វាមិនមែនទើបតែជាលើកដំបូង ហើយក៏មិនមែនជារឿងចម្លែកនោះដែរ។ ក៏ប៉ុន្តែការរម្លឹកគុណរបស់វៀតណាមពីសំណាក់លោកប្រធានគណបក្សប្រជាជនកម្ពុជារូបនេះ លេចឡើងចំពេលដែលភាពល្អក់កកររឿងព្រំដែនកម្ពុជា និងវៀតណាម បានផ្ទុះឡើងសាជាថ្មី ដែលធ្វើឲ្យសាធារណៈជនចាប់អារម្មណ៍នឹងប្រសាសន៍លោកយ៉ាងខ្លាំង៕
© រក្សាសិទ្ធិដោយ thmeythmey.com