ជាតិ
នយោបាយជាតិ
លោក ហ៊ុន សែន ខ្ចីដៃលោក សួន សេរីរដ្ឋា បំបែកសំឡេង CNRP ដើម្បីរក្សាអំណាច?
× នៅទីបំផុតទៅព្រះមហាក្សត្រ បានចេញចេញព្រះរាជក្រឹត្យលើកលែងទោសដល់លោក សួន សេរីរដ្ឋា ប្រធានចលនាអំណាចពលរដ្ឋខ្មែរដែលតុលាការដាក់ទោសឲ្យជាប់ពន្ធនាគារចំនួន ៧ ឆ្នាំ ពីបទក្បត់ជាតិ។ ការរួចពីទោសពៃរិ៍របស់លោក សួន សេរីរដ្ឋា ពេលនេះ ត្រូវអ្នកវិភាគនយោបាយ និងគណបក្សប្រឆាំងចាត់ទុកថា គឺជាយុទ្ធសាស្ត្ររបស់លោក ហ៊ុន សែន បានរៀបចំបំបែកសំឡេងគណបក្សសង្គ្រោះជាតិ ដើម្បីជោគជ័យរបស់ខ្លួន។ តែមន្ត្រីរដ្ឋាភិបាល បានប្រកែកថា លោកនាយករដ្ឋមន្ត្រី មិនមានចេតនាប្រើលោក សួន សេរីរដ្ឋា ដើម្បីបំបែកប្រជាប្រិយភាពបក្សសង្គ្រោះជាតិឡើយ។
ព្រះរាជក្រឹត្យរបស់ព្រះមហាក្សត្របានចេញមកជម្រះទោសពៃរ៍របស់លោក សួន សេរីរដ្ឋា ឲ្យរួចផុតពីបទល្មើលដែលតុលាការដាក់ទោសខ្លួនជាប់ពន្ធនាគារ ៧ ឆ្នាំ ពីបទក្បត់ជាតិហើយ នៅថ្ងៃទី ១០ ខែកក្កដា ឆ្នាំ២០១៥ ។ ថ្វីបើថ្ងៃនេះ វាជាថ្ងៃមង្គលសម្រាប់លោក សួន សេរីរដ្ឋា មែន តែអ្នកវិភាគនយោបាយ លោក កែម ឡី មិនញញើតនឹងនិយាយចំៗថា ការរួចទោសរបស់លោកប្រធានចលនាអំណាចពលរដ្ឋខ្មែរ គឺជាគុណសម្បត្តិរបស់លោក ហ៊ុន សែន។ លោក កែម ឡី អះអាងថា លោក ហ៊ុន សែន កំពុងរៀបចំល្ខោននយោបាយថ្មីមួយទៀត ពោលគឺឆ្លៀតខ្ចីដៃលោក សួន សេរីរដ្ឋា ដែលនឹងក្លាយជាមេដឹកនាំបក្សនាពេលខាងមុខ ដើម្បីបំបែកសំឡេងគណបក្សសង្គ្រោះជាតិ។ « ល្ខោនលោក ហ៊ុន សែន រៀបចំឡើង ឲ្យសួន សេរីរដ្ឋា រួចខ្លួន ហើយឲ្យបង្កើតបក្ស ដើរតួជាប្រឆាំងរដ្ឋាភិបាល ដើម្បីបំបែកបក្សសង្គ្រោះជាតិ។ លោក ហ៊ុន សែន សប្បាយចិត្តពេលមានបក្សប្រឆាំងច្រើន » ។ នេះជាការបញ្ជាក់របស់លោក កែម ឡី។
ក៏ប៉ុន្តែលោក កែម ឡី ដែលធ្លាប់ត្រូវលោក ហ៊ុន សែន រិះគន់ថា ជាអ្នកវិភាគធន់អន់ផងនោះ បានចាត់ទុកល្ខោននយោបាយ ឬយុទ្ធសាស្ត្ររបស់លោក ហ៊ុន សែន ថា ជាយុទ្ធសាស្ត្រចាស់ ដើរលើដីថ្មី ពោលគឺយុទ្ធសាស្ត្របុរាណពេក មិនជោគជ័យឡើយ។ អ្នកវិភាគរូបនេះ បន្តថា យុទ្ធសាស្ត្ររបស់លោក ហ៊ុន សែន មិនអាចបំបែកសំឡេងគណបក្សសង្គ្រោះជាតិបានទេ តែផ្ទុយទៅវិញ នឹងធ្វើឲ្យគណបក្សប្រជាជនកម្ពុជារបស់លោក ហ៊ុន សែន កាន់ដើរចូលផ្លូវបរាជ័យ។ លោក កែម ឡី បញ្ជាក់យ៉ាងនេះថា៖ « លោក ហ៊ុន សែន រៀបយុទ្ធសាស្ត្រអន់ណាស់។ គាត់ស្មានតែឲ្យ សួន សេរីរដ្ឋា មកបង្កើតបក្ស ហើយផ្ចុងផ្តើមឲ្យមានបក្សច្រើនដើរតួជាប្រឆាំងរដ្ឋាភិបាល តាមក្បួនគាត់ ដើម្បីចំណេញសម្រាប់ជCPP ។ តែមិនដូចការវិភាគរបស់លោក ហ៊ុន សែន ទេ ព្រោះកាលណាដើរតួជាបក្សប្រឆាំងត្រូវរិះគន់រដ្ឋាភិបាល ហើយរដ្ឋាភិបាលរបស់លោក ហ៊ុន សែន ធ្វើមិនបាន គឺមានតែខាតវិញ» ។
ដូចចំណុចមួយចំនួនដែលលោក កែម ឡី បានលើកឡើងដែរ លោក អ៊ុំ សំអាន តំណាងរាស្ត្រ គណបក្សសង្គ្រោះជាតិ បានចាត់ទុកការលើកលែងទោសដល់លោក សួន សេរីរដ្ឋា ថា ជាការរៀបចំរបស់លោក ហ៊ុន សែន ដើម្បីបន្សាបប្រជាប្រិយភាពបក្សសង្គ្រោះជាតិ។ តែតំណាងរាស្ត្ររូបនេះ អះអាងថា គណបក្សសង្គ្រោះជាតិ មិនខ្វាយខ្វល់នឹងគណបក្សថ្មីរបស់លោក សួន សេរីរដ្ឋា ដែលលោកថា គ្រាន់តែជាគ្រាប់អ៊ុករបស់លោក ហ៊ុន សែន មិនអាចទាក់ទាញអ្នកគាំទ្រគណបក្សរបស់លោកនោះទេ។
ងាកមកស្តាប់ការវិភាគរបស់បណ្ឌិតវិទ្យាសាស្ត្រនយោបាយមកពីរុស្ស៊ី លោក សុខ ទូច វិញម្តង ដែលអ្នកវិភាគរូបនេះ មើលឃើញទិដ្ឋភាព ៣ យ៉ាងសំខាន់ៗចំពោះព្រះរាជក្រឹត្យលើកលែងទោសលោក សួន សេរីរដ្ឋា។ « ទី ១ វាជាព្រះរាជសិទ្ធិរបស់ព្រះមហាក្សត្រក្នុងការលើកលែងទោសពលរដ្ឋខ្មែរណាក៏បាន។ទី ២ ការលើកលែងទោស លោក សួន សេរីរដ្ឋា អាចជាការដុះដូរកម្លាំងនយោបាយ។ ទី ៣ ការប្រកួតប្រជែងរបស់បក្សនយោបាយធំៗបច្ចុប្បន្ន» ។ នេះជាការវិភាគរបស់លោក សុខ ទូច។ អ្នកវិភាគរូបនេះ បានអត្ថាធិប្បាយចំណុចទី ២ និងទី ៣ យ៉ាងដូច្នេះថា៖« ការដុះដូរកម្លាំងនយោបាយ ដោយសារថា លោក សួន សេរីរដ្ឋា គាត់ពូកែធ្វើចលនាបះបោល។ ដូច្នេះលោកនាយករដ្ឋមន្ត្រី សុខចិត្តឲ្យលោកមេចលនានេះចូលស្រុក ហើយបង្កើតបក្ស ដើម្បីឲ្យឈប់បះបោល។ មួយទៀត វាអាចដែរថា គណបក្សដែល ធំ គាត់ឆ្លៀតយករឿងនេះដើម្បីចំណេញ បំបែងសំឡេងបក្សតូចជាង» ។
ទោះបីជាអ្នកវិភាគ បក្សប្រឆាំង ខំនិយាយថា រឿងនេះថា ជាយុទ្ធសាស្ត្ររបស់លោក ហ៊ុន សែន ដើម្បីបំបែកសំឡេងបក្សសង្គ្រោះជាតិក្តី ក៏លោក ផៃ ស៊ីផាន នៅតែថ្លែងការពារថា លោកនាយករដ្ឋមន្ត្រី ហ៊ុន សែន មិនដែលមានគំនិតយករឿងលោក សួន សេរីរដ្ឋា នេះ ដើម្បីទៅបំបែកសំឡេងគណបក្សសង្គ្រោះជាតិទេ។ លោកថា ទង្វើបែបនេះ ជាទង្វើថោកទាប ដែលគណបក្សប្រជាជនកម្ពុជា ជាពិសេសគឺលោក ហ៊ុន សែន មិនធ្វើជាដាច់ខាត។ « បើសម្តេចនាយករដ្ឋមន្ត្រី គាត់ធ្វើដូច្នេះមែន ម្លេះសមប្រទេសជាតិវិនាសអស់ហើយ តែលោកមិនធ្វើនោះទេ។ គណបក្សប្រជាជនយើង មានអំណាច មានអ្នកគាំទ្រខ្លាំងហើយ។សម្តេចធ្លាប់មានប្រសាសន៍ហើយថា លោកមិនដែលចាត់ទុកខ្មែរណាជាសត្រូវទេ ទោះអ្នកនោះ ធ្លាប់លួចធ្វើឃាតលោក ក៏សម្តេចមិនចងគំនុំដែរ។ សម្តេចតែងតែអត់ទោសឲ្យជានិច្ច ដើម្បីការរួបរួមរបស់ជាតិ»។ នេះជាចិត្តសប្បុរសរបស់លោក ហ៊ុន សែន ដែលបរិយាយលោក ផៃ ស៊ីផាន។
សូមបញ្ជាក់ថា កាលពីថ្ងៃទី ១៤ ខែមករា ឆ្នាំ ២០១៥ កន្លងទៅនេះ ចៅក្រមសាលាដំបូងរាជធានីភ្នំពេញ បានសម្រេចផ្តន្ទាសទោសកំបាំងមុខឲ្យលោក សួន សេរីរដ្ឋា ជាប់ពន្ធនាគារ ៧ឆ្នាំ និងពិន័យប្រាក់ ២៥លានរៀល។ ក្រៅពីលោក មានសមាជិក ៣នាក់ទៀតរបស់ខ្លួន ត្រូវផ្ដន្ទាទោសឲ្យជាប់ពន្ធនាគារម្នាក់ ៦ឆ្នាំ។ ក្រោយមកសាលាឧទ្ធរណ៍ បានចេញសាដីការរក្សាសេចក្តីសម្រេចរបស់សាលក្រមតុលាការសាលាដំបូង ហើយសាលដីការនេះ បានចូលជាស្ថាពរនៅថ្ងៃទី ២៨ ខែមិថុនា ឆ្នាំ ២០១៥៕
© រក្សាសិទ្ធិដោយ thmeythmey.com