ជាតិ
សង្គមជាតិ
ក្រសួងទេសចរណ៍គ្រោងរៀបចំកន្លែងជិត២០នៅអន្លង់វែងជាគោលដៅទេសចរណ៍ប្រវត្តិសាស្ត្រ រមណីយដ្ឋានផ្ទះតាម៉ុក នៅស្រុកអន្លង់វែង ខេត្តឧត្តរមានជ័យ
× កាលពីពេលថ្មីៗនេះ កិច្ចប្រជុំមួយត្រូវបានធ្វើឡើងនៅទីរួមស្រុកអន្លង់វែង ដើម្បីពិភាក្សាលើគម្រោងដាក់ទីតាំងជិត២០ នៅស្រុកអន្លង់វែងទៅជាគោលដៅទេសចរណ៍ប្រវត្តិសាស្ត្រ។ ទីតាំងទាំងនោះ មានផ្ទះតាម៉ុកជាដើម ដែលក្រសួងទេសចរណ៍គ្រោងនឹងរៀបចំឲ្យទៅជាកន្លែងទេសចរណ៍មួយដ៏ទាក់ទាញ នៅថ្ងៃខាងមុខ។
រដ្ឋមន្ត្រីក្រសួងទេសចរណ៍ លោក ថោង ខុន បានឲ្យដឹងថា យ៉ាងហោចណាស់មានកន្លែងពី ១៨ ទៅ១៩ ដែលគ្រោងនឹងរៀបចំទៅជាគោលដៅទេសចរណ៍ប្រវត្តិសាស្ត្រនៅស្រុកអន្លង់វែង ខេត្តឧត្តរមានជ័យ។ លោករដ្ឋមន្ត្រីបន្ថែមថា កន្លែងទាំងនោះមានដូចជា កន្លែងដុតខ្មោច ប៉ុល ពត កន្លែងកាត់ទោស ប៉ុល ពត ផ្ទះតាម៉ុក កន្លែងកែច្នៃគ្រាប់កាំភ្លើង ផ្ទះ ប៉ុល ពត និងកន្លែងដុតខ្មោចរបស់ ស៊ុន សេន ជាដើម។
បើតាមលោក ថោង ខុន ទីតាំងទាំងនោះមានចំងាយឆ្ងាយពីគ្នា ដែលក្នុងនោះត្រូវការអភិវឌ្ឍ និងរៀបចំផ្លូវថ្នល់ឲ្យបានល្អជាមុន។ លោកបន្តថា ស្រុកអន្លង់វែងដែលសម្បូរដោយទីតាំងប្រវត្តិសាស្ត្រជាច្រើន ហើយវាក៏ស្ថិតនៅទីតាំងអំណោយផល ដែលភ្ញៀវទេសចរឆ្លងកាត់ផងដែរ ជាពិសេសគឺទេសចរថៃ។ ត្រង់ចំណុចនេះ លោក ថោង ខុន ពន្យល់ថា ដោយសារស្រុកអន្លង់វែងនៅជិតព្រំដែនខ្មែរ-ថៃ ហើយច្រកអានសេះគ្រោងនឹងបើកឆាប់ៗនេះ លោករំពឹងថា នឹងមានទេសចរថៃចូលមករិតតែច្រើនថែមទៀត។
គម្រោងខាងលើនេះ គឺក្រសួងទេសចរណ៍ សហការនិងមជ្ឈមណ្ឌលឯកសារកម្ពុជារបស់លោក ឆាំង យុ។ លោក ថោង ខុន បញ្ជាក់ថា រាល់ទីតាំងខាងលើ គឺសុទ្ធសឹងមានឯកសារ ដែលបានរៀបរាប់យ៉ាងលម្អិត។ សព្វថ្ងៃកន្លែងទាំងនោះ ត្រូវបានបោះបង្គោលថែរក្សា ដើម្បីការពារកុំឲ្យមានអ្នកទៅប៉ះពាល់ ឫរំលោភយកជាដើម ក្នុងគោលបំណងទុកកន្លែងទាំងនោះជាគោលដៅទេសចរណ៍ប្រវត្តិសាស្ត្រ ទុកឲ្យកូនចៅជំនាន់ក្រោយបានដឹង និងស្គាល់។
យ៉ាងណា គេមិនទាន់ដឹងថា តើគម្រោងនេះអាចនឹងដំណើរបាននៅពេលណានោះទេ ខណៈដែលរដ្ឋមន្ត្រីក្រសួងទេសចរណ៍បានអំពាវនាវឲ្យមានការជួយជ្រោមជ្រែងពីដៃគូរផ្សេងៗ ដើម្បីរៀបចំតំបន់ទាំងនោះ៕
© រក្សាសិទ្ធិដោយ thmeythmey.com