កីឡាជាតិ
ណាហ្គា និងបឹងកេត មានប្រៀបលើគូប្រកួត ខណៈទ័ព និងថាយហ្គ័រ ប្រជែងគ្នារក៣ពិន្ទុ
×
ក្រុមក្រសួងការពារជាតិ (ទ័ព) ត្រូវបើកទ្វារកីឡដ្ឋានកងយោធពលខេមរភូមិន្ទ (ស្ដាតចាស់) របស់ខ្លួនទទួលស្វាគមន៍ក្រុមខេមបូឌានថាយហ្គ័រ (Cambodian Tiger) ហើយក្រុមណាហ្គាវើល ជួបស៊ីម៉ាក់ និង បឹងកេតអង្គរ ប៉ះគីរីវង់សុខសែនជ័យ នៅទីលានមជ្ឈមណ្ឌលនិងសាលាបាល់ទាត់ជាតិបាទី ក្នុងប្រកួតសប្ដាហ៍ទី៤ រសៀលថ្ងៃសៅរិ៍ ទី ១១ ខែ កក្កដា នេះនៃពានរង្វាន់មិត្តហ្វូនខេមបូឌានលីក ២០១៥។
ក្រសួងការពារជាតិ ប៉ះ ខេមបូឌានថាយហ្គ័រ (ម៉ោង ៣:៣០ នៅស្ដាតចាស់)
លោក ទេព ឡុងរចនា គ្រូបង្វឹកក្រុមក្រសួងការពារជាតិ មាន ៤ ពិន្ទុក្នុងដៃក្រោយប្រកួត ៣ លើកក្នុងនោះឈ្នះវេស្ទើភ្នំពេញ ២ ទល់ ១ ហើយស្មើ អគ្គស្នងការដ្ឋាននគរបាលជាតិ ១ ទល់ ១ និង ចាញ់ក្រុមបឹងកេតអង្គរ ៣ ទល់ ។ កីឡាករ ឈិន ឈឿន, អ៊ុង តារា និង អ៊ុំ តុលា សុទ្ធធ្លាប់រកគ្រាប់បាល់បញ្ជូលទីនាំជ័យជម្នះឱ្យក្រុមនាពេលកន្លងមក។
ដោយឡែកក្រុមខេមបូឌានថាយហ្គ័រ ទើបតែមាន៣ ពិន្ទុទេក្រោយប្រកួតបាន ៣ លើកឈ្នះ ១ ចាញ់ ។ ប្រកួតដំបូងក្រុមដែលមានប្រធានក្លិបជាជនជាតិជប៉ុននេះបានយកឈ្នះក្រុមអគ្គស្នងការដ្ឋាននគរបាលជាតិ ២ ទល់ ០ តែចាញ់ក្រុមបឹងកេតអង្គរ ៣ ទល់ ២ និង ចាញ់ក្រុមភ្នំពេញក្រោន ៣ ទល់១ ។ ខ្សែប្រយុទ្ធ សុខ ចាន់រស្មី, កីឡាករជើងចាស់ ចាន់ ឬទ្ធី, អ្នកចាំទី ហែម ស៊ីម៉ៃ, ខ្សែប្រយុទ្ធ សួង វីរៈ សុទ្ធតែជាសំខាន់ៗ របស់ក្រុម។
ណាហ្គាវើល ជួបស៊ីម៉ាក់ (ម៉ោង ៣:៣០ នាទីនៅបាទី)
ក្រុមណាហ្គាវើល ត្រូវជួបជាមួយក្រុមចំណូលថ្មីស៊ីម៉ាក់ នៅវេលាម៉ោង ៣:៣០ នាទីរសៀលនេះ នៅទីលានបាល់ទាត់មជ្ឍមណ្ឌលនិងសាលាបាល់ទាត់ជាតិបាទី ក្នុងខេត្តតាកែវ។
ណាហ្គាវើល ក្រោមការដឹកនាំដោយលោក មាស ចាន់ណា ប្រកួតបាន ៣ លើកឈ្នះ ២ និង ចាញ់ ១ ឈរលេខ ៣ កំពូលតារាង។ កៅអីក្រុមខ្លាំងទាំង ៤ ប្រចាំរដូវកាលជាគោលដៅសំខាន់បំផុតពេលលោកឡើងធ្វើបង្គោលប្រចាំក្លិបណាហ្គាវើល។ លោកបានប្រមូលទិញកីឡាករល្បីៗមួយចំនួនដូចជា គួច សុកុម្ភៈ, ឃឹម បុរី និង កីឡាករបរទេសមួយចំនួនមកចូលរួមក្នុងក្រុម ដើម្បីបង្កើតកម្រិតបច្ចេកទេស។
ចំណែកក្រុមស៊ីម៉ាក់ វិញស្ថិតនៅក្នុងក្រសែភ្នែករបស់ទស្សនិកជននៅឡើយ ក្រោយប្រកួត ៣ លើកស្មើទាំង ៣ ហើយអាចរកគ្រាប់បាល់ទាត់បញ្ជូលទីគ្រប់ការប្រកួតទៀតផង។ លោក មាស សំអឿន អតីតគ្រូបង្វឹករបស់ក្លិបបៀលប្រាយ និង ក្លិបវេស្ទើន បានទទួលនាទីដឹកនាំក្រុមនេះតាំងពីជម្រុះនៅការប្រកួតក្របខណ្ឌក១ ម្ល៉េះ។ ខ្សែប្រយុទ្ធ Janzen Anthony Robert ជនជាតិអាមេរិក នៅតែកូនសោសំខាន់ក្នុងការរកគ្រាប់បាល់បំប៉ោងសំណាញ់គូប្រកួត។
គិរីវង់សុខសែនជ័យ ជួប បឹងកេតអង្គរ (ម៉ោង ៣:៣០ នាទីនៅបាទី)
គីរីវង់សុខសែនជ័យ បើកឆាកដើមរដូវកាលនេះមិនសូវកាក់កបប៉ុន្មាននោះទេ ដោយស្មើជាមួយស៊ីម៉ាក់ ១ ទល់ ១ តែចាញ់ វេស្ទើនភ្នំពេញ ៦ ទល់ ៤ និង បន្តចាញ់អគ្គស្នងការដ្ឋាននគរបាលជាតិ ៣ ទល់ ១ ទៀត។ ក្រុមដែលមានមូលដ្ឋាននៅខេត្តតាកែវ នេះបានជួបបញ្ហារង្គោះរង្គើខ្លះៗ មុនពេលលីកចាប់ផ្ដើម។ កីឡាករ ឯក សុភាព និង ឯម ផាន់ណា ជាប់ឈ្មោះក្នុងបញ្ជីអ្នកទាត់បញ្ជូលទីបានច្រើនជាងគេបណ្ដោះអាសន្នគិតត្រឹមសប្ដាហ៍ទី៣ នេះ ខណៈរាមច្បង អ៊ិន វិច្ឆិកា ទទួលនាទីជាប្រធានក្រុមលើទីលាន។
សម្រាប់បឹងកេតអង្គរ ជ័យជម្នះនៅរសៀលនេះពិតជាសំខាន់ណាស់ ដើម្បីប្រជែងកៅអីកំពូលតារាងជាមួយក្រុមភ្នំពេញក្រោន។ លោក ប្រាក់ សុវណ្ណារ៉ា ប្រើប្រាស់ធនធានកីឡាករក្នុងស្រុកដែលមានសក្ដានុពល និង កីឡាករបរទេសដែលមានបទពិសោធន៍ ធ្លាប់បានជោគជ័យរួចហើយឆ្លងកាត់ ៣ ប្រកួតកន្លងមក។
តើក្រុមណាអាចរកបាន ៣ ពិន្ទុនៅរសៀលថ្ងៃសៅរិ៍ ចុងសប្ដាហ៍នេះ?
© រក្សាសិទ្ធិដោយ thmeythmey.com