ជាតិ
សង្គមជាតិ
ទង្វើរបស់លោក សុខ ប៊ុន ផ្តល់ភាពអាម៉ាស់ដល់បុរសដទៃ
× លោក សុខ ប៊ុន ជាឧកញ៉ា និងជាប្រធានក្រុមហ៊ុនTEHO Developmentព្រមទាំងជាប្រធានសមាគមអ្នកវាយតម្លៃអចលនវត្ថុកម្ពុជារួមជាមួយក្រុមអង្គរក្សរបស់ខ្លួន បានប្រើអំពើហិង្សាវាយដំជាន់ធាក់យ៉ាងធ្ងន់ធ្ងរ និងរហូតដល់ដោះសម្លៀកបំពាក់កញ្ញា ឯក សុជាតា ហៅសាសាអតីតពិធីការិនីទូរទស្សន៍ CTN ក្នុងហាងមួយ ស្ថិតក្នុងបរិវេណកោះពេជ្រកាលពីយប់ថ្ងៃទី២ ខែកក្កដាកន្លងទៅបានធ្វើឲ្យមានការរិះគន់យ៉ាងធ្ងន់ធ្ងរពីសំណាក់ប្រជាពលរដ្ឋ។ មិនថាស្រី្តនោះទេ ដែលហួសចិត្ត សូម្បីតែប្រុសៗ ក៏សម្ងើចចិត្ត និងសម្តែងអារម្មណ៍ខ្មាសអៀនជំនួសអំពើលោក សុខ ប៊ុន ដែលមានងារដល់ឧកញ៉ា តែបែរជាមកប្រព្រឹត្តរឿងអមនុស្សធម៌លើស្ត្រីដល់ថ្នាក់នឹងសោះ។
លោក ឆាយ គីមស័រ អ្នកសម្របសម្រួលបណ្តាញបុរសកម្ពុជាថ្នាក់ជាតិ បានថ្លែងថា អំពើរបស់លោក សុខ ប៊ុន ជាទង្វើដ៏សាហាវព្រៃផ្សៃមួយ ដែលសង្គមស្អប់ខ្ពើមយ៉ាងខ្លាំង ដែលក្នុងនាមជាបុរសមិនគួរធ្វើទៅរួចនោះទេ។ តំណាងបណ្តាញបុរសកម្ពុជារូបនេះបានបង្ហាញពីអារម្មណ៍ហួសចិត្តដូច្នេះថា៖ «ខ្ញុំហួសចិត្ត កោតតែលោក សុខ ប៊ុន អាចធ្វើទៅរួច។ ទោះបីជាយើងមិនបានប្រព្រឹត្តក៏ដោយ តែយើងជាបុរស យើងពិតជាខ្មាសអៀនខ្លាំងណាស់ ពេលដែលឃើញបុរសដូចគ្នា ទៅប្រើអំពើហិង្សាបែបនេះលើស្ត្រី» ។
ចំណែកឯ លោក អ៊ូ រតនៈ តំណាងយុវជននៃអង្គក្រៅរដ្ឋាភិបាលមួយ បានបញ្ជាក់ថា ទង្វើរបស់លោក សុខ ប៊ុនបង្ហាញពីភាពឃោរឃៅបីយ៉ាង គឺ ១. ការប្រើកម្លាំងវាយដំជាន់ធាក់ ២. ការគម្រាមប្រើអាវុធខុសច្បាប់ ៣. ការដោះសម្លៀកបំពាក់ ដែលអំពើអមនុស្សធម៌បែបនេះ ធ្វើឲ្យខូចកិត្ថិយសស្ដ្រីដ៏ធ្ងន់ធ្ងរ ដែលមិនអាចលើកលែងទោសឲ្យបាន។ តំណាងយុវជនរូបនេះ បានសម្តែងពីអារម្មណ៍ខ្លួនយ៉ាងនេះថា៖ «ថ្វីដ្បិតតែខ្ញុំជាប្រុស ហើយបើទោះបីជាខ្ញុំមិនមែនជាសាច់ញាតិរបស់កញ្ញា សាសា ក៏ដោយ តែខ្ញុំពិតជាមិនអាចទទួលយកបានទេ ចំពោះទង្វើដ៏សាហាវឃោរឃៅរបស់ លោក សុខ ប៊ុន។ វាមិនសម ដែលខ្លួនជាបុរស ហើយមានមុខមាត់ មានលុយ និងមុខងារខ្ពស់ខ្ពស់ តែបែរជាហ៊ាន ប្រព្រឹត្តអំពើអមនុស្សធម៌យ៉ាងនេះសោះ» ។
បន្ថែមពីលើនេះ លោក អំ សំអាត ប្រធានផ្នែកបច្ចេកទេសស៊ើបអង្កេតរបស់អង្គការលីកាដូបានមានប្រសាសន៍ថា រូបលោកពិតជាតក់ស្លុត ពេលឃើញទិដ្ឋភាពបែបនេះ។ មន្រី្ដការពារសិទ្ធិមនុស្សរូបនេះថ្លែងពីការសោកស្តាយយ៉ាងនេះថា៖ «ខ្ញុំពិតជារន្ធត់មែនទែន ដែលឃើញបុរសហ៊ានប្រព្រឹត្តអំពើគ្មានមនុស្សធម៌ដល់ថ្នាក់នឹង ហើយជាពិសេសខ្លួនជាឧកញ៉ា មានលុយ មានទ្រព្យ មានកិត្តិយស មានចំណេះក្នុងសង្គមម្នាក់ តែបែរទៅវាយទាត់ធាក់លើស្ត្រីទៅវិញ។ វាជារឿងគួរឲ្យអាម៉ាស់មែនទែន ដែលយើងជាបុរសទៅធ្វើចឹងលើស្ត្រី។
មិនខុសពីអ្នកទាំងបីប៉ុន្មានទេ លោក ណេន ភារិទ្ធ តំណាងក្រុមយុវជនមួយរយកោដិសំឡេង បានបង្ហាញពីខកចិត្តថា រូបលោកមិនដឹងស្មានថា លោក សុខ ប៊ុន អាចធ្វើអំពើដូច្នេះបាន។ លោកបន្ថែមថា ក្នុងនាមយើងជាបុរស ទោះជាស្ថិតក្នុងស្ថានភាពបែបណាក៏ដោយ ក៏មិនត្រូវយកកំហឹងទល់នឹងកំហល់ដែរ ជាពិសេសជាមួយស្ត្រីតែម្តង។ តំណាងក្រុមយុវជនមួយរយកោដិសំឡេងរូបនេះ បន្ថែមបែបចំអកបែបនេះថា៖ «មិនគួរណាមនុស្សនេះ ក្លាយជាអ្នកមានកើត។ ខ្ញុំហួសចិត្ត ពេលឃើញវីដេអូហ្នឹង! ខ្ញុំនិយាយដោយត្រង់ ខ្ញុំមិនចង់ឃើញវីដេអូហ្នឹងទេ ខ្ញុំទ្រាំមើលទម្រាំចប់ ខ្ញុំតឹងទ្រូងណាស់ វាមិនគួរ មិនគួរណាគាត់ [លោក សុខ ប៊ុន] ហ៊ានធ្វើដល់ថ្នាក់នឹងកើត។ ទោះបីខ្ញុំមិនបានធ្វើមែន តែខ្ញុំខ្មាស់គេណាស់ ក្នុងនាមយើងជាបុរស ហើយមានងារដល់ឧកញ៉ាទៀត។ ទង្វើរបស់គាត់ ធ្វើឲ្យខូចឈ្មោះប្រុសផ្សេងទៀត ជាពិសេសខ្លួនឯងជាឧកញ៉ាផង វាធ្វើឲ្យប៉ះពាល់ដល់ឧកញ៉ាដដៃទៀត ដោយសារតែអំពើឥតពិចារណារបស់ខ្លួន»។
ក្រៅពីសម្តែងការសោកស្តាយ និងភាពអៀនខ្មាស់ចំពោះទង្វើរបស់បុរសដូចគ្នា ដែលប្រព្រឹត្តលើស្ដ្រីបែបនេះ បុរសទាំងបួននាក់សុទ្ធតែស្នើឲ្យស្ថាប័នពាក់ព័ន្ធ ជាពិសេសស្ថាប័នតុលាការ ពង្រឹងចាត់វិធានការ ក្នុងការដោះស្រាយរកយុត្តិធម៌ជូនជនរងគ្រោះឲ្យបានដាច់ខាត ដើម្បីផ្តល់ភាពកក់ក្តៅ និងការជឿទុកចិត្តដល់ប្រជាពលរដ្ឋ ហើយដើម្បីទប់ស្កាត់កុំឲ្យមានអំពើព្រៃផ្សៃបែបនេះ កើតមានលើស្ត្រីលើកក្រោយទៀត៕
© រក្សាសិទ្ធិដោយ thmeythmey.com