ជាតិ
សង្គមជាតិ
លោក ស ខេង៖ ច្បាប់ LANGO មិនប៉ះពាល់ដល់សិទ្ធិសេរីភាពរបស់អង្គការក្រៅរដ្ឋាភិបាលទេ
× ប្រធានក្រុមតំណាងរាស្ដ្របក្សកាន់អំណាច លោក ស ខេង បានថ្លែងថា ច្បាប់ LANGO មិនប៉ះពាល់ដល់សិទ្ធិសេរីភាពរបស់ក្រុមសង្គមស៊ីវិលនោះទេ។លោក ស ខេង និយាយបែបនេះ នៅក្នុងសម័យប្រជុំទី ៤ នៃរដ្ឋសភា នីតិកាលទី៥ ដែលប្រព្រឹត្តទៅនាពេលព្រឹក ថ្ងៃទី១៣ ខែ កក្កដានេះ។
រដ្ឋមន្ដ្រីក្រសួងមហាផ្ទៃ លោក ស ខេង ផ្តាំដល់អង្គការសង្គមស៊ីវិលទាំងអស់ ជាពិសេសសមាគម និងអង្គការក្រៅរដ្ឋាភិបាល កុំឲ្យព្រួយបារម្មណ៍ខ្លាំងពេក ពីការអនុម័តច្បាប់ LANGOពីព្រោះច្បាប់នេះ នឹងមិនរិតត្បិតសិទ្ធិសេរីភាពរបស់ពួកគេនោះទេ។ លោកបញ្ជាក់ថា ច្បាប់ LANGO មិនត្រឹមតែសមស្របតាមរដ្ឋធម្មនុញ្ញនៃព្រះរាជាណាចក្រកម្ពុជា មាត្រ៤២នោះទេ តែថែមទាំងស្របតាមច្បាប់អន្តរជាតិទៀតផង។ «កុំព្រួយបារម្មណ៍ ច្បាប់នេះមិនប៉ះពាល់ ឬរិតត្បិតសិទ្ធិសេរីអង្គការសង្គមស៊ីវិលនោះទេ»។ នេះជាការបញ្ជាក់របស់លោក ស ខេង។
លើសពីលោករដ្ឋមន្ត្រីក្រសួងមហាផ្ទៃ បាននិយាយបែបមិនយល់ថា ហេតុអ្វីបានបរទេសមួយចំនួនប្រឆាំងនឹងច្បាប់នេះ? «ច្បាប់នេះ យើងយកចេញពីប្រទេសដែលប្រឆាំងច្បាប់នេះទេ។ ហេតុអ្វីប្រទេសខ្លួនឯងមានបាន ឯកម្ពុជាមានមិនបាន»? នេះជាការបន្ថែមរបស់លោក ស ខេង។
រដ្ឋធម្មនុញ្ញនៃព្រះរាជាណាកចក្រកម្ពុជា មាត្រា ៤២ វាក្យខណ្ឌទី១ ចែងថា «ពលរដ្ឋខ្មែរមានសិទ្ធិបង្កើតសមាគម និងគណបក្សនយោបាយ។ សិទ្ធិនេះត្រូវកំណត់ក្នុងច្បាប់»។
ជាមួយគ្នានេះ លោក សួស យ៉ារ៉ា តំណាងរាស្ត្រគណបក្សប្រជាជនកម្ពុជា សម្តែងការសោកស្តាយ ដែលតំណាងរាស្ត្របក្សប្រឆាំងទាំង៥៥រូបពហិការមិនចូលប្រជុំរដ្ឋសភា។ លោកបញ្ជាក់យ៉ាងនេះថា៖«តំណាងរាស្ដ្រត្រូវបានប្រជាពលរដ្ឋបោះឆ្នោតផ្តល់សេចក្តីទុកចិត្ដ ....។ ប្រសិនបើខុសរដ្ឋធម្មនុញ្ញនៃព្រះរាជាណាចក្រកម្ពុជា ឬច្បាប់អន្តរជាតិ ចូលរួមក្នុងសភាលើកឡើងហើយដេញដោលគ្នាទៅ» ។
© រក្សាសិទ្ធិដោយ thmeythmey.com