ជាតិ
សង្គមជាតិ
ដំឡើងតំណែង ផ្ទេរភាកិច្ចមន្ត្រីនគរបាល១០៥នាក់ ក្នុងខេត្តកំពង់ធំ
× កំពង់ធំ៖ នាព្រឹកថ្ងៃទី១៣ ខែកក្កដា ខេត្តកំពង់ធំ សាលាខេត្តកំពង់ធំបានប្រារព្ធពិធីប្រកាសផ្ទេរភារកិច្ច តែងតាំងមុខតំណែង និងដំឡើងឋានន្តរសក្តិ ដល់មន្ត្រីនគរបាលខេត្ត។ ពិធីនេះប្រព្រឹត្តទៅនៅក្នុងសាលប្រជុំសាលាខេត្ត ដោយមានការចូលរួមពីលោកអភិបាលខេត្ត នាយឧត្តមសេនីយ៍ ចាន់ អ៊ាន អគ្គស្នងការរងនគរបាលជាតិ និងអ្នកចូលរួមផ្សេងទៀតប្រមាណ៥០០នាក់។
«ពិធីនេះប្រកាសផ្ទេរភារកិច្ច តែងតាំងមុខតំណែង និងដំឡើងឋានន្តរសក្តិនេះ បានស្នើឡើងពីមន្ត្រីនគរបាលខេត្ត ជូនទៅថ្នាក់លើដើម្បីតែងតាំងមន្ត្រីនគរបាលឱ្យសក្តិសមនឹងអតីតភាពការងារ»។ នេះបើតាមការថ្លែងឱ្យដឹងពីលោកវរសេនីយ៍ត្រី ថុន ប៊ុនថេង។ លោកបានបន្តថា មន្ត្រីនគរបាលដែលត្រូវប្រកាសតែងតាំង ផ្ទេរភារកិច្ច និងដំឡើងឋានន្តរសក្តិ សរុបចំនួន១០៥នាក់ ក្នុងនោះនគរបាលស្រីមានចំនួន៣នាក់។ ដោយឡែក មន្ត្រីនគរបាលដែលត្រូវផ្ទេរភារកិច្ច និងតែងតាំងមុខតំណែង មានចំនួន៣៨នាក់ (ស្រី១នាក់) ស្នងការរង២នាក់ នាយការិយាល័យ ៥នាក់ នាយរងការិយាល័យ ២៤នាក់ និងអធិការរង ៧នាក់។ លោកវរសេនីយ៍ត្រីបន្ថែមថា នៅក្នុងពិធីនេះដែរ មានដំឡើងឋានន្តរសក្តិដល់នគរបាលខេត្តចំនួន៦៧នាក់ (ស្រី២នាក់) ដែលនៅក្នុងនោះ ថ្នាក់វរសេនីយ៍ទោ ២៨នាក់ ថ្នាក់វរសេនីយ៍ត្រី ៣៧នាក់ និងថ្នាក់អនុសេនីយ៍ឯក ២នាក់។ លោកក៏បានបញ្ជាក់ផងដែរថា នៅក្នុងផ្ទេរភារកិច្ច ដើម្បីបំពេញបន្ថែមកន្លែងដែលខ្វះចន្លោះ ក្រោយពីមន្ត្រីនគរបាលមួយចំនួនបានចូលនិវត្តន៍។ មួយវិញទៀត ការដំឡើងឋានន្តរសក្តិ ត្រូវធ្វើឡើងតាមបទពិសោធន៍ការងារកន្លងមក ព្រមទាំងមានអតីតភាពការងារ ព្រមទាំងមានសមត្ថភាពក្នុងការបំពេញភារកិច្ច។
«នេះគឺបង្ហាញពីការចិត្តទុកដាក់ពីថ្នាក់លើចំពោះមន្ត្រីនគរបាលខេត្ត ចំពោះការបំពេញភារកិច្ចបានល្អ»។ នេះជាការបញ្ជាក់របស់លោកអធិការស្រុកកំពង់ស្វាយ ដែលបានចូលរួមក្នុងពិធីនោះ៕
© រក្សាសិទ្ធិដោយ thmeythmey.com