អន្តរជាតិ
សហរដ្ឋអាមេរិក៖ ប៉ូលិសមិនចាប់ខ្លួនស្ត្រីលួចអីវ៉ាន់ ថែមទាំងចំណាយប្រាក់ទិញរបស់ឲ្យថែមទៀត
×![]()
ដោយ: ធីតា
ប៉ូលិសអាមេរិកាំងម្នាក់ត្រូវមកចាប់ខ្លួនស្ត្រីមេម៉ាយអនាថាមួយរូបដែលជាម្តាយកូន ៦ នាក់ ពីបទលួច។ ប៉ុន្តែ ពេលមកដល់កន្លែងកើតហេតុប៉ូលិសរូបនេះបែរជាសម្រេចចិត្តមិនចាប់ខ្លួន ហើយទិញប្រដាប់ប្រដាប្រើប្រាស់ឲ្យកូនៗរបស់ស្ត្រីនោះទៅវិញ។
កាលពីដើមសប្តាហ៍មុន ស្ត្រីជាម្តាយអនាថានេះបានប៉ុនប៉ងលួចខោទឹកនោម កន្សែងសើមសម្រាប់កូនស្រីភ្លោះទាំងពីរដែលមានអាយុ ២ ឆ្នាំ និងអីវ៉ាន់ផ្សេងៗទៀតសម្រាប់កូនៗដែលមានតម្លៃជាទឹកប្រាក់សរុបប្រមាណ ៣០០ ដុល្លារ។ ប៉ុន្តែ គាត់ក៏ត្រូវម្ចាស់ហាងចាប់បាននៅនឹងកន្លែង ហើយគេក៏បានប្តឹងប៉ូលិស។ប៉ុន្តែនៅពេលដែលភ្នាក់ងារប៉ូលិសបមកដល់កន្លែងកើតហេតុ គាត់បានឃើញស្ត្រីនោះកំពុងតែយំជាមួយកូនស្រីទាំង ៦ របស់ខ្លួន។ ជនល្មើសបានរៀបរាប់ប្រាប់ប៉ូលិសថា គាត់រស់នៅក្នុងរថយន្តជាមួយកូនស្រី ចាប់តាំងពីស្វាមីរបស់គាត់បានលង់ទឹកស្លាប់កាលពីប៉ុន្មានឆ្នាំមុន។ ដោយរំជួលចិត្តនឹងរឿងដ៏កំសត់របស់ស្ត្រីនេះ និងដោយសង្កេតឃើញថា កូនស្រីបីនាក់របស់ស្ត្រីដ៏កំសត់នេះមិនមានស្បែកជើងពាក់ភ្នាក់ងារប៉ូលិស Mark Engravalleមិនបានចាប់ខ្លួនស្ត្រីជាម្តាយនេះទេ។ ផ្ទុយទៅវិញ បុរសរូបនេះបានត្រឡប់ទៅកាន់ហាងលក់ទំនិញវិញជាមួយក្មេងស្រី ដើម្បីទិញប្រដាប់ប្រដាប្រើប្រាស់ចាំបាច់ ដោយទុកឲ្យក្មេងៗជាអ្នករើស។
ប៉ូលិស Mark បាននិយាយថា៖ « ម្ចាស់ហាងអាចចាត់ទុកថាគាត់ជាជនល្មើស ប៉ុន្តែ ខ្ញុំយល់ឃើញថា គាត់គ្រាន់តែជាម្តាយមួយរូបដែលកំពុងឆ្លងកាត់ដំណាក់កាលដ៏លំបាកមួយក្នុងជីវិតប៉ុណ្ណោះ » ។ អ្នកស្រី Sarah Robinson បានសម្តែងនូវក្តីដឹងគុណយ៉ាងខ្លាំងចំពោះភ្នាក់ងារប៉ូលិសដែលមិនត្រឹមតែមិនចាប់បញ្ជូនគាត់ទៅកាន់មន្ទីរឃុំឃាំង ហើយថែមទាំងបានទិញរបស់របរប្រើប្រាស់ឲ្យកូនស្រីគាត់ទៀត។
នៅពេលនេះ ប៉ូលិសតំបន់Roeland Park បានទទួលជំនួយជាទឹកប្រាក់ចំនួន ៦ ០០០ ដុល្លារដើម្បីជួយអ្នកស្រី Sarah និងកូនៗរបស់គាត់៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
