អន្តរជាតិ
នយោបាយអន្តរជាតិ
អាមេរិកត្រៀមផ្តល់យន្តហោះចម្បាំង F-33 ឲ្យអ៊ីស្រាអែលលួងចិត្តរឿងកិច្ចព្រមព្រៀងអ៊ីរ៉ង់
× ខណៈពេលដែលប្រធានាធិបតីអាមេរិកលោក បា រ៉ាក់អូបាម៉ា ប្រឹងប្រែងរុញកិច្ចព្រមព្រៀងកម្មវិធីនុយក្លេអ៊ែរអ៊ីរ៉ង់ទៅសភាដើម្បីផ្តល់សច្ចាប័ន រដ្ឋមន្ត្រីការពារជាតិអាមេរិកស្រាប់តែទៅទស្សនកិច្ចនៅអ៊ីស្រាអែល។ ប្រមុខការពារជាតិអាមេរិក បានជួបជាមួយសមភាគីអ៊ីស្រាអែលដោយលោកព្យាយាមលួងលោមអ៊ីស្រាអែលកុំបារម្ភខ្លាំងពីកិច្ចព្រមព្រៀងអ៊ីរ៉ង់ ហើយលោកក៏សន្យាថារដ្ឋាភិបាលអាមេរិកនឹងផ្តល់អាវុធទំនើបៗបំផុតនិងគាំទ្រអ៊ីស្រាអែលឲ្យផុតពីការគំរាមកំហែងនានាផង។
លោក មុំ ពិទូរ្យ លម្អិតព័ត៌មាននេះ
អ៊ីស្រាអែលនិងសម្ព័ន្ធមិត្តអាមេរិកនៅមជ្ឈិមបូព៌ាមួយចំនួនជាពិសេសអារ៉ាប៊ីសាអូឌីត និងហ្សកដានី បានប្រតិកម្មនិងបង្ហាញការមិនពេញចិត្តចំពោះសកម្មភាពរដ្ឋាភិបាលក្រុងវ៉ាស៊ីនតោនដែលព្យាយាមបង្កើតកិច្ចព្រមព្រៀងនុយក្លេអ៊ែរជាមួយក្រុងតេហេអ៊ីរ៉ង់កន្លងមក។ នាយករដ្ឋមន្ត្រីអ៊ីស្រាអែលព្យាយាមដង្ហើយឲ្យសភាអាមេរិកទាត់ចោលកិច្ចព្រមព្រៀងអ៊ីរ៉ង់ ខណៈលោក អូបាម៉ា ព្រមានជាមុនថាលោកនឹងប្រើអំណាចជំទាស់ក្នុងនាមជាប្រធានាធិបតីដើម្បីប្រឆាំងសមាជិកសភាដែលមានចេតនារារាំងកិច្ចព្រមព្រៀងនេះ។
យ៉ាងណាក៏ដោយ លោក អូបាម៉ា មិនអាចធ្វើឲ្យអ៊ីស្រាអែលទើសទាល់ចិត្តខ្លាំងឡើយ។ ខណៈដែលលោក បន្តស្នើឲ្យសភាផ្តល់សច្ចាប័នកិច្ចព្រមព្រៀង លោកបានបញ្ជូនប្រមុខការទូតរបស់លោកទៅមជ្ឈិមបូព៌ា ពោលគឺទៅទស្សនកិច្ចនៅប្រទេសបីដែលជាសម្ព័ន្ធមិត្តយូរអង្វែងរបស់អាមេរិក មានអ៊ីស្រាអែល អារ៉ាប៊ីសាអូឌីត និងហ្សកដានី។ នេះបញ្ជាក់ច្បាស់ថា អាមេរិកព្យាយាមលួងលោមឲ្យសម្ព័ន្ធមិត្តខ្លួនជាពិសេសអ៊ីស្រាអែលស្ងប់ចិត្ត កុំបារម្ភរឿងកិច្ចព្រមព្រៀងនុយក្លេអ៊ែរអ៊ីរ៉ង់ទៀត។
រដ្ឋមន្ត្រីការពារជាតិអាមេរិកលោក Ashton Carter មានវត្តមានក្នុងទីក្រុង Tel Aviv ប្រទេសអ៊ីស្រាអែលកាលពីម្សិលមិញ ពោលគឺត្រឹមមួយសប្តាហ៍ក្រោយមហាអំណាច៦ ជាមួយអ៊ីរ៉ង់សម្រេចកិច្ចព្រមព្រៀងនេះ។ លោកបានជួបពិភាក្សាជាមួយប្រមុខការពារជាតិអ៊ីស្រាអែលលោក Moshe Ya’alon ដោយផ្តោតលើបញ្ហាសន្តិសុខនិងកិច្ចសហប្រតិបត្តិការការពារជាតិរវាងសម្ព័ន្ធមិត្តទាំងពីរ។
លោក Carter បានប្រាប់ទៅសមភាគីអ៊ីស្រាអែលថា សហរដ្ឋអាមេរិកនៅតែប្តេជ្ញាជួយជ្រោមជ្រែងវិស័យការពារជាតិអ៊ីស្រាអែលនិងបន្តផ្តល់សព្វាវុធទំនើប បន្ថែមដល់អ៊ីស្រាអែលដើម្បីរក្សាសន្តិសុខរបស់ខ្លួនឲ្យបានរឹងមាំ។
អ្វីដែលសំខាន់ក្នុងកិច្ចសន្ទនា ប្រមុខការពារជាតិអាមេរិកបានបង្ហើបថា សហរដ្ឋអាមេរិកសន្យាថានឹងផ្តល់យន្តហោះចម្បាំងទំនើបចុងក្រោយF-33 ឲ្យអ៊ីស្រាអែល ហើយមានតែអ៊ីស្រាអែលមួយប៉ុណ្ណោះទេ ដែលខ្លាចជារដ្ឋដំបូង និងជារដ្ឋតែមួយនៅមជ្ឈិមបូព៌ាដែលមានយន្តហោះប្រភេទនេះប្រើប្រាស់។ គេអាចនិយាបានថា យន្តហោះប្រដេញ F-33 ជាប្រភេទយន្តហោះទំនើបបំផុតរបស់អាមេរិក ដែលមិនទាន់មានប្រទេសណាប្រើប្រាស់នៅឡើយទេ។ ការផ្តល់យន្តហោះនេះនឹងជួយកងកម្លាំងជើងអាកាសអ៊ីស្រាអែលឲ្យមានឥទ្ធិពលខ្លាំងក្លា អាចការពារសន្តិសុខរបស់ខ្លួនបានយ៉ាងមានប្រសិទ្ធភាពខ្ពស់។ ក្រៅពីផ្តល់សព្វាវុធទំនើបៗ រដ្ឋមន្ត្រីការពារជាតិខាងលើ បានបន្ថែមទៀតថា ទាំងប្រធានាធិបតីនិងគណរដ្ឋមន្ត្រីទាំងមូល ប្តេជ្ញាថានឹងជួយបង្កើនសមត្ថភាពយោធាអ៊ីស្រាអែលឲ្យនៅតែខ្លាំងនិងមានឥទ្ធិពលផុតគេប្រចាំតំបន់ជារៀងរហូត ហើយបើចាំបាច់អាមេរិកអាចកៀងគរកការគាំទ្រពីបណ្តាសម្ព័ន្ធមិត្តផ្សេងៗដើម្បីការពារសន្តិសុខអ៊ីស្រាអែលថែមទៀត។
សូមបញ្ជាក់ថា វត្តមានរបស់ប្រមុខការពារជាតិអាមេរិកនៅមជ្ឈិមបូព៌ា កើតឡើងស្របពេលដែលសមាជិកក្រុមប្រឹក្សាសន្តិសុខអង្គការប្រជាជាតិបោះឆ្នោតឯកច្ឆ័នគាំកិច្ចព្រមព្រៀងនុយក្លេអ៊ែរអ៊ីរ៉ង់ជាមួយមហាអំណាច៦ដែរ៕
Tag:
លោក បា រ៉ាក់អូបាម៉ា
អាមេរិក និងអ៊ីស្រាអែល
© រក្សាសិទ្ធិដោយ thmeythmey.com