លោក កឹម សុខា នឹងទាក់ទងលោក ស ខេង

ជាតិ

នយោបាយជាតិ

លោក កឹម សុខា នឹងទាក់ទងលោក ស ខេង

25, Jul 2015 , 2:37 pm

រូបភាព

ដោយ: ថ្មីៗ

នៅពេលដែលលោក សម រង្ស៊ី កំពុងអវត្តមាននៅក្នុងប្រទេសកម្ពុជា លោក កឹម សុខា គឺជាប្រធានស្តីទីនៃគណបក្សសង្គ្រោះជាតិ និងក៏ជាប្រធានស្តីទីនៃក្រុមសំឡេងភាគតិចនៅក្នុងរដ្ឋសភាផងដែរ។

លោក យ៉ែម បុញ្ញឬទ្ធិ អ្នកនាំពាក្យរបស់គណបក្សសង្គ្រោះជាតិ បានប្រាប់សារព័ត៌មានថ្មីៗថា នៅពេលនេះលោក កឹម សុខា កំពុងជួបជាមួយមន្ត្រីទូតដើម្បីពិភាក្សាអំពីស្ថានការណ៍នយោបាយចុងក្រោយ ពិសេសទាក់ទងនឹងការកាត់ទោសសហការី និងអ្នកគាំទ្រគណបក្សសង្គ្រោះជាតិទាំង១១នាក់។ បន្ទាប់មក បើតាមអ្នកនាំពាក្យដដែល លោក កឹម សុខា ក៏គ្រោងទាក់ទងជាមួយលោក ស ខេង ដែលប្រធានក្រុមតំណាងរាស្ត្រសំឡេងភាគច្រើនក្នុងរដ្ឋសភាដែរ។

«យើងមានមធ្យោបាយច្រើននៃការទាក់ទង។ អាចទាក់ទងតាមទូរសព្ទ។ ការទាក់ទងនេះគឺដើម្បីបន្ធូរបន្ថយស្ថានភាពតានតឹង»។ នេះជាការអត្ថាធិប្បាយរបស់អ្នកនាំពាក្យគណបក្សសង្គ្រោះជាតិ ដែលបន្តបញ្ជាក់បន្ថែមថា៖«ការកាត់ទោសសហការីរបស់ខ្លួនកន្លងទៅថ្មីៗនេះពីសំណាក់តុលាការ នឹងមិនធ្វើឲ្យប៉ះពាល់ដល់វប្បធម៌សន្ទនារវាងគណបក្សទាំងពីរនោះឡើយ។ តែយើងត្រូវតាមដានការអនុវត្តនីតិវិធីរបស់តុលាការវិញ»។