លោកហ៊ុន សែន ទៅសម្ពោធ ស្ពានតាខ្មៅ នៅថ្ងៃចន្ទដើមសប្តាហ៍ក្រោយ

ជាតិ

លោកហ៊ុន សែន ទៅសម្ពោធ ស្ពានតាខ្មៅ នៅថ្ងៃចន្ទដើមសប្តាហ៍ក្រោយ

30, Jul 2015 , 8:19 am

រូបភាព

ដោយ: ថ្មីៗ

លោក នាយករដ្ឋមន្ត្រីហ៊ុន សែន នឹងអញ្ជើញជាអធិបតីភាព បើកសម្ពោធដាក់ឲ្យប្រើប្រាស់ជាផ្លូវការស្ពានមិត្តភាពកម្ពុជា-ចិនតាខ្មៅ ដែលឆ្លងកាត់ទន្លេបាសាក់ និងផ្លូវតភ្ជាប់ពីផ្លូវជាតិលេខ២ទៅផ្លូវជាតិលេខ១ ប្រវែង១១.៩៥គីឡូម៉ែត្រ នៅថ្ងៃទី៣ ខែសីហាដើមសប្តាហ៍ក្រោយ។

ដើម្បីត្រៀមរៀបចំពិធីសម្ពោធ និងធ្វើការលាងសម្អាតផ្លូវ ស្ពានព្រមទាំងលាបគំនូសចរាចរណ៍ថ្មីឡើងវិញ ក្រសួងសាធារណការ និងដឹកជញ្ជូន នឹងផ្អាកការធ្វើចរាចរណ៍ឆ្លងកាត់ផ្លូវមួយចំនួននៅម្តុំស្ពាននេះ ចាប់ពីម៉ោង៦ព្រឹកថ្ងៃទី ២ខែសីហា រហូតដល់ម៉ោង១១ និង៣០នាទីថ្ងៃទី៣ខែសីហា។

បើយោងតាមសេចក្តីជូនដំណឹងរបស់ក្រសួងសាធារណការ និងដឹកជញ្ជូន ចាប់ពីម៉ោង៦ព្រឹកថ្ងៃទី ២ខែសីហា ដល់ម៉ោង១១ និង៣០នាទីថ្ងៃទី៣ខែសីហា ហាមមិនឲ្យរថយន្តធុនធ្ងន់គ្រប់ប្រភេទធ្វើចរាចរណ៍លើផ្លូវជាតិលេខ២៣(១១៥)ត្រង់ចំណុចផ្លូវបំបែកពីផ្លូវជាតិលេខ២ ត្រង់PK-១៤ ភ្ជាប់នឹងផ្លូវជាតិលេខ១ ត្រង់PK-១២ និងស្ពានមិត្តភាពកម្ពុជា-ចិនតាខ្មៅ។
ចំពោះរថយន្តធុនតូច ឬរថយន្តទេសចរណ៍មិនអនុញាតឲ្យធ្វើចរាចរណ៍ឆ្លងកាត់ ចាប់ពីម៉ោង៣ទៀបភ្លឺ រហូតដល់ម៉ោង១១ និង៣០នាទីថ្ងៃទី៣ខែសីហា។ នេះបើតាមសេចក្តីជូនដំណឹងដដែល៕