ជាតិ
តើគុណភាពព័ត៌មាននៅកម្ពុជាកំពុងធ្លាក់ចុះឬ ?
សេរីភាពសារព័ត៌មាននៅកម្ពុជា គឺជាប្រធានបទពិភាក្សាដ៏ចម្រូងចម្រាសមួយដែលត្រូវបានជជែកជារៀងរាល់ឆ្នាំ។ ប៉ុន្តែប្រធានបទសំខាន់មួយទៀត ដែលទាក់ទងនឹងការវិវត្តផ្នែកគុណភាពនៃព័ត៌មានកម្ពុជា មិនត្រូវបានគេនិយាយដល់ឡើយ។ មតិមួយចំនួនបានវាយតម្លៃអំពីការធ្លាក់ចុះនៃគុណភាពព័ត៌មាននៅកម្ពុជា។
ទំនើបកម្មនៃប្រព័ន្ធព័ត៌មានវិទ្យា បានអនុញ្ញាតឲ្យមានការចែករំលែកព័ត៌មានលឿនរហ័សក៏ពិតមែន។ ប៉ុន្តែការណ៍នេះមិនបានធ្វើឲ្យលោក អ៊ូ រិទ្ធី ស្ថាបនិក Politikoffee ពេញចិត្តទាំងស្រុងនោះឡើយ។ លោក អ៊ូ រិទ្ធី សំដែងការសោកស្តាយទៅវិញ នៅពេលដែលការប្រណាំងប្រជែងនៃល្បឿនផ្តល់ព័ត៌មាន បានធ្វើឲ្យបាត់បង់ខ្លឹមសារនៃព័ត៌មានទៅវិញនោះ។ លោក រិទ្ធី ពន្យល់យ៉ាងដូច្នេះថា៖«ជាពិសេសសារព័ត៌មានអនឡាញ (Online News)។ កាសែតប្រញាប់តែប្រាប់ព្រឹត្តិការណ៍ពេក ដូច្នេះវាបាត់បង់ភាពលម្អិត។ នេះជាការព្រួយបារម្ភរបស់ខ្ញុំ។ កាសែតមួយចំនួនក៏មិនដែលមានអត្ថបទវែង ស៊ីជម្រៅ ឬអត្ថបទស៊ើបអង្កេតគួរឲ្យចាប់អារម្មណ៍ឡើយ»។ បើតាមការកត់សម្គាល់របស់ស្ថាបនិក Politikoffee រូបនេះ សារព័ត៌មានសព្វថ្ងៃកំពុងមាននិន្នាការផ្តោតតែលើហេតុការណ៍ដែលកើតឡើង ដែលសង្គមហ្វេសប៊ុកក៏អាចផ្តល់បានដូចគ្នា។
ការធ្លាក់ចុះ ឬការដើរថយក្រោយមួយទៀត ដែលលោក ហេង ភក្តី ដែលជាស្ថាបនិកនៃវិទ្យាស្ថាន Enrich បានមើលឃើញនោះ គឺការបោកបញ្ឆោតអ្នកអាន។ លោក ហេង ភក្តី កំពុងនិយាយអំពីក្រុមអ្នកសារព័ត៌មានដែលមិនគោរពវិជ្ជាជីវៈមួយចំនួន ដែលគិតតែធ្វើចំណងជើងភូតកុហកអ្នកអានដោយគ្រាន់តែចង់ទាក់ទាញចំណាប់អារម្មណ៍ពួកគេតែប៉ុណ្ណោះ។
ព័ត៌មានស្តីពីតារាសិល្បៈ ក៏ជារឿងដ៏គួរចាប់អារម្មណ៍ខ្លាំងដែរនៅក្នុងសង្គមបច្ចុប្បន្ន។ ហេតុដូច្នេះហើយ ដើម្បីគ្រាន់តែធ្វើឲ្យអត្ថបទរបស់ខ្លួនត្រូវបានចាប់អារម្មណ៍នោះ តារាសំដែងកញ្ញា ខៅ អាលីយ៉ា កត់សម្គាល់អ្នកកាសែតមួយចំនួនសរសេរអត្ថបទតាមចិត្ត ឬតាមអារម្មណ៍របស់ពួកគេដោយមិនបានទាក់ទងតារា ឬសិល្បៈករ សិល្បការិនីផ្ទាល់ទេ។ មូលហេតុមួយដែលអ្នកកាសែតអង្គុយសរសេរដោយចិត្តខ្លួនឯងដោយគ្មានការបញ្ជាក់ពីសិល្បៈករ ឬសិល្បៈការិនីនោះ គឺ«ការទាក់ទងមិនបាន»។
កញ្ញា អាលីយ៉ា បន្តថា៖ «ជាធម្មតាបើអ្នកជាអ្នកអានព័ត៌មានអ្នកអាចយល់ថាអ្នកកាសែតនោះសរសេរតាមអ្វីដែលគាត់បានសម្ភាសន៍ជាមួយតារា។ តែបទពិសោធន៍ដែលខ្ញុំធ្លាប់ជួបគឺគាត់សរសេរតាមអារម្មណ៍របស់គាត់ប៉ុណ្ណោះ»។
បើនិយាយអំពីការយល់ឃើញរបស់អ្នកស្រី ទេព វន្នី សកម្មជនតវ៉ាដីធ្លីនៅតំបន់បឹងកក់វិញ កម្ពុជាពិតជាមានអ្នកកាសែតវិជ្ជាជីវៈ និងផ្សាយព័ត៌មានពិត។ បើតាមការពន្យល់របស់អ្នកស្រី វន្នី បើទោះជារដ្ឋាភិបាលមានឥទ្ធិពលលើប្រព័ន្ធផ្សព្វផ្សាយយ៉ាងច្រើនយ៉ាងក៏ដោយ អង្គភាពព័ត៌មានព័ត៌មានឯករាជ្យមួយចំនួននៅតែបានផ្សាយអំពីសកម្មភាពនៃការតវ៉ារបស់ក្រុមអ្នកស្រី។ ដូច្នេះសម្រាប់អ្នកស្រី ស្ថានភាពសារព័ត៌មានរបស់កម្ពុជាមានលក្ខណៈប្រសើរឡើង។
អ្នកស្រី វណ្ណី បញ្ជាក់ថា៖ «អ្នកកាសែតឯករាជ្យ បាននិយាយការពិត មិនខ្លាចការគៀបសង្កត់ពីខាងរដ្ឋាភិបាលដូចពីមុនទេ។ ហើយពួកគាត់បានចូលរួមជួយផ្តល់សំឡេងដល់ជនរងគ្រោះដូចជាអ្នកដែលត្រូវបានរំលោភយកដីធ្លី ករណីប្រាក់ខែកម្មកររោងចក្រ ឬក៏រាយការណ៍ពីអំពើរពុករលួយផ្សេងៗហើយសំខាន់បំផុតគឺពាក់ព័ន្ធនឹងការរំលោភសិទ្ធិមនុស្ស»។
ក្រុមអ្នកកាសែតអាជីពពិតជាមាន ប៉ុន្តែក្រុមនេះមានចំនួនតិចតួច ហើយក៏មិនបានកើនឡើងច្រើនឡើយ ខណៈក្រុមហ៊ុនព័ត៌មានថ្មី បានបន្តកើតមានឥតដាច់។ ខ្វះអ្នកកាសែតជំនាន់ថ្មីដែលត្រូវបណ្តុះបណ្តាលច្បាស់លាស់ បន្ទាប់មកអង្គភាពព័ត៌មានមួយដែលផ្តោតខ្លាំងតែទៅលើការរកចំនូលដោយមិនខ្វល់ពីការអនុវត្តគោលការណ៍ក្រមសីលធម៌ សកម្មភាពទាំងពីរនេះពិតជាកំពុងធ្វើឲ្យគុណភាពព័ត៌មាន និងអំណាចព័ត៌មាននៅកម្ពុជាធ្លាក់តម្លៃ៕
ដោយ សេង ធី
© រក្សាសិទ្ធិដោយ thmeythmey.com