ជាតិ
ស្ត្រីខ្មែររងគ្រោះ២រូបទៀត ត្រូវបានជួយសង្គ្រោះពីប្រទេសម៉ាឡេស៊ី
× ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី បានជួយសង្គ្រោះស្ត្រីខ្មែររងគ្រោះ២រូបទៀត ដែលត្រូវបានមេខ្យល់នាំយកទៅបម្រើការតាមផ្ទះនៅម៉ាឡេស៊ី ឲ្យត្រឡប់មកកម្ពុជាវិញ។ ពួកគេនឹងមកដល់កម្ពុជានៅម៉ោង ៣និង៥៥ នាទីរសៀលថ្ងៃទី៣១ខែកក្កដាស្អែកនេះ នៅអាកាសយានដ្ឋានអន្តរជាតិភ្នំពេញ។ នេះជាការបញ្ជាក់របស់ លោក ជុំ សុន្ទរី អ្នកនាំពាក្យក្រសួងការបរទេសកម្ពុជា។
បើតាមអ្នកនាំពាក្យដដែល ស្ត្រីរងគ្រោះទាំង២នាក់នោះ មានឈ្មោះ អ៊ុយ មុំ មានស្រុកកំណើតនៅភូមិ ត្រពាំងព្រេច ឃុំត្រពាំងក្រសាំង ស្រុកបាទី ខេត្តតាកែវ និងឈ្មោះ សុខ សំអុល នៅភូមិមេសរប្រច័ណ្ឌ ឃុំមេសរប្រចណ្ឌ័ ស្រុកពារាំង ខេត្តព្រៃវែង។
លោក ជុំ សុន្ទរី ក៏បានគូសបញ្ជាក់ដែរថា បច្ចុប្បន្នក្រសួងហើយនិងស្ថានឯកអគ្គរាជទូតកម្ពុជា ប្រចាំនៅម៉ាឡេស៊ី បាន និងកំពុងមមាញឹកក្នុងការខិតខំជួយសង្គ្រោះស្ត្រីខ្មែរ ដែលចាញ់បោកមេខ្យល់យកទៅបម្រើការងារនៅប្រទេសម៉ាឡេស៊ី ឲ្យវិលត្រឡប់មកកាន់មាតុប្រទេសវិញជាបន្តបន្ទាប់។
ក្រសួងក៏អំពាវនាវដល់ពលរដ្ឋខ្មែរ ជាពិសេសស្ត្រីខ្មែរដែលជាជនងាយរងគ្រោះ ត្រូវមានការប្រុងប្រយ័ត្ន ចំពោះការឆបោក ការសន្យាភូតកុហក និងការបញ្ចុះបញ្ចូលពីសំណាក់មេខ្យល់ ដែលមានគំនិតទុច្ចរិត ក្នុងការនាំបងប្អូនទៅធ្វើការដោយខុសច្បាប់នៅក្រៅប្រទេស៕
Tag:
ស្ត្រីខ្មែររងគ្រោះ
© រក្សាសិទ្ធិដោយ thmeythmey.com