កីឡាជាតិ
ង៉យ ស្រ៊ីន រងរបួសធ្ងន់ ខណៈភ្នំពេញក្រោនឈរលើតារាងបណ្តោះអាសន្ន
× ង៉យ ស្រ៊ីន នៃក្លិបភ្នំពេញក្រោន ត្រូវបញ្ជូនទៅមន្ទីរពេទ្យ បន្ទាប់ពីខ្សែការពាររូបនេះ បានរងរបួសបាក់ដៃនាអំឡុងនៃការប្រកួតជាមួយបៀលប្រាយយូណាយធីតក្នុងសប្តាហ៍ទី៩នៃក្របខណ្ឌមិត្តហ្វូនខេមបូឌានលីក នៅកីឡដ្ឋាន RSN កាលពីល្ងាចថ្ងៃពុធ។ ក្លិបភ្នំពេញក្រោនមិនទាន់បានបញ្ជាក់ពីស្ថានភាពរបស់ ង៉យ ស្រ៊ីន ឡើយនៅព្រឹកថ្ងៃព្រហស្បតិ៍។
ករណីគ្រោះថ្នាក់របស់ ង៉យ ស្រ៊ីន គឺជាករណីទីបីហើយនៅក្នុងយុទ្ធនាការប្រកួតក្របខណ្ឌមិត្តហ្វូនខេមបូឌានលីកឆ្នាំ២០១៥ ពោលគឺបន្ទាប់ពីខ្សែការពារ James Michealរបស់ស្វាយរៀង ដែលបានឆ្អឹងកជើងនាអំឡុងនៃការប្រកួតជាមួយបឹងកេតអង្គរនៅស្តាតចាស់ និងខ្សែការពារ សុខ រិទ្ធី របស់ណាហ្គាវើល ដែលបានបាក់ឆ្អឹងកដៃ នាអំឡុងនៃការប្រកួតជាមួយខេមបូឌានថាយហ្គឺរនៅមជ្ឈមណ្ឌលបាល់ទាត់បាទី។
នាការប្រកួតកាលពីម្សិលមិញ ភ្នំពេញក្រោន បានឡើងទៅឈរលើកំពូលតារាងបណ្តោះអាសន្ន ក្រោយខ្សែបម្រើអាហ្វ្រិកខាងត្បូង Shane Booysen ស៊ុតបាល់បញ្ចូលទីនាំជ័យជម្នះ ១-០ លើភ្ញៀវបៀលប្រាយយូណាយធីត។
អគ្គស្នងការដ្ឋាននគរបាលជាតិ ឡើងទៅកាន់ចំណាត់ថ្នាក់លេខបី ក្រោយជ័យជម្នះ ៣-០ លើវេស្ទើនភ្នំពេញនៅមជ្ឈមណ្ឌលបាល់ទាត់ជាតិបាទី ដែលសម្រេចបានដោយ នួន បូរី, Yuske Ishii និង Oseika Samuel។
នៅកីឡដ្ឋានខេត្តស្វាយរៀង ក្រុមម្ចាស់ផ្ទះបានទទួលជ័យជម្នះ ២-១ លើគិរីវង់សុខសែនជ័យ។ Dzarma Bata បានស៊ុតបាល់បញ្ចូលទីទាំង២គ្រាប់សម្រាប់ស្វាយរៀង ខណៈSuma Mustapha ជាអ្នករកគ្រាប់បាល់ឲ្យគិរីវង់។ ស្វាយរៀងឡើងទៅកាន់តំបន់ Top 4 ស្របពេលដែលគិរីវង់មិនទាន់មានកំណត់ត្រាឈ្នះការប្រកួតឡើយ៕
© រក្សាសិទ្ធិដោយ thmeythmey.com