អន្តរជាតិ
នយោបាយអន្តរជាតិ
អាហ្វហ្កានីស្ថានប្រកាសពីមរណភាពរបស់មេដឹកនាំជាន់ខ្ពស់តាលីបង់ mollah Omar
×
នៅល្ងាច ថ្ងៃពុធម្សិលមិញ អាជ្ញាធរអាហ្វហ្កានីស្ថានបានប្រកាសថា មេជាន់ខ្ពស់ក្រុមតាលីបង់ ម៉ូឡា អូម៉ា បានទទួលមរណភាពហើយ។ ស្អែកនេះ ក្រុមតាលីបង់និងអាជ្ញាធរអាហ្វហ្កានីស្ថានត្រូវបន្តការចរចាសន្តិភាព ជាមួយគ្នាជាថ្មី។ ដូច្នេះ មរភាពរបស់មេដឹកនាំតាលីបង់ដ៏ធំនេះ អាចនឹងធ្វើអោយការចរចាសន្តិភាពកាន់តែស្មុគស្មាញ។
មេដឹកនាំ តាលីបង់ដ៏ធំ ម៉ូឡា អូម៉ា គឺជាអ្នកដែលធ្លាប់បានជួយអោយមេភេរវកម្មប្រឆាំងអាមេរិក អ៊ូសាម៉ា បិនឡាដិន ជ្រកកោនស្នាក់នៅ។ យោងតាមផ្នែកចារកិច្ចអាហ្វហ្កានីស្ថាន ម៉ូឡា អូម៉ា បានស្លាប់ក្នុងមន្ទីរពេទ្យមួយកន្លែង នៅក្រុងការ៉ាឈី ប្រទេសប៉ាគីស្ថាន កាលពីខែមេសា ឆ្នាំ២០១៣ ក្នុងស្ថានភាពដ៏អាថ៌កំបាំង។ មន្ត្រីអាហ្វហ្កានីស្ថានម្នាក់ សុំមិនបញ្ចេញឈ្មោះ បានប្រាប់សារព័ត៌មានបារាំង AFPថា ម៉ូឡា អូម៉ាស្លាប់ដោយសារជំងឺ។
ក្រុមតាលីបង់ មិនបានគូសបញ្ជាក់ជាផ្លូវការថា តើម៉ូឡា អូម៉ា នៅរស់រឺក៏ស្លាប់ទេ។ គេចាំបានថា មេដឹកនាំជាន់ខ្ពស់រូបនេះបានរត់គេចខ្លួនតាំងពីឆ្នាំ២០០១ម្ល៉េះ។ ប៉ុន្មានខែចុងក្រោយនេះ សកម្មជនប្រយុទ្ធតាលីបង់ជាច្រើននាក់បានទាមទារភស្តុតាងបង្ហាញថា មេដឹកនាំរបស់ខ្លួនរូបនេះពិតជានៅរស់ពិតមែន ហើយពិតជាចង់ចរចាជាមួយអាជ្ញាធរអាហ្វហ្កានីស្ថានពិតមែន។
ពេលនេះ ក្រុមតាលីបង់កំពុងតែបែកបាក់គ្នា។ សកម្មជនប្រយុទ្ធមួយចំនួនបានចុះចូលជាមួយក្រុមជីហាតរដ្ឋអ៊ីស្លាមដែល កំពុងចង់វាតទីអាហ្វហ្កនីស្ថាន។ ដំណឹងពីមរណភាពម៉ូឡា អូម៉ា រឹតតែបង្កការលំបាកដល់ការចរចាសន្តិភាពជាមួយរដ្ឋាភិបាល អាហ្វហ្កានីស្ថាន ដែលត្រូវបន្តធ្វើនៅថ្ងៃសុក្រ ៣១កក្កដានេះ៕
© រក្សាសិទ្ធិដោយ thmeythmey.com