ព័ត៍មានសុខភាព
សុខភាព៖ ចង់ឱ្យប្រព័ន្ធភាពស៊ាំ កាន់តែខ្លាំង គួរតែអានអត្ថបទមួយនេះ
×
តើអ្នកធ្លាប់ឆ្លល់ទេថា ហេតុអ្វីបានជាអ្នកចេះតែឈឺ? វាអាចជាការផ្តាសាយ ដោយសារចាញ់អាកាសធាតុ ឆ្លងជំងឺពីកន្លែងណាមួយ ឬអាចដោយសារតែ អាហារដែលអ្នកញ៉ាំ។ កត្តាអស់ទាំងនេះ ហើយបូករួមនឹង បញ្ហាប្រព័ន្ធភាពស៊ាំ ចុះខ្សោយទៀតនោះ សុទ្ធតែងាយធ្វើឱ្យអ្នក ឈឺខ្លាំងណាស់។
ធម្មតា ប្រព័ន្ធភាពស៊ាំរបស់យើង អាចមានភាពរឹងមាំបាននោះ អាស្រ័យទៅតាមអាហារ ដែលអ្នកទទួលទាន និងប្រភេទអាហារនោះដែរ។ ដូច្នេះ យើងខ្ញុំនឹងបង្ហាញអំពី អាហារសំខាន់ៗ ដែលអាចជួយអ្នក ទប់ស្កាត់ការកើតជំងឺបានច្រើនដែរ។ រឿងដំបូងគេ គឺអាហារដែលអ្នកទទួលទានតែម្តង នោះគឺបន្លែ និងផ្លែឈើស្រស់ៗ ជាពិសេស អាហារដែលសម្បូរ អង់ទីអុកស៊ីដង់តែម្តង។ អង់ទីអុកស៊ីដង់ គឺជាជីវជាតិ វីតាមីន និងជាតិរ៉ែ ដែលមាននាទីការពារកោសិកា ពីការវាយប្រហាររបស់វីរុស និងការមានរបួសផ្សេងៗ ដែលបណ្តាលមកពី រ៉ាឌីកាល់សេរី។ អង់ទីអុកស៊ីដង់ ដ៏សំខាន់បំផុត ចំនួនបីប្រភេទនោះ មានដូចជា វីតាមីន C, E និង Beta-carotene។
ជីវជាតិទាំងនេះ មានក្នុងបន្លែ និងផ្លែឈើពណ៌លឿង ទឹកក្រូច ស្វាយ ក្រហម ខៀវ ហើយគួរតែញ៉ាំឆៅ ទើបទទួលបានលទ្ធផលល្អបំផុត។
• អាហារសម្បូរវីតាមីន C មានដូចជា ប្រូខូលី ផ្កាខាត់ណា បឺរី ទំពាំងបាយជូ ស្វាយ ផ្លែគីវី ក្រូច ម្ទេសប្លោក ស្ត្របឺរី ដំឡូងផ្អែម ប៉េងប៉ោះ។
• អាហារសម្បូរវីតាមីន E មានដូចជា ស្វាយ ល្ហុង សណ្តែកដី ប្រូខូលី ស្ពៃស្ពីណាច ការ៉ុត ល្ពៅ គ្រាប់ផ្កាឈូករ័ត្ន ម្ទេសប្លោកក្រហម។
• អាហារសម្បូរ Beta-carotene មានដូចជា ប្រូខូលី ការ៉ុត ពោត ម្ទេសប្លោកពណ៌បៃតង អាព្រីកូត ល្ពៅ ឪឡឹក ស្ពៃស្ពីណាច ដំឡូងផ្អែមជាដើម។
• អាហារផ្សេងៗទៀត ដែលសម្បូរអង់ទីអុកស៊ីដង់ដែរនោះ មានដូចជា ខ្ទឹមបារាំង សណ្តែក ត្រប់វែង ទំពាំងបាយជូរក្រហម ផ្លែប៉ោម។
ក្រៅពីវីតាមីន មានអង់ទីអុកស៊ីដង់ ប្រភេទផ្សេងៗទៀត ដូចជា សេឡេញ៉ូម និងស័ង្គសីដែរ។ អាហារសម្បូរជាតិសេឡេញ៉ូម មានដូចជា ត្រីធូណា សាច់បក្សី ផលិតផលធ្វើពីគ្រាប់ធញ្ញជាតិ។ អាហារសម្បូរជាតិស័ង្គសី មានដូចជា អាហារធ្វើពីទឹកដោះគោ អយស្ទ័រ អាហារសមុទ្រ សាច់ក្រហម សណ្តែក សាច់ និងសាច់បក្សីជាដើម។
ដើម្បីទទួលបាន ថាមពលប្រព័ន្ធភាពស៊ាំទ្វេដង យ៉ាងពេញលេញនោះ អ្នកក៏គួរតែយកចិត្តទុកដាក់ លើគុណភាពអាហារ ដែលអ្នកញ៉ាំដែរ។ ចូរចៀសវាងអាហារកែច្នៃ និងព្យាយាមរៀបចំអាហារ ញ៉ាំដោយខ្លួនឯងវិញ ទើបជាការល្អ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com