ជាតិ
សង្គមជាតិ
នគរចម្ប៉ារងឥទ្ធិពលសាសនាឥស្លាមតាមរយៈជំនួញនឹងពួកអារ៉ាប់ លោក Tran KY Phuong អ្នកប្រវត្តិសាស្រ្ត និងសិល្បៈចាម
× សៀមរាប៖ នៅសម័យដើម សាសនាព្រហ្មញ្ញមានឥទ្ធិពលខ្លាំងមកលើប្រទេសក្នុងតំបន់ ក្នុងនោះមានប្រទេសកម្ពុជាជាដើម។ ចម្ប៉ា ដែលគេស្គាល់ថាជាប្រទេសមួយ តែបានបាត់បង់ទឹកដីទៅវិញ ដោយសារវៀតណាម ក៏គោរពប្រតិបត្តិសាសនាព្រហ្មញ្ញយ៉ាងខ្ជាប់ខ្ជួនដែរ។ យ៉ាងណា បើតាមការបញ្ជាក់ពីអ្នកប្រវត្តិសាស្ត្រ ចម្ប៉ា បានរងឥទ្ធិពលពីសាសនាឥស្លាមមួយផ្នែកធំ ដោយសារការធ្វើជំនួញផ្លូវទឹកនឹងពួកអារ៉ាប់។
យោងតាមកំណត់ត្រាអ្នកជំនួញចិន និងអារ៉ាប់ អ្នកជំនួញចាមមានទំនាក់ទំនងគ្នានឹងពួកអារ៉ាប់ ចាប់ពីសតវត្សទី៨មក។ ត្រង់នេះហើយ ដែលអាចឲ្យគេយល់បានថា សាសនាឥស្លាមបានជ្រៀតចូលមកប្រទេសចម្ប៉ា តាំងពីពេលនោះមក ហើយអ្នកជំនួញជនជាតិចាមមួយចំនួន បានទទួលយកសាសនាឥស្លាមជំនួសព្រហ្មញ្ញសាសនា។
តាមការបញ្ជាក់របស់លោកសាស្ត្រចារ្យ Tran Ky Phuong អ្នកប្រវត្តិសាស្ត្រ និងសិល្បៈចាម មកពីប្រទេសវៀតណាម ពុំមានភស្តុតាងណាជាក់លាក់ ដែលបញ្ជាក់ថា រាជវង្សានុវង្សនៃនគរចម្ប៉ា បោះបង់សាសនាព្រហ្មញ្ញឡើយ។ លោកបន្ថែមថា រហូតដល់ដើមសតវត្សទី១៩ ដែលនគរចម្ប៉ាបាត់បង់ទឹកដី ពូជរាជវង្សនៅតែបន្តគោរពប្រតិបត្តិសាសនាព្រហ្មញ្ញ ហើយរហូតមកដល់បច្ចប្បន្ននេះ បើទោះជាជនជាតិចាមមួយចំនួនគោរពប្រតិបត្តិសាសនាឥស្លាមក៏ពិតមែន តែពួកគេនៅតែរងសំណល់ពីសាសនាព្រហ្មញ្ញជាដដែល។ មានន័យថា ការគោរពគឺនៅមានលាយគ្នា រវាងសាសនាព្រហ្មញ្ញ និងសាសនាឥស្លាម។
ក្រោយពីបាត់បង់ទឹកដីទាំងស្រុងនៅដើមសតវត្សទី១៩ ជនជាតិចាមត្រូវគេដឹងថា បានរត់ភៀសខ្លួនទៅរស់នៅប្រទេសផ្សេងៗ ក្នុងនោះមានកម្ពុជាជាដើម។ បច្ចុប្បន្ន មានជនជាតិចាមប្រមាណ ១២ម៉ឺននាក់ប៉ុណ្ណោះ ដែលកំពុងរស់នៅលើទឹកដីកំណើតរបស់ខ្លួន ដែលស្ថិតក្រោមការគ្រប់គ្រងរបស់វៀតណាម។ លោក Tran Ky Phuong អះអាងថា ទាំងភាសា ទំនៀមទំលាប់ ប្រពៃណីសាសនា មានការផ្លាស់ប្តូរ សម្រាប់ជនជាតិចាម មិនថារស់នៅក្នុង និងក្រៅប្រទេសនោះ។
ក្នុងបទបង្ហាញស្តីពីប្រវតិ្តសាស្ត្រចាម និងទំនាក់ទំនងរវាងសិល្បៈ វប្បធម៌ ខ្មែរ-ចាម ដែលរៀបចំឡើងដោយអាជ្ញាធរជាតិអប្សរា កាលពីថ្ងៃទី៣០ កក្កដាកន្លងទៅ លោក Tran Ky Phuong មិនអាចបញ្ជាក់ពីទំហំទឹកដីនគរចម្ប៉ា ដែលបានបាត់បង់នោះបានទេ។ លោកពន្យល់ថា ទឹកដីនគរចម្ប៉ា គឺជាទឹកដីអំណោយផលផ្នែកជំនួញ ព្រោះទឹកដីលាតសន្ធឹងទ្រវែងតាមបណ្តោយទន្លេ និងស្ថិតនៅវៀតណាមកណ្តាលសព្វថ្ងៃនេះ។ ជនជាតិចាម ភាគច្រើនគឺជាអ្នកជំនួញ ដែលមានទំនាក់ទំនងល្អជាមួយចិន ម៉ាឡេស៊ី និងកម្ពុជាជាដើម។
គួរបញ្ជាក់ថា ជនជាតិចាមរស់នៅក្នុងប្រទេសកម្ពុជាបច្ចុប្បន្ន មានប្រមាណ ៦០ម៉ឺននាក់។ អ្នកស្រាវជ្រាវវប្បធម៌ចាមខ្លះអះអាងថា ពួកគេបានបែងចែកជាពីរពួក ទីមួយគឺចាមបុរាណ និងចាមសម័យ។ ចាមបុរាណ គឺជាជនជាតិចាមមានវ័យចំណាស់ ហើយដែលនៅអាចរក្សាវប្បធម៌ប្រពៃណីខ្លួនបាន តែពួកនេះ មានចំនួនតិចតួចប៉ុណ្ណោះ។ ដោយឡែកចាមសម័យ គឺមានចំនួនច្រើន ហើយដែលពួកគេរងឥទ្ធិពលសាសនាខ្លាំងពីប្រទេសអារ៉ាប់៕
© រក្សាសិទ្ធិដោយ thmeythmey.com