ជាតិ
សង្គមជាតិ
គ្រឿងញៀនជិត៨០គីឡូក្រាម ត្រូវបានអាជ្ញាធរបង្ក្រាបបានក្នុងរយៈពេល៧ខែ
× នៅក្នុងរយៈពេល៧ខែឆ្នាំ២០១៥នេះ មន្ទីរប្រឆាំងគ្រឿងញៀនសហការជាមួយការិយាល័យប្រឆាំងគ្រឿងញៀននៅតាមរាជធានី-ខេត្ត បង្ក្រាបគ្រឿងញៀនបាន១២៨២ករណី ចាប់គ្រឿងញៀនបានជិត៨០គីឡូក្រាម និងចាប់ឃាត់ខ្លួនជនសង្ស័យបាន២៥២១នាក់។ តូលេខនេះ ត្រូវបានប្រកាសនៅក្នុងពិធីផ្ទេរក្របខ័ណ្ឌមន្ត្រីការិយាល័យកណ្តាលនគរបាលយុត្តិធម៌និងសន្តិសុខ ទៅក្នុងក្របខ័ណ្ឌមន្ត្រីនគរបាលនៅការិយាល័យប្រឆាំងគ្រឿងញៀន។
គេហទំព័រអគ្គស្នងការនគរបាលជាតិ បានស្រង់ប្រសាសន៍លោក នេត សាវឿន អគ្គស្នងការនគរបាលជាតិថា ចាប់ពីពេលនេះទៅ មន្ត្រីនគរបាលប្រឆាំងគ្រឿងញៀនណាដែលមានសមត្ថភាព និងស្នាដៃក្នុងការបង្ក្រាបចាប់ខ្លួនបានជនល្មើសគ្រឿងញៀន នឹងទទួលបានការលើកទឹកចិត្ត ដំឡើងឋានន្តរស័ក្តិ ផ្តល់ប័ណ្ណសរសើរ និងថវិកាមួយចំនួនផងដែរ។ លោក នេត សាវឿន បានគូសបញ្ជាក់ដែរថា អគ្គស្នងការនគរបាលជាតិ មិនចង់ឃើញមន្ត្រីណារួមដៃឃុបឃិតជាមួយជនល្មើស ហើយត្រូវបានចាប់ខ្លួនពាក់ព័ន្ធនឹងការជួញដូរ និងចែកចាយគ្រឿងញៀនោះទេ។
អគ្គស្នងការនគរបាលជាតិ បានដាក់ចេញនូវគោលការណ៍មួយចំនួន ទៅដល់កងកម្លាំងនគរបាលផងដែរ ដើម្បីទប់ស្កាត់បទល្មើសនានាទាក់ទងនឹងគ្រឿងញៀន ដូចជាបង្កើនការទប់ស្កាត់ការផលិត និងបង្ក្រាបទីតាំងផលិតកែច្នៃគ្រឿងញៀន ទប់ស្កាត់ការជួញដូរ ការចែកចាយគ្រឿងញៀននៅតាមច្រកព្រំដែន ច្រកផ្លូវទឹក និងផ្លូវអាកាស និងទប់ស្កាត់ការប្រើប្រាស់ និងបង្ក្រាបទីតាំងប្រើប្រាស់គ្រឿងញៀន៕
© រក្សាសិទ្ធិដោយ thmeythmey.com