ជាតិ
សង្គមជាតិ
អាជ្ញាធរអប្សរាបញ្ជាក់ថាខ្លួនគ្មានសមត្ថកិច្ចហាមឃាត់ការពាក់ឯកសណ្ឋានយោធាចូលប្រាសាទទេ រូបភាព៖ ហ្វេសប៊ុក
× សៀមរាប៖ បន្ទាប់ពីមានការស្តីបន្ទោសស្ថាប័នអាជ្ញាធរអប្សរា ថាបានបណ្តែតបណ្តោយឲ្យមន្ត្រីយោធាវៀតណាម ពាក់ឯកសណ្ឋានចូលប្រាសាទអង្គរវត្តរួចមក នៅថ្ងៃនេះអាជ្ញាធរអប្សរា បានចេញមុខបកស្រាយ និងបានពន្យល់ពីសមត្ថកិច្ចរបស់ខ្លួន។ បើតាមអាជ្ញាធរអប្សរា ខ្លួនមានសមត្ថកិច្ចត្រឹមការហាមឃាត់ការស្លៀកពាក់ស៊ិចស៊ីចូលប្រាសាទតែប៉ុណ្ណោះ។
ក្នុងសេចក្តីបំភ្លឺដែលចេញផ្សាយនៅថ្ងៃទី ៣១ កក្កដានេះ អាជ្ញាធរអប្សរាដែលមានតួនាទីគ្រប់គ្រង និងអភិរក្សរមណីយដ្ឋានអង្គរ សម្តែងការមិនពេញចិត្តចំពោះការចោទប្រកាន់មកលើស្ថាប័នខ្លួន ថាបានបណ្តោយឲ្យយោធាម្នាក់ ពាក់ឯកសណ្ឋានយោធាឡើងរូតបាកាណ នៃប្រាសាទអង្គរវត្ត។ អាជ្ញាធរអប្សរា តាមការពន្យល់ពីប្រធាននាយកដ្ឋានផ្សព្វផ្សាយ លោក ឡុង កុសល បានបញ្ជាក់ថា អាជ្ញាធរអប្សរាមានសមត្ថកិច្ចត្រឹមហាមឃាត់ភ្ញៀវទេសចរ ដែលមានសំលៀកបំពាក់មិនសមរម្យ ឫស៊ិចស៊ីចូលក្នុងប្រាសាទតែប៉ុណ្ណោះ ដោយឡែកគ្មានសម្រាប់ហាមភ្ញៀវទេសចរ ស្លៀកពាក់ឯកសណ្ឋានយោធាចូលនោះទេ។
ថ្មីៗនេះ បណ្តាញសង្គមហ្វេសប៊ុក បានបង្ហោះរូបភាពបុរសម្នាក់ពាក់ឯកសណ្ឋានយោធាក្នុងប្រាសាទខ្មែរ និងថា អាជ្ញាធរអប្សរា បណ្តោយយោធាម្នាក់នោះ ចូលដោយអនាធិបតេយ្យ ដែលធ្វើឲ្យប៉ះពាល់ដល់វប្បធម៌ខ្មែរ។ ករណីនេះ លោក ឡុង កុសល បានថ្កោលទោស និងថាព័ត៌មានទាំងនោះមានបំណងមិនល្អវាយប្រហារ ដល់ស្ថាប័នអាជ្ញាធរអប្សរា។ លោក កុសល បានចាត់ទុកព័ត៌មានទាំងនោះ ថាបានអត្ថាធិប្បាយក្នុងន័យបំពុលសង្គម និងឲ្យមហាជនគិតមិនល្អដល់អាជ្ញាធរអប្សរា។ ប្រធាននាយកដ្ឋានផ្សព្វផ្សាយនៃអាជ្ញាធរអប្សរា ស្នើឲ្យពលរដ្ឋ ត្រូវចេះថ្លឹងថ្លែងមុននឹងអត្ថាធិប្បាយអ្វីមួយ។
«តាមរយៈកិច្ចប្រឹងប្រែងរបស់ក្រុមការងាររៀបចំផែនការគ្រប់គ្រងទេសចរណ៍អង្គរ (TMP) នៃអាជ្ញាធរជាតិអប្សរា បានបង្កើតក្រមប្រតិបត្តិសម្រាប់ភ្ញៀវទេសចរគ្រប់រូប ដែលចូលមកទស្សនារមណីយដ្ឋានអង្គរ។ ក្រុមប្រតិបត្តិនេះមាន៧ចំណុចសំខាន់ៗគឺ ការស្លៀកបំពាក់ខើចខ្លីមិនសមរម្យ ការប៉ះពាល់រូបចម្លាក់ដែលមានសញ្ញាហាមឃាត់ ការអង្គុយលើបង្កាន់ដៃដែលផុយស្រួយ ការថតរូបបង្ហាញអវៈយវៈមិនសមរម្យ ការជក់បារី ការចូលទៅកាន់តំបន់គ្រោះថ្នាក់ដែលហាមឃាត់ និងសកម្មភាពបំផ្លិចបំផ្លាញដល់ចម្លាក់ឬរចនាសម្ព័ន្ធប្រាសាទ។ ទន្ទឹមនឹងនេះ ការបំពងសំឡេង ឬស្រែកច្រៀងឡូឡាជាដើមក្នុងតំបន់ប្រាសាទ ដែលធ្វើឲ្យប៉ះពាល់ដល់ភ្ញៀវទេសចរដទៃក៏ត្រូវបានហាមឃាត់ផងដែរ»។ នេះជាខ្លឹមសារចុងក្រោយ នៃសេចក្តីបំភ្លឺរបស់អាជ្ញាធរអប្សរា៕
© រក្សាសិទ្ធិដោយ thmeythmey.com