ជាតិ
សង្គមជាតិ
សាលារាជធានីអំពាវនាវពលរដ្ឋទុកដាក់សំរាមឲ្យត្រឹមត្រូវ ស្របពេលភ្លៀងធ្លាក់
×![]()
ដោយ: ថ្មីៗ
សាលារាជធានីភ្នំពេញអំពាវនាវប្រជាពលរដ្ឋ និងអាជីវករចូលរួមថែរក្សាអនាម័យ ទុកដាក់ សំរាមឲ្យបានត្រឹមត្រូវល្អ កុំទម្លាក់ចូលតាមប្រឡាយ និងលូទឹក ដើម្បីសុខភាពរស់នៅ និងចៀសវាងបញ្ហាកកស្ទះលូទៅថ្ងៃក្រោយ។ ការអំពាវនាវនេះ ធ្វើឡើងស្របពេល ភ្នំពេញ, រាជធានីចតុមុខរបស់ព្រះរាជាណាចក្រកម្ពុជា ទទួលរងការលិចលង់ដោយសារទឹកជំនន់ទឹកភ្លៀងកាលពីយប់ម្សិលមិញ។
ផ្លូវតូច ធំ និងគេហដ្ឋានស្ទើរគ្រប់ទីកន្លែងបានលិចទឹកភ្លៀងមួយរយៈធំកាលពីយប់ ថ្ងៃទី១ខែសីហាម្សិលមិញ។ អ្នករាជធានីភ្នំពេញខកចិត្ត និងសម្តែងការខឹងសម្បារប្រឆាំងនឹងអាជ្ញាធររាជធានីភ្នំពេញដែលមិនបាន ដោះស្រាយបញ្ហាទឹកលិចរាជធានី។
ឆ្លើយតបនឹងមតិនេះ សាលារាជធានីភ្នំពេញ ផ្សាយលើទំព័រហ្វេសប៊ុកផ្លូវការរបស់ខ្លួន អំពីស្ថានភាពទឹកភ្លៀងនៅរាជធានីភ្នំពេញកាលពីថ្ងៃសុក្រ និងថ្ងៃសៅរ៍កន្លងមកនេះថា ភ្លៀង ម្សិលមិញ មានកម្ពស់ទឹករហូតដល់ ១០៣មីលីម៉ែត្រ ជាកំពស់អតិបរមាមិនធ្លាប់មានពីមុន«ពីមុនខ្ពស់ត្រឹម ៨០មីលីម៉ែត្រប៉ុណ្ណោះ ដែលជាទូទៅ កំរិតទឹកភ្លៀងលើសពី ៣០មីលីម៉ែត្រ គឺជាការគំរាមភ្នំពេញហើយ»។ នេះជាការផ្សាយរបស់សាលារាជធានី ទៅដល់សាធារណជន ពិសេសគឺ អ្នករស់នៅភ្នំពេញ។
ជាមួយគ្នានេះ សាលារាជធានីបានស្នើប្រជាពលរដ្ឋយោគយល់ នឹងចូលរួមទាំងអស់គ្នា ដើម្បីបញ្ចៀសគ្រោះជំនន់ទឹកភ្លៀង ក្នុងទីក្រុងអោយបានឆាប់រហ័ស។ «ដូចយើង បានឃើញស្រាប់ហើយ គឺសាលាក្រុងកំពុងរៀបចំដាក់ប្រព័ន្ឋលូធំថ្មី បញ្ហាទឹកជំនន់ក្នុងរាជធានីនឹងទប់ស្កាត់ បាននៅពេលដែលប្រព័ន្ឋលូធំថ្មីត្រូវបានរៀបចំរួចស្រេចនៅពេលខាងមុខ»។ នេះជាការផ្សាយបញ្ជាក់របស់សាលារាជធានី៕
© រក្សាសិទ្ធិដោយ thmeythmey.com
