ជាតិ
លោក ហ៊ុន សែន ប្រាប់ លោក អូបាម៉ា កុំឲ្យភ័យរឿងផែនទីទម្លាក់គ្រាប់បែកនៅកម្ពុជា
×![]()
ពីរសប្តាហ៍ហើយ គេនៅមិនទាន់ទទួលចម្លើយពីរដ្ឋាភិបាលអាមេរិក អង់គ្លេស និងបារាំងនៅឡើយ ទាក់ទងនឹងការស្នើសុំខ្ចីផែនទីកម្ពុជា របស់លោកនាយករដ្ឋមន្ត្រី ហ៊ុន សែន។ ប្រមុខរដ្ឋាភិបាលកម្ពុជាបានត្រលប់មកនិយាយអំពីរឿងខ្ចីផែនទីកម្ពុជាពីមហាអំណាចទាំង៣ឡើងវិញ ក្នុងឱកាសដែលលោកសម្ពោធស្ពានតាខ្មៅដែលជាជំនួយរបស់ចិន។
សូមស្ដាប់សំឡេង៖
សូមស្ដាប់សំឡេង៖
លោកនាយករដ្ឋមន្ត្រី ហ៊ុន សែន សំដៅរដ្ឋាភិបាលអាមេរិកមុនគេ ដោយបញ្ជាក់ប្រាប់លោកប្រធានាធិបតី បារ៉ាក់ អូបាម៉ា ថាកម្ពុជាមិនសួររកផែនទីដែលអាមេរិកបានគូរដើម្បីទម្លាក់គ្រាប់បែកលើកម្ពុជានោះឡើយ។ ប្រមុខរដ្ឋាភិបាលកម្ពុជាផ្តាំទៅលោក អូបាម៉ា ថា លោកត្រូវការតែផែនទីខ្មែរពិតប្រាកដដែលអាមេរិកបានទទួលពីរដ្ឋលេខាធិការក្រសួងការបរទេស លោក ហួត សម្បត្តិ កាលពីសម័យមុន។
ឆ្លើយតបនឹងសារព័ត៌មានថ្មីៗនៅថ្ងៃចន្ទទី៣សីហានេះទាក់ទងនឹងការស្នើសុំខ្ចីផែនទីខ្មែរពីរដ្ឋាភិបាលកម្ពុជានេះ អ្នកនាំពាក្យស្ថានទូតអាមេរិក លោក Jay Raman មានប្រសាសន៍ថា៖«នៅពេលនេះ យើងមិនមានព័ត៌មានបន្ថែមទាក់ទងនឹងការស្នើសុំផែនទីរបស់លោកនាយករដ្ឋមន្ត្រីឡើយ»។
នៅក្នុងការអត្ថាធិប្បាយរបស់លោកនៅព្រឹកថ្ងៃចន្ទនេះដែរ លោក ហ៊ុន សែន មិនច្បាស់ថារដ្ឋាភិបាលអង់គ្លេស ពិតជានៅមានផែនទីរបស់កម្ពុជានោះឡើយ ប៉ុន្តែថាលោកនៅតែសាកល្បងសរសេរស្នើសុំខ្ចីផែនទីរបស់កម្ពុជាពី លោកនាយករដ្ឋមន្ត្រី ដេវីដ ខេមេរ៉ុន ក្រែងលោអង់គ្លេសនៅមានផែនទីនោះ។
ការអត្ថាធិប្បាយទាក់ទងនឹងការស្នើសុំខ្ចីផែនទីរបស់កម្ពុជានេះ ស្ថានទូតអង់គ្លេសប្រចាំកម្ពុជាបានសរសេរឆ្លើយមកសារព័ត៌មានថ្មីៗយ៉ាងដូច្នេះ៖«លិខិតរបស់លោកនាយករដ្ឋមន្ត្រីកម្ពុជាត្រូវបានបញ្ជូនទៅទីក្រុងឡុងដ៏ហើយ ហើយយើងនឹងឆ្លើយតបលិខិតនេះទៅតាមពេលវេលាសមស្រប»។
ពីស្ថានទូរបារាំងវិញ ទីប្រឹក្សាទី១នៃស្ថានទូតបារាំងលោក Alain FORTIN បានឆ្លើយប្រាប់សារព័ត៌មានថ្មីៗថា៖«រដ្ឋាភិបាលបារាំងបានទទួលការស្នើសុំផ្លូវការពីរដ្ឋាភិបាលកម្ពុជាហើយ។ ការស្នើសុំនេះកំពុងស្ថិតនៅក្នុងការពិចារណា»។
ការឆ្លើយតបរបស់ស្ថានទូតបារាំងធ្វើឡើង ខណៈលោកនាយករដ្ឋមន្ត្រីថ្លែងច្បាស់ៗ និងប្រាកដក្នុងចិត្តថា «បារាំងត្រូវតែមានផែនទីនេះ ពីព្រោះបារាំងគឺជាអ្នកគូរផែនទីនេះ»។
ការឆ្លើយតបយ៉ាងណាពីប្រទេសមហាអំណាចទាំង៣ គេមិនទាន់ដឹងនៅឡើយទេ ខណៈកម្ពុជាបានរកឃើញផែនទី១៨ផ្ទាំង ដែលសុទ្ធសឹងតែជាផែនទីដែលកម្ពុជាបានប្តឹងអាមេរិកទៅអង្គការសហប្រជាជាតិ អំពីការទម្លាក់គ្រាប់បែកនៅកម្ពុជា៕
Tag:
លោក ហ៊ុន សែន
អាមេរិក
កម្ពុជា-វៀតណាម
© រក្សាសិទ្ធិដោយ thmeythmey.com
