អន្តរជាតិ
នយោបាយអន្តរជាតិ
សមាជិកសភាអាមេរិកភាគច្រើនត្រៀមបោះឆ្នោតទាត់ចោលកិច្ចព្រមព្រៀងនុយក្លេអ៊ែរអ៊ីរ៉ង់
×![]()
សមាជិកសភាអាមេរិកភាគច្រើនត្រៀមបោះឆ្នោតអនុម័តសេចក្តីសម្រេចមួយដើម្បីរាំងខ្ទប់កិច្ចព្រមព្រៀងកម្មវិធីនុយក្លេអ៊ែរអ៊ីរ៉ង់ជាមួយមហាអំណាច៦ ដែលការបោះឆ្នោតនេះត្រូវធ្វើឡើងមុនថ្ងៃ១៧ខែកញ្ញាខាងមុខនេះ។ ប្រសិនសេចក្តីសម្រេចរាំងខ្ទប់កិច្ចព្រមព្រៀងត្រូវអនុម័តជាផ្លូវការនោះ កិច្ចព្រមព្រៀងត្រៀមដកទណ្ឌកម្មប្រឆាំងអ៊ីរ៉ង់នោះមិនអាចអនុវត្តបានឡើយ។ ប៉ុន្តែប្រធានាធិបតីបារ៉ាក់ អូបាម៉ាត្រៀមប្រើប្រាស់អំណាចជំទាស់ដើម្បីទាត់ចោលរាល់ការសេចក្តីសម្រេចរបស់សមាជិកសភាដែលប្រឆាំងកិច្ចព្រមព្រៀង។
កាលពីម្សិលមិញ សមាជិកចំនួន ២១៨នាក់ ប្រកាសថាខ្លួនត្រៀមលក្ខណៈរួចរាល់ហើយដើម្បីបោះឆ្នោតអនុម័តសេចក្តីសម្រេចមួយដែលរាំងខ្ទប់ការផ្តល់សច្ចារប័នលើកិច្ចព្រមព្រៀងកម្មវិធីនុយក្លេអ៊ែរអ៊ីរ៉ង់រវាងអ៊ីរ៉ង់និងមហាអំណាច៦ដែលសម្រេចបានកាលពីខែមុន។ ក្រោយមហាអំណាច៦ និងអ៊ីរ៉ង់ ឯកភាពគ្នាទទួលយកកិច្ចព្រមព្រៀងមួយ អ៊ីរ៉ង់អាចមានលទ្ធភាពកសាងទំនាក់ទំនងការទូត នយោបាយ និងសេដ្ឋកិច្ចជាមួយពិភពខាងក្រៅ ហើយ អ៊ីរ៉ង់អាចរួចផុតពីទណ្ឌកម្មរបស់សហរដ្ឋអាមេរិកផងដែរ។
សមាជិកសភាទាំងខាងលើ សុទ្ធតែសមាជិកសាធារណរដ្ឋ ហើយពួកគេបង្ហាញការមិនពេញចិត្តចំពោះកិច្ចព្រមព្រៀងនុយក្លេអ៊ែរដែលរដ្ឋបាលលោក បារ៉ាក់ អូបាម៉ា សម្រេចបានកន្លងមកឡើយ។ សមាជិកសភាបក្សសាធារណរដ្ឋ Peter Roskam បានលើកឡើងថា សមាជិកគណបក្សលោកមិនពេញចិត្តកិច្ចព្រមព្រៀងនុយក្លេអ៊ែរអ៊ីរ៉ង់បច្ចុប្បន្នបានឡើយ ព្រោះកិច្ចព្រមព្រៀងនេះមិនអាចរារាំងអ៊ីរ៉ង់ផលិតអាវុធនុយក្លេអ៊ែរឡើយ។ លោកបានសង្កត់ធ្ងន់ថា វាជាបញ្ហា ហើយអាមេរិកនៅមានពេលដើម្បីបង្កើតកិច្ចព្រមព្រៀងដែលប្រសើរជាងនេះ ប្រសិនបើអាមេរិកដើរចេញពីតុចរចាលើកនេះ។
លទ្ធភាពនៃការសម្រេចអនុម័តដំណោះស្រាយរារាំងកិច្ចព្រមព្រៀងអ៊ីរ៉ង់អាចមានខ្ពស់ដែរ ព្រោះក្រោយបោះឆ្នោតពាក់កណ្តាលអាណត្តិឆ្នាំមុន សមាជិកបក្សសាធារណរដ្ឋបានដណ្តើមអាសនៈភាគច្រើននៅសភាទាំងពីរ។ ដើម្បីសម្រេចបានសេចក្តីសម្រេចនេះត្រូវការសំឡេគាំទ្រ ២ភាគ៣នៃសមាជិកសភាសរុប៤៣៥ អាចនិយាយបានថាស្មើចំនួន ២៩០ សំឡេង។ ប៉ុន្តែបញ្ហានៅត្រង់ថា ប្រធានាធិបតីអាមេរិក លោក បារ៉ាក់ អូបាម៉ា បានព្រមានរួចជាស្រេចហើយថា លោកនឹងប្រើប្រាស់អំណាចជំទាស់ក្នុងនាមជាប្រធានាធិបតីដើម្បីទាត់ចោលរាល់ការប្រឆាំងរបស់សមាជិកសភា។ លោកប្រឹងប្រែងធ្វើយ៉ាងណាដើម្បីរក្សាកិច្ចព្រមព្រៀងនេះដើម្បីទុកជាកេរ្តិ៍មរតករបស់លោក មុនបញ្ចប់អាណត្តិឆ្នាំក្រោយនេះ។
ក្នុងប្រព័ន្ធនយោបាយអាមេរិក ករណីប្រធានាធិបតីប្រើប្រាស់អំំណាចជំទាស់ ដើម្បីជម្នះអំណាចជំទាស់នេះ វាតម្រូវឲ្យមានសំឡេងសមាជិកសភាគាំទ្រ ២ភាគ៣ នៅសភាទាំងពីរ ។ នេះជាឧបសគ្គធំសម្រាប់ក្រុមសមាជិកសភាបក្សសាធារណរដ្ឋ ប្រសិនបើគ្មានសមាជិកគណបក្សប្រជាធិបតេយ្យណាមួយចូលរួមទេនោះ។ នេះក៏ព្រោះថាពួកគេមិនអាចរកសំឡេងគ្រប់ ២ភាគ ៣ ៕
Tag:
សភាអាមេរិក
នុយក្លេអ៊ែរអ៊ីរ៉ង់
© រក្សាសិទ្ធិដោយ thmeythmey.com
