ជាតិ
សង្គមជាតិ
ការលុបបំបាត់ពលកម្មកុមារមានភាពស្មុគស្មាញនិងទាមទារអ្នកចូលរួមច្រើន
× សៀមរាប៖ ពលកម្មកុមារនៅកម្ពុជា មាននៅលើវិស័យកសិកម្ម និងនេសាទ។ អ្នកជំនាញអះអាងថា ការលុបបំបាត់ពលកម្មកុមារកម្ពុជា គឺមានភាពស្មុគស្មាញ និងត្រូវរៀបចំកម្មវិធីចម្រុះដើម្បីដោះស្រាយ មានដូចជាការផ្តល់ការអប់រំ និងផ្តល់ជំនាញវិជ្ជាជីវៈជាដើម។
នាយកគម្រោងលុបបំបាត់ការកេងប្រវ័ញ្ចពលកម្មកុមារតាមរយៈការផ្តល់ការអប់រំ និងការគាំទ្រជីវភាព ហៅកាត់ថា អ៊ិចសែល នៃអង្គការទស្សនៈពិភពលោក (World Vision) លោកស្រី Imalda Ochavillo បានឲ្យដឹងថា គេពិបាកកំណត់តួលេខជាក់លាក់ពីចំនួនពលកម្មកុមារកម្ពុជាណាស់ ព្រោះថាវាមានភាពស្មុគស្មាញ។ លោកស្រីពន្យល់ថា៖« ការសិក្សារបស់វិទ្យាស្ថានស្ថិតិក្នុងឆ្នាំ២០១២ គឺជាតួលេខទូទាំងប្រទេស ហើយគាត់ក៏មិនបានសិក្សាឲ្យស៊ីជម្រៅ ថាពលកម្មកុមារនៅលើវិស័យកសិកម្មមានប៉ុន្មាន វិស័យនេសាទមានប៉ុន្មាននោះដែរ»។
យោងតាមការសិក្សារបស់វិទ្យាស្ថានសិ្ថតិ នៃក្រសួងផែនការ និងអង្គការពលកម្មអន្តរជាតិ ក្នុងឆ្នាំ២០១២ មានកុមារអាយុចន្លោះពី ៥ទៅ១៧ឆ្នាំ ជិត២០% ស្មើនឹង ៧៥៥,២០០នាក់ បានចូលរួមធ្វើការងាររកប្រាក់ចំណូលសម្រាប់គ្រួសារ ហើយជិត ៥៧% ស្មើនឹង ៤២៩,៣៨០នាក់ ជាកុមារស្ថិតក្នុងពលកម្ម និង ជាង៣១% ស្មើនឹង ២៣៦,៤៩៨នាក់ ស្ថិតក្នុងការងារមានស្ថានភាពគ្រោះថ្នាក់។
អភិបាលរងខេត្តសៀមរាប លោក គឹម ឆៃហៀង ក៏មិនអាចកំណត់តួលេខជាក់លាក់ពីចំនួនពលកម្មកុមារនៅក្នុងខេត្តរបស់ខ្លួនបាននោះដែរ។ ប៉ុន្តែលោកប៉ាន់ស្មានថា មិនលើសពី២០០នាក់ទេ ដែលកំពុងរងគ្រោះពីការកេងប្រវ័ញ្ចពលកម្ម ហើយក្នុងនោះអាជ្ញាធរក៏កំពុងជួយសង្គ្រោះជាបន្តបន្ទាប់ផងដែរ។ លោកអភិបាលរងបន្ថែមថា៖« យើងមិនទាន់បានសរុបនៅឡើយទេ។ យើងរំដោះបាន ៤ទៅ១០នាក់ ក៏មាន ៤ទៅ១០ទៀត អញ្ចឹងយើងត្រូវធ្វើការជាបន្តបន្ទាប់។ សំខាន់ដើម្បីដោះស្រាយបញ្ហានេះបាន គឺអាជ្ញាធរមូលដ្ឋាន និងម្ចាស់សហគ្រាស ដែលគាត់ដឹងថា អ្វីជាពលកម្មកុមារ ដូច្នេះមុននឹងពួកគាត់ទទួលយកកុមារទាំងនោះមកធ្វើការ ក៏គាត់ត្រូវដឹងពីផលលំបាករបស់ពួកគាត់ដែរ»។
បច្ចុប្បន្ន គម្រោងអ៊ិចសែលរបស់អង្គការទស្សនៈពិភពលោក កំពុងធ្វើការនៅក្នុងខេត្តក្រុងមួយចំនួននៅកម្ពុជា ក្នុងនោះមាន ភ្នំពេញ សៀមរាប បន្ទាយមានជ័យ បាត់ដំបង ពោធិ៍សាត់ និងខេត្តត្បូងឃ្មុំជាដើម។ ចំណែកខេត្តសៀមរាប គឺមានស្រុកគោលដៅចំនួន៤ មានស្រុកជីក្រែង សូទ្រនិគម ប្រាសាទបាគង និងស្រុកពួក។ តាមការបញ្ជាក់ពីនាយកគម្រោង លោកស្រី Ochavillo គម្រោងនេះទទួលបានថវិកាគាំទ្រពីក្រសួងការងារសហរដ្ឋអាមេរិកចំនួន ១០លានដុល្លារ និងថវិកាបដិភាគពីអង្គការទស្សនៈពិភពលោក ចំនួន១លានដុល្លារ សរុប១១លានដុល្លារ លើគម្រោងរយៈពេល៤ឆ្នាំនៅកម្ពុជា។
«វាមានភាពស្មុគស្មាញ។ អ៊ិចសែលត្រូវធ្វើការកម្មវិធីចំរុះជាច្រើន មានដូចជាការផ្តល់សេវាអប់រំ ក្នុងទម្រង់ក្នុងនិងក្រៅប្រព័ន្ធ។ កុមារខ្លះអាយុពី១៥ទៅ១៧ឆ្នាំ ពួកគាត់ត្រូវការរៀនជំនាញវិជ្ជាជីវៈ ព្រោះថាពួកគាត់មិនអាចត្រឡប់ទៅសិក្សាបានទៀតទេ ដោយសារបោះបង់យូរពេក។ ក្នុងនោះ យើងក៏ជួយលើកកម្ពស់ជីវភាពគ្រួសារកុមារផងដែរ»។ នេះជាការបញ្ជាក់បន្ថែមរបស់លោកស្រី Ochavvillo ពីការងារផ្សេងៗដែលគម្រោងអ៊ិចសែលកំពុងធ្វើការជួយសង្គ្រោះពលកម្មកុមារកម្ពុជា។
គួរបញ្ជាក់ថា នៅព្រឹកថ្ងៃទី៥ សីហា អង្គការទស្សនៈពិភពលោក បានរៀបចំវេទិការកុមារ និងយុវជនថ្នាក់ខេត្តមួយ ក្រោមប្រធានបទ «បញ្ឈប់ពលកម្មកុមារ កុំឈប់ត្រឹមប៉ុណ្ណឹង ទាំងអស់គ្នា យើងអាចធ្វើបាន»។ ដោយកម្មវិធីនេះធ្វើឡើងរយៈពេល២ថ្ងៃ នៅទីក្រុងសៀមរាប ដោយមានកុមារប្រមាណជិត២០០នាក់ចូលរួម ដែលពួកគេមកពីស្រុកគោលដៅទាំង៤ ក្នុងខេត្តសៀមរាប។ គោលបំណងនៃវេទិកានេះ គឺដើម្បីបង្កើតឳកាសដល់កុមារ និងយុវជន បានចូលរួម ផ្លាស់ប្តូរនិងរៀនពីគ្នាទៅវិញទៅមក ជុំវិញអ្វីដែលពួកគេបានធ្វើនាពេលកន្លងមក។ល៕
© រក្សាសិទ្ធិដោយ thmeythmey.com