ជាតិ
សង្គមជាតិ
ក្រោយសង្គ្រាម និស្សិតខ្មែរជិត២ពាន់នាក់ ទទួលបានអាហារូបករណ៍ទៅសិក្សានៅបារាំង
× ក្រោយពីមានការចរចាកិច្ចព្រមព្រៀងទីក្រុងប៉ារីស ឆ្នាំ១៩៩១មក ប្រទេសបារាំង និងស្ថាប័នដៃគូនានា បានផ្តល់អាហារូបករណ៍ដល់និស្សិតកម្ពុជាជិត២ពាន់នាក់ ទៅសិក្សានៅប្រទេសបារាំង។ ការផ្តល់អាហារូបករណ៍របស់រដ្ឋាភិបាលបារាំងជាង២០មកនេះ ក្នុងគោលបំណងជួយបណ្តុះបណ្តាលធនធានមនុស្សនៅកម្ពុជា ដើម្បីឲ្យពួកគេចូលរួមស្តារ និងអភិវឌ្ឍន៍ប្រទេសកម្ពុជាឡើងវិញ។
ឯកអគ្គរដ្ឋទូតបារាំងប្រចាំនៅកម្ពុជា លោក ហ្សង់-ក្លូដ ពាំបឺហ្វ បានមានប្រសាសន៍ថា ក្រោយពីមានកិច្ចព្រមព្រៀងទីក្រុងប៉ារីស ឆ្នាំ១៩៩១មក និស្សិតកម្ពុជាជិត២ពាន់នាក់ ទទួលបានអាហារូបករណ៍ពីរដ្ឋាភិបាលបារាំង និងស្ថាប័នដៃគូនានា ទៅបន្តការសិក្សានៅប្រទេសបារាំង។
សម្រាប់ឆ្នាំ២០១៥នេះ និស្សិតកម្ពុជា៩៨នាក់ ទទួលបានអាហារូបករណ៍ពីរដ្ឋាភិបាលបារាំងនិងស្ថាប័នដៃគូនានា ទៅបន្តការសិក្សាថ្នាក់អនុបណ្ឌិត និងថ្នាក់បណ្ឌិតនៅប្រទេសបារាំង លើមុខជំនាញសេដ្ឋកិច្ច ច្បាប់ សុខាភិបាល វិស្វកម្ម ទេសចរណ៍ និងអក្សរសាស្ត្របារាំងជាដើម។ នេះជាការបញ្ជាក់របស់លោក ស្សង់-ក្លូដ ពាំបឺហ្វ ឯកអគ្គរដ្ឋទូតបារាំងប្រចាំនៅកម្ពុជា។
ពីធីអបអរសាទរដល់សិស្សិតទាំងនោះ ដែលបានរៀបចំនៅវិទ្យាស្ថានបារាំង កាលពីល្ងាចថ្ងៃទី៤ សីហានេះ ត្រូវបានលោក ស្សង់-ក្លូដ ពាំងបឺហ្វ បញ្ជាក់ថា ការផ្តល់អាហារូបករណ៍នេះ ក្នុងគោលបំណងជួយបណ្តុះបណ្តាលធនធានមនុស្សកម្ពុជា ដើម្បីឲ្យពួកគេចូលរូមស្តា និងអភិវឌ្ឍន៍ប្រទេសកម្ពុជាឡើងវិញ។
ជាមួយគ្នានេះដែរ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជូន ណារ៉ុន បានលើកទឹកចិត្តដល់និស្សិតដែលបានទៅសិក្សានៅបរទេស ហើយយកចំណេះទាំងនោះត្រឡប់មកកម្ពុជាវិញ បើទោះជាពួកគេធ្វើការនៅក្នុងវិស័យរដ្ឋ ឯកជន ឬអង្គការក៏ដោយ ឲ្យតែបានចូលរួមអភិវឌ្ឍន៍ប្រទេស។ លោករដ្ឋមន្ត្រីក្រសួងអប់រំ បានមានប្រសាសន៍ទៀតថា ក្រៅពីរដ្ឋាភិបាលបារាំងផ្តល់អាហារូបករណ៍ដល់និស្សិតកម្ពុជាទៅសិក្សានៅប្រទេសបារាំង បារាំងក៏បានបណ្តុះណ្តាលធនធានមនុស្សកម្ពុជា នៅក្នុងប្រទេសកម្ពុជាផងដែរ ដូចជា តាមរយៈការធ្វើកិច្ចសហប្រតិបត្តការណ៍ជាមួយសាកលវិទ្យាល័យជាសមាជិកនិយាយភាសាបារាំងនៅកម្ពុជាជាដើម។
លោករដ្ឋមន្ត្រីក្រសួងអប់រំ បានបញ្ជាក់ថា ជាមធ្យមកម្ពុជាទទួលបានអាហារូណ៍ទៅសិក្សានៅបរទេសប្រមាណជា៥០០នាក់ក្នុងមួយឆ្នាំ។ ជាក់ស្តែងនៅឆ្នាំ២០១៥នេះ មាននិស្សិតខ្មែរទទួលបានអាហារូបករណ៍ទៅសិក្សានៅប្រទេសបារាំង៩៨នាក់ ចិន៦២នាក់ ថៃជិត២០០នាក់ និងនៅបណ្តាប្រទេសផ្សេងៗទៀត៕
Tag:
អាហារូបករណ៍
បារាំង
និស្សិត
© រក្សាសិទ្ធិដោយ thmeythmey.com