ជនជាតិវៀតណាម១៨នាក់ទៀត ត្រូវបានឃាត់ខ្លួននៅថ្ងៃនេះ

ជាតិ

សង្គមជាតិ

ជនជាតិវៀតណាម១៨នាក់ទៀត ត្រូវបានឃាត់ខ្លួននៅថ្ងៃនេះ

05, Aug 2015 , 3:18 pm

រូបភាព

ដោយ: សារព័ត៌មានថ្មីៗ

នៅព្រឹកថ្ងៃពុធទី៥ ខែសីហានេះ នគរបាលនៃនាយកដ្ឋានស៊ើបអង្កេត និងអនុវត្តនីតិវិធី សហការជាមួយស្នងការដ្ឋាននគរបាលធាជធានីភ្នំពេញ បានឃាត់ខ្លួនជនជាតិវៀតណាមដែលស្នាក់នៅខុសច្បាប់ ចំនួន១៨នាក់បន្ថែមទៀត បញ្ជូនមកអគ្គនាយកដ្ឋានអន្តោប្រវេសន៍ ដើម្បីអនុវត្តតាមនីតិវិធីច្បាប់។ ពួកគេត្រូវបាននគរបាលរកឃើញ នៅចំណុចភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ។

នៅក្នុងខែកក្កដាកន្លងទៅអាជ្ញាធរកម្ពុជា បានរកឃើញជនអន្តោប្រវេសន៍ខុសច្បាប់ចំនួន២៥៥នាក់ ស្រី៦៩នាក់ រួមមាន១៤សញ្ជាតិ ក្នុងនោះមានជនជាតិរហូតដល់ទៅ២៥៥នាក់ ស្រី៦៨នាក់។ នេះបើតាមលោក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយកដ្ឋានអន្តោប្រវេសន៍។ លោកអ៊ុក ហៃសីឡា បានបញ្ជាក់ថាប្រតិបត្តិការស្វែងរក និងបណ្តេញជនអន្តោប្រវេសន៍ខុសច្បាប់ ក៏នឹងធ្វើឡើងជាបន្តបន្ទាប់ទៀតដែរ។

សូមបញ្ជាក់ថា ក្នុងរយៈពេល៧ខែឆ្នាំ២០១៥ គិតចាប់ពីខែមករា រហូតដល់ថ្ងៃទី៣០ខែកក្កដា អាជ្ញាធរបានរកឃើញជនអន្តោប្រវេសន៍ខុសច្បាប់នៅក្នុងប្រទេសកម្ពុជាចំនួន១,៤៨៤នាក់ រួមមាន៤២សញ្ជាតិ ក្នុងនោះជនជាតិវៀតណាមមានចំនួន១,៣៣៨នាក់។ នៅក្នុងខែកក្កដាកន្លងទៅ មានជនអន្តោប្រវេសន៍សរុបចំនួន២២២នាក់ ត្រូវបានបណ្តេញចេញពីកម្ពុជា ក្នុងនោះមានជនជាតិវៀតណាមចំនួន២០២នាក់៕