ជាតិ
ស្ថានទូតអាមេរិកផ្តល់វគ្គបណ្តុះបណ្តាលស្តីពីដំណាក់កាលនៃសារព័ត៌មានអនឡាញ
× ក្លឹបអ្នកកាសែតកម្ពុជា (ក.អ.ក) សហការជាមួយស្ថានទូតអាមេរិកប្រចាំនៅកម្ពុជា នឹងរៀបចំវគ្គបណ្តុះបណ្តាលស្តីពី «ការរាយការណ៍ព័ត៌មានឲ្យបានល្អក្នុងដំណាក់កាលនៃសារព័ត៌មានអនឡាញ»។ វគ្គបណ្តុះបណ្តាលនេះនឹងប្រព្រឹត្តទៅថ្ងៃទី១៣ សីហាខាងមុខ នៅទីស្នាក់ការក្លឹបអ្នកកាសែតកម្ពុជា។ នេះបើតាមសេចក្តីជូនដំណឹងរបស់ក្លឹបអ្នកកាសែតកម្ពុជានៅថ្ងៃទី៥ សីហានេះ។
កិច្ចសហការរៀបចំវគ្គបណ្តុះបណ្តាលរវាងក្លឹបអ្នកកាសែតកម្ពុជា និងស្ថានទូតអាមេរិកប្រចាំនៅកម្ពុជានេះ ក្នុងគោលបំណងពង្រឹងសមត្ថភាពបន្ថែមដល់អ្នកកាសែតកម្ពុជា ទាក់ទងនឹងរបៀបរាយការណ៍ព័ត៌មានក្នុងដំណាក់កាលនៃសារព័ត៌មានអនឡាញ ឬអេឡិចត្រូនិក។
គ្រូឧទ្ទេសនាមនៅក្នុងវគ្គបណ្តុះបណ្តាលនេះ រួមមាន លោកស្រី Janet Steele សាស្ត្រាចារ្យសារព័ត៌មាននៅមហាវិទ្យាល័យសារព័ត៌មាន និងកិច្ចការសាធារណៈនៃសាកលវិទ្យាល័យ George Washington រួមទាំងអ្នកសារព័ត៌មានដែលសមត្ថភាព និងបទពិសោធន៍ច្រើនឆ្នាំនៅកម្ពុជា ជាច្រើនអ្នកទៀត។
សូមបញ្ជាក់ថា វគ្គបណ្តុះបណ្តាលដែលរៀបចំនៅទីស្នាក់ការ ក.អ.ក នៅថ្ងៃទី១៣ សីហាខាងមុខនេះ ជ្រើសរើសយកអ្នកសារព័ត៌មានតែ២៥នាក់ប៉ុណ្ណោះ ដើម្បីចូលរៀនក្នុងវគ្គបណ្តុះបណ្តាលនេះ។ ដើម្បីជ្រាប់ព័ត៌មានលម្អិតសូមទំនាក់ទំនងទៅទីស្នាក់ការ ក.អ.ក ឬតាមទូរសព្ទ ០១៧ ៥៣៥ ៥៣៥, ០១២ ៨៩៥, ៨៥៣, ០៩៣ ៥២២ ៥៤២ ៕
Tag:
ស្ថានទូតអាមេរិក
ក្លិបអ្នកកាសែតកម្ពុជា
Janet Steele
© រក្សាសិទ្ធិដោយ thmeythmey.com